រាជធានីភ្នំពេញ ៖ បុរសម្នាក់ជិះម៉ូតូធ្លាក់ជង្ហុកដួលខ្លួនឯងបាក់ឆ្អឹងជំនីរ ខាងស្តាំ ខណៈពេលដែលត្រឡប់មកពីចូលរួមក្នុងពិធីខួបកំណើតចៅរបស់ ចៅហ្វាយនាយ និងដួលនៅត្រង់ចំណុចផ្លូវលេខ២៧១ ជិតដល់គ្លីនិកបញ្ញាស័ក្តិ ក្នុងសង្កាត់ផ្សារដើមថ្កូវ ខណ្ឌចំការមន។ ហេតុការណ៍កើតឡើងកាលពីវេលាម៉ោង១១យប់ថ្ងៃទី១១ តុលា។
ជនរងគ្រោះឈ្មោះពុំ អឿន ភេទប្រុស អាយុ៥១ឆ្នាំ ធ្វើការនៅមន្ទីរបរិស្ថានខណ្ឌមានជ័យ មានទីលំនៅភូមិបឹងឈូក សង្កាត់និរោធ ខណ្ឌមានជ័យ បានឱ្យដឹងថា នៅថ្ងៃកើតហេតុ គាត់បានជិះម៉ូតូម៉ាកវិវ៉ា ពណ៌ខ្មៅ ទៅចូលរួមពិធីខួបកំណើតចៅរបស់ប្រធានគាត់នៅមន្ទីរបរិស្ថាន ភ្នំពេញខាងត្បូងវត្តមហាមន្ត្រី ហើយក្នុងនោះមានការផឹកស៊ីជួបជុំមិត្តភក្តិផងដែរ។
លុះដល់ម៉ោង១១យប់ គាត់ជិះម៉ូតូត្រឡប់មកផ្ទះវិញ ហើយដោយដឹងថា ខ្លួនស្រវឹងស្រា គាត់បានជិះទៅរកកន្លែងធំ ទូលាយកុំឱ្យមានគ្រោះថ្នាក់ ។ ពេលជិះមកដល់ចំណុចកើតហេតុ ស្រាប់តែជិះធ្លាក់ជង្ហុកបណ្តាលឱ្យដួល ធ្វើឱ្យបាក់ឆ្អឹងជំនីរខាងស្តាំ និងរយះក្បាលជង្គង់ តែម្តង ហើយរវល់តែរងរបួសឈឺចាប់ស្រាប់តែមានអ្នកលួចយកទូរស័ព្ទដៃ របស់គាត់អស់ពីរគ្រឿងផងដែរ ៕
