ពត័មានទាន់ហេតុការណ៍: Aug 6, 2011

Saturday, August 6, 2011

កម្មករបុកគ្រឹះម្នាក់ត្រូវម៉ាស៊ីនស្រូបខ្ទេចទាំងដៃទាំងជើង

ភ្នំពេញ ៖ យុវជនម្នាក់ត្រូវបានមិត្តរួមការងារបញ្ជូនមកកាន់ពេទ្យកាល់ម៉ែត ដើម្បីសង្គ្រោះជីវិតភ្លាមៗ ក្រោយពេលយុវជនរូបនោះ ជួបគ្រោះថ្នាក់ ដោយម៉ាស៊ីនបុកគ្រឹះនៅការដ្ឋានបូរីប៉េងហួតស្រូបបាក់ដៃ និងជើងពេលកំពុងបុកគ្រឹះនៅការដ្ឋាន។ហេតុការណ៍នេះបានកើតឡើងកាលពីវេលាម៉ោង៨និង២០នាទី ព្រឹកថ្ងៃទី ០៥ ខែសីហាឆ្នាំ២០១១ នៅចំណុចការដ្ឋានសំណង់បូរីប៉េងហួត ដែលមានទីតាំងនៅភូមិបឹងស្នោរ សង្កាត់ និរោធ ខណ្ឌមានជ័យ។ជនរងគ្រោះឈ្មោះ យុន វាសនា ភេទប្រុសអាយុ២០ឆ្នាំមុខរបរកម្មករ ផ្នែកបុកគ្រឹះ ស្នាក់នៅក្នុងការដ្ឋានសំណង់ និងមានស្រុកកំណើតនៅ ឃុំ សំរោងដំរី ស្រុក បាភ្នំ ខេត្តព្រៃវែង។

ប្រភពព័ត៌មានពីមិត្តរួមការងារបានឲ្យដឹងថានៅវេលាកើតហេតុជនរងគ្រោះ បានបំពេញការងារបុកគ្រឹះរបស់ខ្លួនដូចរាល់ដង ។ នៅពេលដែលបុកគ្រឹះអស់មួយដើមរួចហើយបុរសរងគ្រោះបានរំកិលម៉ាស៊ីនដើម្បី ទៅបុកសរសរមួយដើមទៀត ប៉ុន្តែពេលដែលនាំគ្នារំកិលម៉ាស៊ីននោះកំពុងតែឆេះនោះជនរងគ្រោះ ក៏រអិលប្រេងម៉ាស៊ីនភ្លាត់ដៃចូលម៉ាស៊ីនខ្ទេចដៃនិងជើងទាំងសងខាង ត្រូវបានគេបញ្ជូនមកកាន់មន្ទីរពេទ្យបាយ័ន្ដ ប៉ុន្តែដោយសា្ថនភាពធ្ងន់ពេក ទើបបញ្ជូនមកសង្គ្រោះនៅមន្ទីរពេទ្យកាល់ម៉ែតបន្តទៀត៕

មួយយប់ជនមិនស្គាល់មុខបំពុលឆ្កែងាប់១៧ក្បាល

ពោធិ៍សាត់ ៖ លោក អ៊ុក សុះ នាយការប៉ុស្តិ៍រដ្ឋបាលឃុំ តាលោប្រាប់កម្ពុជាថ្មីឲ្យដឹងថា កាលពីវេលាម៉ោង ប្រមាណជា ៨និង ៥នាទី យប់ថ្ងៃទី ៤ ខែសីហាឆ្នាំ២០១១ អ្នកភូមិគោកអំល និង អ្នកភូមិ ទួល ទទឹងក្នុងឃុំ តាលោ ស្រុកបាកាន ខេត្តពោធិ៍សាត់ ប្រាប់ថា មាន ជនមិនស្គាល់មុខ បានលួចដើរបំពុលឆ្កែងាប់អស់១៧ក្បាល តែមិនមានអ្នកណាបាត់បង់របស់អីទេ។ចំពោះប្រជាពលរដ្ឋដែលត្រូវគេ បំពុលឆ្កែងាប់១៧ក្បាល ចំនួន២ភូមិនោះ ក៏អត់មានគ្រោះថ្នាក់អ្វីដែរ។

លោក បានបន្តថា បើតាមកម្លាំងរបស់លោក ចុះដល់មូលដ្ឋានចំនួន២ភូមិទាំងយប់នេះ មានអ៊ំ ប្រុសម្នាក់នៅភូមិទួលទទឹង គាត់បានឲ្យដឹងថានៅមុនពេលកើតហេតុ គាត់បានឮសំឡេងសន្ធឹកឆ្កែព្រុសនៅតាមដងផ្លូវ ម្ខាងភូមិគោកអំល និង ម្ខាងផ្លូវមួយទៀតភូមិ ទួលទទឹង បន្ទាប់មកក៏ស្ងាត់សំឡេងឆ្កែព្រុសគាត់ក៏ដើរមកមុខផ្ទះ ឮសំឡេងឆ្កែ ទំនងជាពុលថ្នាំ គាប់ជូនមានអ្នកមានម៉ាស៊ីនប៉ោកស្រូវមួយគ្រឿងដែលខូចតាមផ្លូវនោះ ប្រាប់ថាមានងាប់ច្រើនក្បាល រូបគាត់ក៏ចាប់អារម្មណ៍ដល់ឆ្កែគាត់ ទំនងជាពុលថ្នាំដែរ ក៏រត់ទៅមើលឃើញពួកវាស្លាប់អស់តែម្ដង៕

ដោះស្រាយកំហឹងបាញ់រះបណ្ដាលឲ្យស្លាប់ម្នាក់ របួស៤នាក់ ខ្មាន់កាំភ្លើងគេចខ្លួនបាត់

ភ្នំពេញ ៖ យុវជនម្នាក់បានស្លាប់ បន្ទាប់ពីដឹកយកទៅសង្រ្គោះនៅមន្ទីរពេទ្យកាល់ម៉ែត្រ និង៤នាក់ផ្សេងទៀតបានរងរបួសធ្ងន់ស្រាលដោយសារខ្មាន់កាំភ្លើង បាញ់រះជាច្រើនគ្រាប់ ដោយសង្ស័យ ថា អាចជាការដោះស្រាយកំហឹងក្រោយពេលដែលមានទំនាស់រួច។ហេតុការណ៍បានកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី ៦ ខែសីហា ឆ្នាំ២០១១ នៅចំណុចមុខភោជនីយដ្ឋានមេហ្គា ផ្លូវលេខ៨៨កែងផ្លូវ៧៥ សង្កាត់ស្រះចក ខណ្ឌដូនពេញ។

ជនរងគ្រោះឈ្មោះឈិត ម៉ក់ ភេទប្រុស អាយុ២២ឆ្នាំ ជាជំនួយការចុងភៅសណ្ឋាគារភ្នំពេញ ស្នាក់នៅផ្ទះជួលប្លុកបឹងកក់ បានត្រូវរងរបួសចំនួន៣គ្រាប់ជាទម្ងន់ ពេលដឹកដល់មន្ទីរពេទ្យស្លាប់បាត់បង់ជីវិតហើយ និងឈ្មោះទន សារឿន ភេទប្រុស អាយុ២១ឆ្នាំ របួសកំភួនដៃ, ឈ្មោះប្រាក់ ភក្រ្តា ភេទប្រុស អាយុ២២ឆ្នាំ របួសពោះខាងស្ដាំ និងឈ្មោះប៉ាវចាន់ ណូ និងថា ត្រូវរងរបួសស្រាល។
សាក្សីបានឲ្យដឹងថា មុនពេលកើតហេតុក្រុមជនរងគ្រោះបានផឹកស៊ីស្រវឹងជោកនៅមុខ សណ្ឋាគារភ្នំពេញ ក៏បាននាំគ្នាយកទូរស័ព្ទទៅបញ្ចាំនៅមុខហាងសារ៉ាតោន ក្នុងគោលបំណងទៅសប្បាយបន្តនៅកន្លែងផ្សេង ពេលនាំគ្នាធ្វើដំណើរដល់ចំណុចកើតហេតុ ក៏មានជនមិនស្គាល់ មុខជិះម៉ូតូC125 ពណ៌ខ្មៅ ឆ្នាំ២០១១ មិនចាំស្លាកលេខ បានជិះមកពីក្រោយហើយបក្ខពួកខ្មាន់កាំភ្លើងនិយាយថា ពួកវាហ្នឹងហើយវ៉ៃយើង និយាយរួចក៏ដកកាំភ្លើងបាញ់ប្រាវៗហើយជិះគេចខ្លួនបាត់តែម្ដង៕

នាំស្រីស្នេហ៍ឡើងឋានសួគ៌ផ្ទះសំណាក់សារីធំ ប្រពន្ធតាមទាន់ដេញវាយផ្អើល

រាជធានីភ្នំពេញ ៖ អតីតមេការក្រុមហ៊ុនលក់គ្រឿងសំណង់មួយបាននាំស្រីស្នេហ៍ទៅក្រេប ទឹកឃ្មុំនៅផ្ទះសំណាក់ទាំងព្រឹកត្រូវបានប្រពន្ធដែលតាមដាន ជាប់ដូចស្រមោលអន្ទោលតាមប្រាណបានទាន់ដល់ក្នុងបន្ទប់ និងដេញវាយដោយដើមអំពៅធ្វើឱ្យលោកប្តីរត់ចោលស្រីស្នេហ៍។ ទោះបីជាយ៉ាងណាស្រីស្នេហ៍បានគេចចេញទៅសម្ងំលាក់ខ្លួននៅបន្ទប់ ក្បែរនោះទាំងព្រលឹងចុងសក់។

ហេតុការណ៍នេះបានកើតឡើងនៅវេលាម៉ោង៩ព្រឹកថ្ងៃ ទី៥ សីហា នៅផ្ទះសំណាក់សារីធំ ស្ថិតនៅអគារលេខ១០៨AI ផ្លូវលេខ២៧៣ ភូមិទួលគោក សង្កាត់ទួលសង្កែ ខណ្ឌឫស្សីកែវ។ បុរសដែលផិតក្បត់ប្រពន្ធលួចមានសហាយស្មន់នោះត្រូវប្រពន្ធឱ្យដឹង ថា ឈ្មោះចាន់ សាម៉ុល អាយុ៥២ឆ្នាំ ជាអតីតមេការក្រុមហ៊ុនឃីហ៊ួតលក់គ្រឿងសំណង់ មានទីលំនៅផ្ទះលេខ៦ ភូមិទួលគោក សង្កាត់ទួលសង្កែ ខណ្ឌឫស្សីកែវ។ តាមស្ត្រីឈ្មោះសួន កនីកា អាយុ៤៣ឆ្នាំ បានឱ្យដឹងថា រូបគាត់បានរស់នៅជាមួយឈ្មោះចាន់ សាម៉ុល ជាប្តីប្រពន្ធតាំងពីឆ្នាំ២០០១ ដោយមានកូនស្រីម្នាក់អាយុ៧ឆ្នាំ ដែលប្តីរូបនោះជាបុរសពោះម៉ាយធ្លាប់មានកូន៥នាក់ទៅហើយ។ ការរស់នៅជាមួយគ្នាពុំដែលមានបញ្ហាល្អក់កករឡើយប៉ុន្តែប្រមាណ១ ឆ្នាំចុងក្រោយនេះប្តីរបស់គាត់លួចមានស្រីកំណាន់ចិត្តឈ្មោះ ស្រីកែវ ធ្លាប់បំរើការនៅហាងខារ៉ាអូខេមួយនៅម្តុំផ្សារមាន់អាំង។

ស្ត្រីសួន កនីកា ជាប្រពន្ធបន្តទៀតថា នៅពេលដែលប្តីមានស្រី បានដើរលេងសីុចាយបំផ្លិចបំផ្លាញប្រាក់ក្នុងផ្ទះភ្លេចប្រពន្ធកូន ហើយរូបគាត់បានលួចតាមដានប្តី និងចង់ចាប់ឱ្យបានកំហុសដែលលួចមកដេកជាមួយស្រី។ នៅព្រឹកថ្ងៃទី៥ សីហា រូបគាត់បានប្រាប់ប្តីថា ចេញទៅប្រទេសវៀតណាម និងបានតាមដានពីសកម្មភាពប្តី។

នៅព្រឹកនោះប្តីបានជិះម៉ូតូម៉ាកឌ្រីម ស៊េរី២០០៩ ពណ៌ខ្មៅ ពាក់ស្លាកលេខភ្នំេពញ១AG៥៦១៥ មួយគ្រឿងបានឌុបកូនស្រីទៅរៀននៅសាលាវេស្ទើន រួចប្តីរូបនោះបានទូរស័ព្ទណាត់ស្រីស្នេហ៍ទៅផ្ទះសំណាក់ហើយនៅ វេលាម៉ោង៨ព្រឹក ប្តីរូបនោះបានធ្វើដំណើរទៅដល់ផ្ទះសំណាក់សារីធំ នៅតាមផ្លូវលេខ២៧៣ ភូមិទួលគោក សង្កាត់ទួលសង្កែ។ ក្រោយមកគេឃើញស្រីស្នេហ៍បានធ្វើដំណើរមកដល់តាមក្រោយ។

តាមព័ត៌មានឱ្យដឹងថា នៅព្រឹកនោះបុរសជាប្តីបានណាត់ស្រី ស្នេហ៍ចូលទៅក្នុងបន្ទប់ VIP 130 ផ្ទះសំណាក់សារីធំដោយចតទុកម៉ូតូនៅមុខបន្ទប់។ ឃើញប្តីលួចមានស្រី និងណាត់គ្នាមកឡើងឋានសួគ៌ទាំងព្រឹកបែបនេះស្ត្រីជាប្រពន្ធ បានទាញដើមអំពៅយកមកធ្វើដំបងវាយប្តី និងស្ត្រីជាសហាយ ហើយដើរគោះបន្ទប់គេឯងជាច្រើនបន្ទប់ តែមិនឃើញ។ ទោះបីអ្នកបំរើនៅទីនោះខំព្យាយាមលាក់បាំងដោយប្រាប់ថា បុរសជាប្តីមិននៅយ៉ាងណាក៏ដោយ។ នៅព្រឹកនោះស្ត្រីជាប្រពន្ធមិនអស់ចិត្តដោយឃើញម៉ូតូនៅទីនោះក៏ បានដើររក និងលួចសួរអ្នកបម្រើផ្សេងទៀត ទើបដឹងថា ប្តីរបស់ខ្លួននាំស្រីស្នេហ៍ចូលបន្ទប់ VIP130 ក៏បានទៅគោះទ្វារប្តី ប៉ុន្តែដំបូងប្តីមិនព្រមបើកទ្វារឡើយ។ លុះក្រោយមកប៉ូលិសប៉ុស្តិ៍ទៅដល់ទើបបុរសជាប្តីបានបើកទ្វារ ចេញ។

តាមព័ត៌មានឱ្យដឹងថាពេលលោកប្តីបើកទ្វារចេញ មកក្រៅប្រពន្ធបានស្ទុះទៅវាយប្តីនឹងដើមអំពៅហើយត្រូវសមត្ថ កិច្ច រួមទាំងសន្តិសុខនៅផ្ទះសំណាក់ឃាត់ចាប់ប្រតាយស្ត្រីនោះមិនឱ្យ វាយប្តី។ទោះបីជាយ៉ាងណាបុរសជាប្តីមិនបាននិយាយស្តីតបឡើយ ហើយទាញម៉ូតូបើកគេចទៅបាត់។ ចំណែកស្ត្រីឈ្មោះកែវ អាយុប្រមាណជាង២០ឆ្នាំបានរត់ចេញពីបន្ទប់ទៅសំងំលាក់ខ្លួននៅ បន្ទប់ក្បែរនោះទាំងព្រលឹងចុងសក់ដើម្បីគេចពីការវាយធ្វើបាបពី សំណាក់ប្រពន្ធ។ ទោះបីជាយ៉ាងណាកោះសន្តិភាពពុំទទួលការបំភ្លឺពីទំនាក់ទំនង ស្នេហាពីបុរសរូបនោះ និងស្រីស្នេហ៍ឡើយ ៕

យកកូនទៅព្យាបាលជំងឺគ្រូខ្មែរ រំលោភរហូតមានផ្ទៃពោះ ពេលនេះគ្រប់ខែទៅហើយ

ខេត្តកំពង់ឆ្នាំង ៖ ដោយសារតែទុកចិត្តលើគ្រូខ្មែរមន្ត អាគមអូមអាមពេក ឪពុកម្តាយបានយកកូនស្រីទៅព្យាបាលជំងឺ និងបណ្តោយ ទុកកូនស្រីនៅនឹងផ្ទះគ្រូ ព្រោះតែមមាញឹកនឹងការច្រូតកាត់ នៅឯស្រែមិនមានពេលចេញ-ចូលមើលថែកូនស្រីនោះឡើយ លុះដល់ពេល កូនស្រីត្រឡប់មកផ្ទះវិញ កូនមានផ្ទៃពោះ៥ខែកន្លះទៅហើយ គឺត្រូវគ្រូនោះចាប់រំលោភយ៉ាងសុខស្រួល ដោយរួមដៃជាមួយប្រពន្ធ ប្រព្រឹត្តអំពើដ៏លាមកនេះ ។

នៅចំពោះមុខអ្នកយកព័ត៌មានកោះសន្តិភាពស្ត្រីឈ្មោះ មុត គីមសួរ អាយុ ៥២ឆ្នាំ មានទីលំនៅភូមិល្បើក ឃុំខុនរ៉ង ស្រុកបរិបូរណ៍ បានរៀប រាប់នូវក្តីឈឺចាប់នេះថា កាលពីអំឡុងខែវិច្ឆិកា ២០១០ កូនស្រីគាត់ឈ្មោះ ល.ច.ណ អាយុ២៨ឆ្នាំ មានជំងឺសរសៃប្រសាទ បាន យកទៅឱ្យគ្រូខ្មែរឈ្មោះផាន ភាព អាយុ៥៦ឆ្នាំ ព្យាបាល គ្រូនោះ ប្រាប់ថា ត្រូវអំពើរបស់គេត្រូវសម្រាកព្យាបាលយូរខែ។ ក្រោយមកគាត់ និងប្តីក៏បានដាក់ឆ្នាំងចាន ប្រដាប់ប្រដា សម្រាប់ដេកស្នាក់អាស្រ័យព្យាបាលនៅផ្ទះគ្រូនោះតែម្តង ប៉ុន្តែ បានមួយរយៈខ្លីរដូវច្រូតកាត់មកដល់ ប្តីរបស់គាត់ និងគាត់ដោយជឿ ទុកចិត្តគ្រូនោះក៏បានសុំផ្ញើកូនស្រីឱ្យនៅនឹងផ្ទះគ្រូ ដើម្បីព្យាបាលបន្ត។ ការទុកកូនស្រីឱ្យនៅនឹងគ្រូនោះគាត់ ក៏តែងទៅមើលម្តងម្កាលដែរ ដោយយកអង្ករត្រីសាច់ទៅឱ្យគ្រូនោះ សម្រាប់ហូបជាមួយនឹងកូនគាត់ដែរ។

ស្ត្រីជាម្តាយនិយាយទៀតថា នៅខែមីនា ២០១១ គាត់បានយកកូនស្រី ត្រឡប់មកផ្ទះវិញ ពេលមកដល់ផ្ទះបានមួយថ្ងៃ កូនស្រីប្រាប់ថា «ម៉ែ គ្រូភាពចាប់ខ្ញុំរំលោភ ឥឡូវផើមហើយ»គ្រាន់តែឮកូនប្រាប់ ភ្លាម គាត់ធ្លាក់ថ្លើមក្តុក ប៉ុន្តែគាត់ខំទប់ស្មារតីមិនទាន់ជឿ ទេ ព្រោះតែកូនស្រីមានជំងឺសរសៃប្រសាទក្រែងនាងនៅមានស្មារតី មិនល្អ។ ប៉ុន្តែដល់ខែមេសា ដោយឃើញកូនស្រីគាត់មានសភាពប្លែក ក៏នាំទៅឱ្យគ្រូពេទ្យពិនិត្យមើល គ្រូពេទ្យអេកូប្រាប់ថា កូន ស្រីគាត់មានផ្ទៃពោះ២០សប្តាហ៍ហើយ ។ ក្រោយមកនៅថ្ងៃទី២ ឧសភា ២០១១ គាត់បានដាក់ពាក្យប្តឹងទៅការិយាល័យប្រឆាំងការ ជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ត។ នៅថ្ងៃទី ៦ មិថុនា លោកហុង យីន អនុប្រធានការិយាល័យនេះ បានហៅគាត់ទៅជួប និងប្រាប់ថា យើងគ្មានភស្តុតាងចោទប្រកាន់គេទេ ប៉ុន្តែយ៉ាងណាគេ សុំសម្រួលបង់លុយ១៥០ម៉ឺនរៀល គាត់ថា មិនយកទេ ត្រឹម១លាន កន្លះនោះ ។

លុះពេលគាត់ដើរចេញពីស្នងការដ្ឋាន លោកហុង យីន បានមកនិយាយទៀតថា លុយ១លានកន្លះល្មមយកហើយមីងអើយ គឺបង្កើតកូន គ្រប់ហើយ ប៉ុន្តែគាត់នៅតែមិនយក ។ ក្រោយមកទៀតគាត់ក៏បានដាក់ ពាក្យប្តឹងទៅការិយាល័យសិទ្ធិមនុស្ស ្និងប្តឹងទៅលោក ព្រះរាជអាជ្ញាអមសាលាដំបូងខេត្តផងដែរ។ ឥឡូវសំណុំរឿងនេះត្រូវ បានខាងការិយាល័យព្រហ្មទណ្ឌកម្រិតធ្ងន់ធ្វើការឡើងវិញ និងបាន ស៊ើបអង្កេត ចំណែកគ្រូភាពនោះពេលដឹងរឿងថា ប៉ូលិសស៊ើបអង្កេតក៏ នាំប្រពន្ធកូនរត់ចេញពីផ្ទះអស់តែម្តង។ ព័ត៌មានលម្អិតនឹងផ្សាយ ជូននៅពេលក្រោយ និងនៅលើទំព័រកាសែតកោះសន្តិភាព ៕

ផ្ទុះធុងហ្គាស ខណៈដាំស្ល របួស ប្ដី-ប្រពន្ធ ផ្អើលជាយដែន ប៉ោយប៉ែត

បន្ទាយមានជ័យ ៖ ពីរនាក់ប្ដី-ប្រពន្ធ ដែលជាម្ចាស់ផ្ទះ បានរងរបួសជាទម្ងន់ឆេះ សុសសាច់ ខណៈដាំស្ល ហើយផ្ទុះធុងហ្គាស ធ្វើឱ្យមានការភ្ញាក់ផ្អើល ពីសំណាក់ប្រជាពល រដ្ឋជាច្រើននាក់ នៅទីក្រុងប៉ោយប៉ែត កាល ពីវេលាម៉ោង ១២ និង៤៥នាទី ថ្ងៃទី០៥ ខែ សីហា ឆ្នាំ ២០១១ នៅចំណុចសាមគ្គីមាន ជ័យ ភូមិក្បាលស្ពាន សង្កាត់-ក្រុង ប៉ោយ ប៉ែត ។

ម្ចាស់ផ្ទះដែលរងគ្រោះ ឈ្មោះ អែម ហេង ភេទប្រុស អាយុ ២៩ឆ្នាំ បានរងរបួស ជាទម្ងន់ ដោយភ្លើងបានឆេះពេញខ្លួន ហើយ ប្រពន្ធឈ្មោះ នូវ សុផាវី អាយុ ២៨ឆ្នាំ រង របួសស្រាល ដែលជនរងគ្រោះទាំងពីរ ជា ប្ដី-ប្រពន្ធទាំងពីរនាក់នេះ រស់នៅផ្ទះជួល ក្នុងភូមិកើតហេតុខាងលើ និងប្រកបមុខ របរលក់ចាប់ហួយ ។

លោកស្រី នូវ សុផាវី ដែលជាភរិយា បានប្រាប់មជ្ឈមណ្ឌលព័ត៌មានដើមអម្ពិល ថា ខណៈដែលលោកស្រី និងប្ដីកំពុងអង្គុយ លើគ្រែហូបបាយ ខណៈនោះសម្លមួយឆ្នាំង មិនទាន់បានដាក់ចុះពីចង្ក្រានបាយ ។ ពេល នោះ លោកស្រីបានយកចានដួសមួយចំណែក ដើម្បីហូប ហើយសល់ពីនោះស្ថិតនៅលើ ចង្ក្រានដដែល។លោកស្រីបានបន្ដថា ភ្លាមៗ នោះ ស្រាប់តែទុស្សេធុងហ្គាសតែម្ដងបណ្ដាល ឱ្យមានភ្លើងឆាបឆេះយ៉ាងខ្លាំង ធ្វើឱ្យធុង ហ្គាសតូចៗ ដែលលោកស្រីដាក់លក់នោះ ក្ដៅផ្ទុះបន្ដបន្ទាប់ជាច្រើនកំប៉ុង ហើយភ្លើង ក៏បានឆាបឆេះយ៉ាងសន្ធោសន្ធៅ និងខ្ទាត ឆេះពេញខ្លួនប្រាណតែម្ដង ។ ភ្លាមៗនោះ ប្រជាពលរដ្ឋ និងកម្លាំងនគរបាលក្រុងប៉ោយ ប៉ែតបានចុះទៅជួយអន្ដរាគមន៍ និងពន្លត់ ភ្លើងទាន់ពេលវេលាផងដែរ ទើបជនរង គ្រោះអាចចេញមកក្រៅបាន។ បច្ចុប្បន្នជន រងគ្រោះទាំងពីរនាក់ប្ដី-ប្រពន្ធ ត្រូវបាន រថយន្ដជួយសង្គ្រោះរបស់អង្គការកាម៉ាដឹក យកទៅសង្គ្រោះនៅមន្ទីរពេទ្យ ៕

ចិនៈ ប្រជាជន ២០ម៉ឺននាក់ ជម្លៀសខ្លួន មុនព្យុះមកដល់

សៀងហៃៈ ប្រទេសចិនបានជម្លៀស ប្រជាជនប្រមាណជាង ២០ម៉ឺននាក់ ចេញពីឆ្នេរភាគខាងកើត នៃប្រទេស ហើយនិងលុបចោលនៅជើងហោះហើរ ជាង ២០០ កាលពីថ្ងៃសុក្រ ខែសីហា ដើម្បីជាការត្រៀមខ្លួនទៅនឹងព្យុះ ដ៏កំណាចមួយ ដែលនឹងបោកបក់ប្រទេសនៅក្នុងឆ្នាំនេះ។

យោងតាមគេហទំព័រ របស់ទូរទស្សន៍ Channel News Asia បានឲ្យដឹងនៅថ្ងៃសៅរ៍ ទី៦ ខែសីហា ឆ្នាំ២០១១ នេះថា ព្យុះសង្ឃរាឈ្មោះ មួយហ្វា (Muifa) ដែលមានល្បឿន ខ្យល់បក់ រហូតដល់ទៅ ១៦២គីឡូម៉ែត្រក្នុងមួយម៉ោង ត្រូវបានគេព្យាករណ៍ថា នឹងបណ្តាលឲ្យមានការរអិលបាក់ដី នៅឆ្នេរភាគខាងកើតប្រទេសចិន នៅល្ងាចថ្ងៃសៅរ៍ ទី០៦ ខែសីហា ឬក៏ថ្ងៃអាទិត្យស្អែកនេះ។
ភាគខាងកើតនៃខេត្ត ជឺជៀង ដែលស្ថិតនៅភាគខាងត្បូងក្រុងសៀងហៃ បានជម្លៀសប្រជាជន ជាង២០៦,០០០នាក់ ពីតំបន់ឆ្នេរទៅកន្លែងមានសុវត្ថិភាព កាលពីល្ងាចថ្ងៃសុក្រទី៥ខែសីហា ។

មន្ត្រីផ្នែកអាកាសធាតុ នៅក្រុងសៀងហៃ បានប្រាប់អ្នកសារព័ត៌មានថា "ព្យុះមួយហ្វានេះបានបោកបក់ សំដៅមកប្រទេសយើង ហើយប៉ុន្តែមិនទាន់មានការ ព្រមានណាមួយថា វានឹងមកដល់កាន់តែកៀកនោះទេ"។សូមបញ្ជាក់ថា អាកាសចរណ៍នៅភាកខាងត្បូង ប្រទេសចិនបាននិយាយថា ក្រុមហ៊ុនរបស់ខ្លួនអាចនឹងលុបចោលនៅជើងហោះហើរ ទៅភាគខាងកើត ប្រទេសប្រហែលជា ១៤០ នៅថ្ងៃសៅរ៍នេះ ខណៈអាកាសចរណ៍ អ៊ែរឆៃណា បានលុបចោលជើងហោះហើរ របស់ខ្លួនច្រើនជាង ៣០តែប៉ុណ្ណោះ៕

រលកកូរ៉េ ចាប់ផ្តើម បោកបក់ លើច្រាំង សមុទ្រអឺរ៉ុប

សេអ៊ូលៈ តន្ត្រីសម័យរបស់កួរ៉េខាងត្បូង កំពុងតែសម្លឹងមើល ទៅប៉ែកខាងអឺរ៉ុប បន្ទាប់ពីមាន ការគាំទ្រពីសំណាក់ មហាជននៅ អាស៊ីបូព៌ាយ៉ាងច្រើនសន្ធឹកសន្ធាប់ តាមរយៈអ្នកបោះឆ្នោត នៅតាមអ៊ីនធើណេត។
ការបោះឆ្នោតនៃ K-pop ត្រូវបានបង្កើតឡើង នៅក្នុងប្រទេសចិន ជប៉ុន និង អាស៊ីអាគ្នេយ៏ ដោយមានការប្រគុំតន្ត្រី ដែលមានការចូលរួម ដោយតារាចំរៀងដ៏ល្បីល្បាញ រ៉េន និង ក្រុមចំរៀងបុរស TVXQ។
ការនាំចេញ នៃបទចំរៀង បានកក្រើកឡើង ពី៦ លានដុល្លារ ក្នុងឆ្នាំ២០០២ ទៅ ៣១,៣លានដុល្លារ ក្នុងឆ្នាំ២០០៩ ។ នេះជាអភូតហេតុដ៏អស្ចារ្យមួយ ដូចជា រលកកូរ៉េ (ហាលយូ) សាយ ភាយ។
ភាពជោគជ័យនៅ ក្រៅប្រទេសរបស់ K-pop ត្រូវបានបោះជំហានចេញទៅ តាមការស្វែង រកទីផ្សារ ដើម្បីលក់ CD និងតាមរយៈការ Download បទចំរៀងនៅតាម អ៊ិនធើណេតជុំវិញពិភពលោក។
បច្ចុប្បន្ន ទីផ្សារបទចំរៀង របស់កូរ៉េខាងត្បូង រួមទាំងការ Download បទចំរៀងស្របច្បាប់ តាមទូរស័ព្ទ និងតាមអ៊ីនធើណេត បានទទួលប្រាក់ចំណូល ៦០០កោដវ៉ុន បន្ទាប់ពីមានការចេញច្បាប់ ហាមមិនឲ្យធ្វើការ Download ខុសច្បាប់។
នៅក្នុងឆ្នាំ ២០០៩ ផលិតកម្ម SM ដែលជាភ្នាក់ងារទេពកោសល្យចំរៀង ដ៏ធំជាងគេបង្អស់ នៅក្នុងប្រទេសកូរ៉េ បានបង្កើតគេហទំព័រជាផ្លូវការ នៅក្នុង Youtube ដើម្បីចេញនូវវីដេអូ បទចំរៀងថ្មីៗ និងផ្សព្វផ្សាយអំពីការប្រគុំតន្ត្រី និង ការសម្តែងផ្សេងៗរបស់អ្នកសិល្បៈ។
មួយវិញទៀតក្រុមហ៊ុន ក៏បានអញ្ជើញ អ្នកនិពន្ធបទចំរៀង និងអ្នកបង្ហាត់ក្បាច់រាំ នៅអឺរ៉ុប និង សហរដ្ឋអាមេរិក ហើយក៏បានជ្រើសរើស យុវ័យដែលមកពីបណ្តាប្រទេសនៅក្នុងអាស៊ី ដើម្បីធ្វើការប្រកួតប្រជែងគ្នា ដើម្បីឲ្យក្លាយជាតារាចំរៀងនៅប្រទេសកូរ៉េផងដែរ។
ការប្រគុំតន្រ្តី ក្នុងខែមិថុនា ក្នុងទីក្រុងប៉ារីស ដែលបានចូលរួម ដោយសិល្បករ សិល្បៈការិនី នៅក្នុងផលិតកម្ម SM ដូចជា ក្រុម SHINee , Super Junior ព្រមទាំង Girl´s generation មានទស្សនិកជនគាំទ្រ ចូលរួមទស្សនាចំនួន ១៤.០០០ នាក់។
លោក គីម យ៉ុងមីន ដែលជាអគ្គនាយក នៃផលិតកម្ម SM បានមានប្រសាសន៏ថា "ការគាំទ្រពី ទស្សនិកជននៅប៉ែកខាងអឺរ៉ុបធ្វើឲ្យពួកយើងមានការភ្ញាក់ផ្អើល ជាអនេក។ "បច្ចុប្បន្ន ពួក យើងមានអារម្មណ៏ថា មានទំនុកចិត្តខ្លាំងជាងមុន ក្នុងការចាប់យកទីផ្សារ បទចំរៀងនៅប្រទេសអឺរ៉ុប ម្តងបន្តិចៗ"។
លោក គីម បានប្រាប់ទីភ្នាក់ងារ សារពត៌មាន AFP ក្នុងការសម្ភាសន៏ថា ការផ្សព្វផ្សាយបទ ចំរៀង នៅតាមអ៊ីនធើណេតអាចឲ្យមានការ ថតចម្លងបទចំរៀងដោយខុសច្បាប់ ផ្ទុយទៅវិញការធ្វើបែបនេះ ឲ្យធ្វើឲ្យបទចំរៀងរបស់យើងមានកេរ្តិ៍ឈ្មោះល្បីល្បាញ និងមានការគាំទ្រ យ៉ាងឆាប់រហ័ស "។
គាត់បានបញ្ជាក់ទៀតថា គាត់សង្ឃឹមនឹងចេញអាល់ប៊ុមបទចំរៀង ជាភាសាអង់គ្លេសនៅអឺរ៉ុប និងដើម្បីធ្វើជាដៃគូជាមួយ នឹងក្រុមហ៊ុនទូរស័ព្ទដៃ ដូចជា Apple ឬ Nokia ជាដើម ៕

ការប្រកួតរវាងជើងឯកប្រឺមីញេលីក និងជើងឯកហ្វាខាប់ តើក្រុមណាជាម្ចាស់ជើងឯក Community Shield ឆ្នាំ2011 មុនការបើករដូវកាលនេះ

ការប្រកួតបាល់ទាត់ដណ្តើមពានរង្វាន់ អង់គ្លេស Community Shield នៅរាត្រីថ្ងៃអាទិត្យនេះ គឺជាការជួបគ្នារវាងក្រុមជើងឯកFA Cup Man City និងក្រុមជើងឯកប្រឺមីញេលីក Man Utd នៅក្នុងពហុកីឡដ្ឋាន Wembley ។ តើក្រុម Man Utd អាចរក្សាពានរង្វាន់ Community Shield ដែលកំពុងស្ថិតក្នុងដៃរបស់ខ្លួនបានទេ?

Man City V Man Utd

Man City គឺជាក្រុមម្ចាស់ជើងឯក FA Cup បន្ទាប់ពីផ្តួលក្រុម Stoke City 1-0 ។ ប្រវត្តិក្នុងការប្រកួតពានរង្វាន់ Community Shield ក្រុម Man City ធ្លាប់ទទួលបានពានរង្វាន់ចំនួន៣ដងតាំងពីឆ្នាំ១៩៣៧, ១៩៦៨ និង១៩៧២។ បញ្ចប់រដូវកាលអង់គ្លេសប្រឺមីញេលីកក្រុម Man City ស្ថិតនៅលំដាប់លេខ3ក្នុងតារាង។ លទ្ធផល5ប្រកួតចុងក្រោយគឺ 4-1-0។ បីប្រកួតចុងក្រោយគឺលេងឈ្នះ Whitecaps 2-1 ស្មើ Los Angeles 1-1 បន្ទាប់មកលេងឈ្នះInter 3-0 ក្នុងការប្រកួតក្លឹបមិត្តភាពក្រៅផ្ទះទាំង3ប្រកួត។

Man Utd គឺជាក្រុមគ្រងជើងឯកអង់គ្លេសប្រីមីញេលីក ហើយជាក្រុមការពារជើងឯកពានរង្វាន់ Community Shield នេះដែរ។ ក្រុម Man Utd ធ្លាប់ទទួលបានពានរង្វាន់ Community Shield ចំនួន18ដង។ លទ្ធផល5ប្រកួតក្លឹបមិត្តភាពចុងក្រោយគឺ 5-0-0 ។ បីប្រកួតចុងក្រោយគឺលេងឈ្នះ Sealte 7-0 ឈ្នះ Chicago 3-1 និងឈ្នះBarcelona 2-1 ក្រៅផ្ទះទាំងបីប្រកួត។ ប្រវត្តិជួបគ្នា 10ប្រកួត Man Utd ឈ្នះ6 Man City ឈ្នះ3 ស្មើ1។

ជួបគ្នា 4ប្រកួតចុងក្រោយគឺ៖
04-10 Man City 0-1 Man Utd
11-10 Man City 0-0 Man Utd
02-11 Man Utd 2-1 Man City
04-11 Man City 1-0 Man City

Labels

Saturday, August 6, 2011

Man City V Man Utd