ភ្នំពេញ: អ្នកចម្រៀងល្បីល្បាញលោក ខេមរៈ សិរីមន្ត និងប្អូនស្រី ខេមរៈ ស្រីពៅ បានដឹកដៃគ្នា ចាកចេញពីប្រទេសកម្ពុជាហើយ កាលពីរាត្រីថ្ងៃទី១៧ ខែសីហា ឆ្នាំ២០១១ កាលពីម៉ោងជាង១០យប់ ដើម្បីចេញទៅសម្ដែងលើកទីមួយ នៅឯសហរដ្ឋអាមេរិក ចំនួនបីខែ។
តាមគម្រោងលោក ខេមរៈ សិរីមន្ត និងប្អូនស្រី ត្រូវចាកចេញទៅសម្ដែងនៅសហរដ្ឋអាមេរិក តាំងពីអំឡុងខែកក្កដាមកម្ល៉េះ។ ប៉ុន្តែដោយសារលោក មានសកម្មភាពថតបទចម្រៀងថ្មី និងជាប់ច្រៀងច្រើននៅស្រុកខ្មែរ ទើបដំណើរនោះ ត្រូវពន្យារដល់ខែសីហានេះ។ទោះយ៉ាងណា កាលពីរាត្រីយប់ថ្ងៃទី១៧សីហា ឆ្នាំ២០១១ លោក ខេមរៈ សិរីមន្ត និងប្អូនស្រី បានឡើងយន្តហោះ ចេញផុតពីទឹកដីកំណើតហើយ ដោយមានការជូនដំណើរពីសំណាក់សាច់ញាតិ និងសិល្បករពីរបីនាក់ ។ ក្នុងនោះរួមមាន កញ្ញា ពៅ លីដា ជាដើម។
លោកខេមរៈ សិរីមន្ត ដែលបានចាកចេញទៅសម្ដែងនៅសហរដ្ឋអាមេរិក តាមគម្រោងនោះ បានថ្លែងនៅប៉ុន្មាននាទី មុនឡើងយន្តហោះថា លោកចាកចេញទៅអាមេរិក រហូតដល់បីខែលើកនេះ គឺដោយសារតែសម្អាងថា ការងារសិល្បៈរបស់លោកនៅស្រុកខ្មែរ មិនសូវមមាញឹក នៅក្នុងរដូវវស្សា។
អ្នកចម្រៀងវ័យ ២៥ឆ្នាំ ដែលគ្រងតំណែង ជាអ្នកចម្រៀងយុវវ័យល្បីឈ្មោះប្រចាំផលិតកម្មសាន់ដេ លោក ខេមរៈ សិរីមន្ត បានលើកឡើងថា «នេះជាលើកទីមួយ ដែលខ្ញុំទទួលច្រៀងនៅអាមេរិក ហើយតាមពិតមានសំណើមកពីខាងអាមេរិកច្រើនលើកមកហើយ ប៉ុន្តែដោយសារតែខ្ញុំ មិនសូវទំនេរ ទើបទទួលមិនកើត»។
លោក សិរីមន្ត អះអាងថា មូលហេតុ ដែលចេះតែខកខាន មិនបានដំណើរចេញទៅកើបប្រាក់នៅប្រទេសដ៏រីកចម្រើននោះ គឺដោយសារតែខាង Sponsor នៅអាមេរិក ច្រើនទាមទារយកទៅច្រៀងយូរៗខែពេក។ រយៈពេលត្រឹមបីខែនេះ ត្រូវបានលោកអះអាងថា គឺរយៈពេលតិចបំផុត ដែលអ្នកនៅអាមេរិក បានស្នើឡើង ដោយខាងសមាគម។ ដូច្នេះហើយ ទើបលោកត្រូវពន្យារពេលរង់ចាំឲ្យដល់រដូវភ្លៀង ដែលនៅស្រុកខ្មែរ មិនសូវសំបូរការប្រគុំតន្ត្រីតាមខេត្តក្រុង ទើបលោកទទួលយក។ដំណើរទៅច្រៀននៅអាមេរិក ជាផែនការចេញសម្ដែង ក្នុងគម្រោងប្រមូលប្រាក់ដាក់មូលនិធិមួយ ដើម្បីជួយដល់ក្មេងកំព្រា ដោយការងារសម្ដែងយ៉ាងហោចណាស់ ក៏មានពីរលើកដែរ នៅរៀងរាល់ចុងសប្ដាហ៍។
អ្នកចម្រៀងពីរនាក់បងប្អូន ក្នុងត្រកូលខេមរៈ នៅមិនទាន់រំពឹងថា ការចេញសម្ដែងរបស់ពួកគេ នឹងទទួលជោគជ័យជាវិជ្ជមានដល់កម្រិតណាឡើយ បើទោះជាការសម្ដែងរួមគ្នានេះ នៅក្នុងទឹកដីអូស្ត្រាលី កាលពីឆ្នាំ២០០៩ បានទទួលជោគជ័យកប់ក្ដោងក៏ដោយ។
លោក ខេមរៈ សិរីមន្ត បានបន្ថែមថា «ចំពោះរឿងជោគជ័យ គឺខ្ញុំសង្ឃឹម ប៉ុន្តែត្រង់ថា បានប៉ុន្មាននោះ គឺមិនទាន់ដឹងទេ ព្រោះខ្ញុំមិនដឹងថា ទីផ្សារបទចម្រៀងរបស់ខ្ញុំ នៅទីនោះ(អាមេរិក) គឺយ៉ាងម៉េចទេ?»។
ទោះយ៉ាងណា ផ្អែកតាមការទទូចហើយទទូចទៀតពីសំណាក់ខាងសមាគមអ្នកនៅអាមេរិក គឺបញ្ជាក់យ៉ាងច្បាស់ថា លោក ខេមរៈ សិរីមន្ត និងប្អូនស្រី ខេមរៈ ស្រីពៅ គឺជាអ្នកចម្រៀងយុវវ័យពីរដួង ដែលបងប្អូនខ្មែរនៅអាមេរិក និយមគាំទ្រខ្លាំង ខណៈដែលបទល្បីៗរបស់លោក ដែលពេញនិយមនៅស្រុកខ្មែរ ក៏ត្រូវពលរដ្ឋខ្មែរនៅអាមេរិក ចេះច្រៀងស្ទាត់មាត់ដូចគ្នា។ នេះបើយោងតាមការបញ្ជាក់ពីតំណាងសមាគម ដែលចុះមកធានាលោក ខេមរៈ សិរីមន្ត និងការបង្ហើបឲ្យដឹងពីពលរដ្ឋខ្មែរមួយចំនួន ដែលប្រកបអាជីវកម្មលក់ថាសចម្រៀង នៅតាមទីផ្សារខ្មែរ ក្នុងទឹកដីអាមេរិក។
លោក ខេមរៈ សិរីមន្ត អះអាងថា លោកនិងប្អូនស្រី មិនត្រឹមតែ ត្រៀមច្រៀងបទល្បីៗ នៅក្នុងស្រទាប់មហាជនខ្មែរនៅក្នុងស្រុកប៉ុណ្ណោះទេ ប៉ុន្តែពួកលោកក៏ត្រៀមបទរាំវង់ រាំក្បាច់ និងបទពីជំនាន់ចាស់មួយចំនួនផងដែរ ដើម្បីឲ្យបងប្អូននៅទីនោះបានរាំកម្សាន្ត និងប្លែកអារម្មណ៍។
អ្នកចម្រៀង ដែលមានដើមកំណើតមកពីខេត្តកំពង់ចាមរូបនេះ ពោលថា «អឺ…! សម្រាប់បទចម្រៀង គឺយើងបានត្រៀមសាច់ភ្លេងខ្លះ សម្រាប់ចាក់ច្រៀង ( បទថ្មី ) ប៉ុន្តែខ្ញុំ និងស្រីពៅ ក៏ហាត់បទចាស់ៗខ្លះដែរ ដើម្បីបំពេញតាមបងប្អូនយើង ដែលពួកគាត់ចូលចិត្តបទបែបរាំកម្សាន្ត»។
លោកមិនទាន់មានគម្រោងបន្តការសម្ដែងឲ្យលើសពីរយៈពេល៣ខែ ឬទទួលការងារចេញច្រៀងបែបនេះ នៅក្នុងប្រទេសណាផ្សេងទៀតទេ ប្រសិនបើត្រលប់មកពីសហរដ្ឋអាមេរិកវិញ ដោយសារត្រូវអ៊ុតមើលការងារជាក់ស្ដែង នៅក្នុងផលិតកម្មសាន់ដេរ និងការងារចេញច្រៀង Concert ក្នុងស្រុកសិន។
ខេមរៈ សិរីមន្ត និងប្អូនស្រី ធ្លាប់ចេញទៅអូស្ត្រាលីតែម្ដងគត់ កាលពីឆ្នាំ២០០៩ បើមិនរាប់ការចេញសម្ដែងថ្នាក់ជាតិតាមប្រទេសជិតខាង ដូចជា ទឹកដីថៃ ក្នុងនាមជាអ្នកចម្រៀងតំណាងប្រទេសកម្ពុជា។ មូលហេតុដែលលោកមានមុខចេញក្រៅប្រទេសតិចតួចបែបនេះ ត្រូវបានគេអះអាងថា ដោយសារតែលោក សិរីមន្ត ប្រកាន់ជំហរឲ្យមានការធានាយកប្អូនស្រីទៅជាមួយ ហើយធ្វើឲ្យម្ចាស់ Sponsor ខ្លះសាញ ក្នុងការអញ្ជើញ។
ប៉ុន្តែអ្នកចម្រៀង ដែលសម្ងំថតតួឯកក្នុងរឿង«ព្រាយដែកគោល» ដែលជិតបញ្ចប់របស់ផលិតកម្មសាន់ដេ លោក ខេមរៈ សិរីមន្ត បែរជាបកស្រាយថា នោះគឺដោយសារតែលោក ជាប់ការងារនៅក្នុងស្រុកច្រើនពេក ទើបទទួលសំណើក្រៅប្រទេសមិនកើត។
មហាជនកំពុងចាំអ៊ុតមើលថា ក្រៅពីស្ពាយភាពជោគជ័យពីអាមេរិក តើខេមរៈ សិរីមន្ត និងខេមរៈ ស្រីពៅ នឹងឱបមកវិញនូវព័ត៌មានស្នេហាពីអាណិកជនខ្មែរ ដែលរស់នៅក្នុងប្រទេសនោះដែរឬទេ? បើអ្នកចម្រៀងទាំងពីរនាក់បងប្អូន សុទ្ធតែអះអាងថា នៅទំនេរបេះដូង និងមានរូបរាងសង្ហា និងស្រស់ស្អាតរៀងៗខ្លួនបែបនេះ ៕
