ពត័មានទាន់ហេតុការណ៍: Aug 4, 2011

Thursday, August 4, 2011

រថយន្តដឹកខ្សាច់ បុកអ្នករត់ម៉ូតូឌុប ស្លាប់ម្នាក់ នៅមុខវិទ្យាល័យ ច្បារអំពៅ

ភ្នំពេញ៖ រថយន្តហ្វុយហ្សូដឹកខ្សាច់មួយគ្រឿង ចំណុះប្រមាណ៧តោនមួយគ្រឿង បានបុកអ្នករត់ ម៉ូតូឌុបម្នាក់ ពីក្រោយបណ្តាលឲ្យស្លាប់ភ្លាមៗ នៅនឹងកន្លែងកើតហេតុ កាលពីម៉ោង ១៩ និង៣០នាទីថ្ងៃពុធ ទី៣ ខែសីហា ឆ្នាំ២០១១ នៅមុខវិទ្យាល័យច្បារអំពៅ សង្កាត់និរោធ ខណ្ឌមានជ័យ។

យោងតាមប្រភពពីសមត្ថកិច្ចបានឲ្យដឹងថា រថយន្តបង្កហេតុជារថយន្តដឹកខ្សាច់ ម៉ាកហ្វុយហ្សូ ពាក់ស្លាកលេខ តាកែវ 3A-0761។ ម៉ូតូជនរងគ្រោះម៉ាកសង់កូរ៉េ ពាក់ស្លាកលេខ ឃ-១៧១៣ ភព១ រីឯជនរងគ្រោះឈ្មោះ នីន ថេក អាយុ ៣៨ឆ្នាំ មានស្រុកកំណើតនៅភូមិព្រែកតាទិន ឃុំស្វាយប្រទាល ស្រុកស្អាង ខេត្តកណ្តាល។

យោងតាមប្រភពពីសាក្សីបានឲ្យដឹងថា នៅមុនពេលកើតហេតុរថយន្តដឹកខ្សាច់បង្កហេតុខាងលើ បើកបរស្របទិសគ្នាជាមួយម៉ូតូជនរងគ្រោះ ពីកើតទៅលិច លុះដល់ចំណុចកើតហេតុ ស្រាប់តែរថយន្តបានជ្រុលទៅបុកម៉ូតូជនរងគ្រោះពីក្រោយពេញទំហឹង បណ្តាលឲ្យជនរងគ្រោះស្លាប់ភ្លាមៗនៅនឹងកន្លែងកើតហេតុ។ រីឯអ្នកបើកបររថយន្តបង្កហេតុបានគេចខ្លួនបាត់ស្រមោល។
ក្រោយពេលកើតហេតុសមត្ថកិច្ចបានទាក់ទងសាច់ញាតិជនរងគ្រោះ មកទទួលយកសពទៅធ្វើបុណ្យតាមប្រពៃណី។ ដោយឡែករថយន្តបង្កហេតុ និងម៉ូតូជនរងគ្រោះត្រូវបានសមត្ថកិច្ចយកទៅរក្សាទុករង់ចាំដោះស្រាយ៕

លុចស៊ីស បុកតាកូម៉ា ហើយជ្រុល ទៅបុកវីវ៉ា របួសធ្ងន់២នាក់

ភ្នំពេញ ៖ គ្រោះថ្នាក់ ចរាចរណ៍ គួរឱ្យរន្ធត់ មួយ រវាងរថយន្ដលុចស៊ីស មួយគ្រឿង បាន ជ្រុលទៅបុករថយន្ដតាកូម៉ា មួយគ្រឿងរួញ ខាងមុខខ្ទេច ហើយអូសទៅបុកម៉ូតូវីវ៉ាមួយ គ្រឿងដែលជិះស្របទិសជាមួយរថយន្ដ តាកូម៉ា បណ្ដាលឱ្យម៉ូតូរមូរចូលក្រោមរថ យន្ដ ធ្វើឱ្យអ្នកបើកម៉ូតូ២នាក់រងរបួសធ្ងន់ កាលពីវេលាម៉ោង១១និង៣០នាទី យប់ថ្ងៃ ទី៣ ខែសីហា ឆ្នាំ២០១១ តាមកំណាត់ផ្លូវ ព្រះមុនីរ៉េត ស្ថិតក្នុងភូមិទ្រា ក្រុមទី៥ សង្កាត់ស្ទឹងមានជ័យ ខណ្ឌមានជ័យ ។

រថយន្ដបង្ក ម៉ាកលុចស៊ីស ៤៧០ ពណ៌ទឹកមាស ពាក់ស្លាកលេខ ភ្នំពេញ 2Q-6165 បើកបរតាមបណ្ដោយវិថីព្រះ មុនីរ៉េត ក្នុងទិសដៅពីលិចឆ្ពោះទៅកើត ដោយបើកពីក្រោយរថយន្ដកុងតឺន័រ។ លុះ ដល់ចំណុចកើតហេតុខាងលើ រថយន្ដលុច ស៊ីស បានបើកវ៉ារថយន្ដកុងតឺន័រ ហៀរចូល ផ្លូវខាងស្ដាំរបស់គេ ក៏បណ្ដាលឱ្យបុករថយន្ដ តាកូម៉ា ពណ៌ទឹកមាស ពាក់ស្លាកលេខ ភ្នំពេញ 2P-0716 ស្របពេលនោះ មានម៉ូតូវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AF-8913 ជិះគ្នា២នាក់ ឪពុក-កូន បើកក្នុងទិសដៅបញ្ច្រាសគ្នា ។

អ្នកបើកបររថយន្ដបង្ក ឈ្មោះ ឡាយ ឆោម ភេទប្រុស អាយុ៤៤ឆ្នាំ មានទីលំនៅ ផ្ទះលេខ 229 Eo ក្រុមទី១០ ផ្លូវលេខ១២៨ សង្កាត់មិត្ដភាព ខណ្ឌ៧មករា ។ ចំណែកម៉ូតូ វីវ៉ាជិះគ្នា២នាក់ ឈ្មោះ រស់ ផលទៀង ភេទប្រុស អាយុ២៤ឆ្នាំ ជិះឌុបឪពុក ឈ្មោះ រស់ លីម អាយុ៥៥ឆ្នាំ មានទីលំនៅភូមិភ្នាត សង្កាត់ស្ទឹងមានជ័យ ខណ្ឌមានជ័យ ។ រថយន្ដតាកូម៉ាបើកបរដោយឈ្មោះ សែម ចាន់រិទ្ធិ ភេទប្រុស អាយុ ៣៦ឆ្នាំ មានទី លំនៅផ្ទះលេខ19Eo ភូមិទ្រា សង្កាត់ស្ទឹង មានជ័យ។

ពេលរថយន្ដលុចស៊ីសបុកតាកូម៉ា ហើយជ្រុលទៅបុកម៉ូតូឱ្យរមូរចូលក្រោមរថយន្ដ អ្នកបើកបរម៉ូតូត្រូវកៀបជាប់ក្រោម រថយន្ដបណ្ដាលត្រូវរយះបាក់ភ្លៅខាងឆ្វេង រងរបួសពេញខ្លួនធ្ងន់ធ្ងរ ចំណែកឪពុកដែល ជិះពីក្រោយខ្ទាតចេញក្រៅ រងរបួសបាក់ក ជើងឆ្វេង ហើយត្រូវបញ្ជូនទៅព្យាបាលនៅ មន្ទីរពេទ្យរុស្ស៊ី។
រថយន្ដទាំងពីរ ត្រូវនគរ បាលការិយាល័យជើងគោក រាជធានីភ្នំពេញ អូសយកទៅរក្សាទុកធ្វើការដោះស្រាយ តាមនីតិវិធីច្បាប់៕

ដើរបាញ់ថ្នាំស្មៅក្នុងចម្ការពោតជាន់មីនផ្ទុះដាច់ជើងទាំង2សា្លប់

ខេត្តប៉ៃលិន ៖ គ្រាប់មីនមួយគ្រាប់ដែលបន្សល់ទុកនៅក្នុងដី តាំងពីសម័យសង្គ្រាមបានផ្ទុះលាន់ឮកក្រើកធ្វើឲ្យប្រជាពលរដ្ឋដែលកំពុង បាញ់ថ្នាំស្មៅនៅក្នុងចំការក្បែរៗនោះ ភ្ញាក់ផ្អើលនាំគ្នាមកចោមរោមមើល ក៏ស្រាប់តែប្រទះឃើញបុរសម្នាក់ឈ្មោះឯក ភ័ព្វ អាយុ៥៩ឆ្នាំ រស់នៅភូមិបឹងត្រកួន ឃុំអូរអណ្តូង ស្រុកសាលាក្រៅ បានរងរបួសធ្ងន់ធ្ងរដាច់ជើងទាំងសងខាង ដោយសារជាន់លើមីន។ ជនរងគ្រោះបានស្លាប់ ខណៈដែលគេកំពុងសែងចេញមិនទាន់ផុតពីចម្ការរបស់ខ្លួនផង។ ហេតុការណ៍អកុសលនេះបានកើតឡើងកាលពីថ្ងៃទី១ សីហា វេលាម៉ោង១១ព្រឹក ស្ថិតនៅចំណុចខាងលិចភ្នំបេង ភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន។

តាមព័ត៌មានពីលោកឆូន ទូច នាយប៉ុស្តិ៍រដ្ឋបាលបរយ៉ាខាបានឲ្យដឹងថា ជនរងគ្រោះបានចេញពីផ្ទះម្នាក់ឯងតាំងពីព្រលឹម ដើម្បីបាញ់ថ្នាំស្មៅក្នុងចំការពោត ដែលគាត់បានដាំអស់រយៈពេលជាង២ខែមកហើយ ដោយសារតែឃើញមានស្មៅដុះឡើងច្រើនពេកនោះ។ លោកនាយប៉ុស្តិ៍រដ្ឋបាលបរយ៉ាខា បន្តថា ក្នុងពេលដែលកំពុងបាញ់ថ្នាំសម្លាប់ស្មៅនោះក៏មានភ្លៀងរលឹម ស្រិចៗដីក្នុងចម្ការទន់ជ្រាយលាយជាមួយភក់ស្អិតផង ចៃដន្យជាហេតុធ្វើឲ្យស្រុតចុះប៉ះដល់គ្រាប់មីនក៏ផ្ទុះឡើងលាន់ឮឡើង កក្រើកអាកាសបណ្តាលឲ្យត្រូវជើងដាច់សើយត្រឹមជង្គង់ទាំង២រងរបួសធ្ងន់ ធ្ងរ។ ដោយសារតែមានការឈឺចាប់ពេកនោះបុរសឈ្មោះឯក ភ័ព្វ ស្រែកហៅគេឯងនៅក្បែរនោះឱ្យជួយ និងបន្តិចក្រោយមកទើបអ្នកចម្ការដូចគ្នាបានរត់មកមើល ហើយបាននាំគ្នាដាក់អង្រឹងសែងចេញមកពីចម្ការបានប្រហែលជា១គីឡូម៉ែត្រ ក៏ស្លាប់ដោយសារតែឈាមហូរចេញមកច្រើនពេកខ្សោះខ្លួន។

លោកនាយប៉ុស្តិ៍បរយ៉ាខា បន្តទៀតថា ពេលកន្លងមកបុរសរងគ្រោះបានមកកាប់រានព្រៃឈូសឆាយដីដាំពោតដោយខ្លួនឯងអស់ រយៈពេលជាងបីឆ្នាំកន្លងមកហើយ មិនដែលប្រទះឃើញមានគ្រាប់មីន ឬគ្រាប់អ្វីផ្សេងទៀតផុសចេញពីក្នុងដីចម្ការនោះទេ ស្រាប់តែនៅថ្ងៃនេះមិនដឹងជាគ្រោះអកុសលអ្វីបានជានៅពេលគាត់ ដើរបាញ់ថ្នាំបានជិតពាក់កណ្តាលចម្ការទៅហើយមីនក៏ផ្ទុះឡើង។ បុរសរូបនេះមកកាប់ឆ្ការដីដាំចម្ការដោយនឹកស្មានថា ប្រហែលជាមិនមានគ្រាប់អ្វីនោះទេ។ តែតាមពិតទៅនៅត្រង់កន្លែងដែលផ្ទុះគ្រាប់មីននោះ កាលពីមុនជាតំបន់ក្តៅ ព្រោះនៅជិតព្រំដែនកម្ពុជា-ថៃជាសមរភូមិជួរមុខមានមីនច្រើន ដែលបន្សល់ទុកនៅក្នុងដី។

នៅក្នុងចម្ការរបស់បុរសដែលស្លាប់នេះ អាចនឹងមានគ្រាប់ដែលកប់ក្នុងដីមិនទាន់ផ្ទុះជាច្រើនទៀត សូមបញ្ជាក់ថា បុរសដែលជាន់មីនស្លាប់នេះមិនមានប្រពន្ធកូននោះទេ រាល់ថ្ងៃរស់នៅជាមួយនឹងបងប្អូនតែប៉ុណ្ណោះ៕

ជនទុរយសរំលោភកូនស្រីបានកូនមួយទើបបែកការណ៍

ខេត្តកំពង់ឆ្នាំង ៖ រឿងអាស្រូវមួយបានបែកធ្លាយកាលពីព្រឹកថ្ងៃទី៣ សីហា គឺរឿងឪពុកបង្កើតរំលោភកូនស្រីឯង រហូតមានផ្ទៃពោះ និងកើតបានកូនប្រុសម្នាក់អាយុ៧ថ្ងៃ។ នេះជារឿងដ៏កម្រនិងគួរឱ្យស្អប់ខ្ពើម ដែលបុរសអគតិម្នាក់មិនចាត់ទុកខ្លួនឯងជាមនុស្សមាន វិចារណញ្ញាណបែរជាមកប្រព្រឹត្តអំពើដូចសត្វ ហើយត្រូវបានមន្ត្រីប៉ូលិសការិយាល័យព្រហ្មទណ្ឌកម្រិតធ្ងន់ ខេត្ត ចុះធ្វើការសាកសួរនិងឃាត់ខ្លួនជនសង្ស័យជាឪពុកកញ្ចាស់យកមក កាន់ស្នងការដ្ឋានខេត្ត ដើម្បីកសាងសំណុំរឿងបញ្ជូនទៅតុលាការតាមនីតិវិធីច្បាប់ ។

បុរសជាឪពុកចិត្តជាសត្វតិរច្ឆាននេះ ឈ្មោះស្រី ឆន អាយុ៧៣ឆ្នាំ ជាបុរសពោះម៉ាយយូរឆ្នាំ ចំណែកកូនស្រីឈ្មោះស្រី គីមហៀង អាយុ២៧ឆ្នាំ ទាំងពីរនាក់ឪពុក និងកូនមានទីលំនៅភូមិទួលរកា ឃុំមេលំ ស្រុកបរិបូណ៌ ។ តាមនាងជាកូនស្រីបានរៀបរាប់ថា នាងមិនចាំខែថ្ងៃទេ តែតាមស្មានប្រហែលជា១០ខែមុន ឪពុកនាង ស្រវឹងស្រាយ៉ាងខ្លាំង ហើយពេលត្រឡប់មកផ្ទះក្នុងពេលយប់ជ្រៅបន្តិច ក៏បានចាប់នាងរំលោភរហូតបានសម្រេច លុះក្រោយៗមកក៏ចាប់នាងរំលោភបែបនេះចំនួន៣ដងទៀត ។ ក្រោយមក នាងដឹងខ្លួនថាមានផ្ទៃពោះក៏ប្រាប់ឪពុក ពេលនោះឪពុកបានប្រាប់ឱ្យនាងទៅរំលូតកូនចេញ ប៉ុន្តែកាលណោះនាងគ្មានលុយ ក៏ចេះតែទុករហូតកើតបានកូនប្រុសមួយដែលគិតត្រឹមថ្ងៃទី៣ សីហា មានអាយុ៧ថ្ងៃហើយ ។

ចំណែកបុរសជាឪពុករូបនេះបានឆ្លើយថា ដោយរូបគាត់ស្រវឹង ហើយភ្លេចភ្នាំងស្មារតីក៏បានចាប់កូនស្រីរំលោភរហូតបានសម្រេច និងក្រោយៗមកទៀតក៏ចេះតែប្រព្រឹត្តបែបនេះបានចំនួន៤ដង។ ពេលនាងមានផ្ទៃពោះបានមកប្រាប់គាត់ដែរ តែគាត់មិនជឿ លុះដល់ដឹងច្បាស់គឺ៦ខែទៅហើយ តែដោយគ្មានលុយយកកូនចេញ ក៏ចេះតែទុកទៅ ។

មន្ត្រីប៉ូលិសមូលដ្ឋាននិយាយថា ផ្ទះគ្រួសារនេះមានកូន៣នាក់ និងឪពុកម្នាក់ ប៉ុន្តែកូន២នាក់បានបែកចេញអស់ទៅនៅសល់តែកូនស្រីរងគ្រោះ និងឪពុកដែលផ្ទះមួយរស់នៅតែពីរនាក់ឪពុក និងកូនស្រី ។ អ្នកជិតខាងបានលើកជាសំណួរថា ផ្ទះមានតែ២នាក់ពេលនេះឪពុកជាប់គុក ចុះកូនស្រីដែលមានកូនខ្ចី៧ខែបាននរណាមើលថែ ម្យា៉ងនាងមានសតិមិនប្រក្រតីទៀត៕

បោះពួយឡិចស៊ីសឡើងចិញ្ចើមផ្លូវបុកដើមលឿងរាជ និងបង្គោលភ្លើងបាក់ជាពីរកំណាត់

រាជធានីភ្នំពេញ ៖ កាលពីវេលាម៉ោង២រំលងអធ្រាត្រឈានចូលថ្ងៃទី៤ សីហា នៅមុខស្នាក់ការភូមិគោករកា សង្កាត់ចាក់អង្រែក្រោម ខណ្ឌមានជ័យ មានរថយន្តឡិសស៊ីស៤៥០ ពណ៌ខ្មៅ ពាក់ស្លាកលេខ ភ្នំពេញ 2L-8506 បើកបោះពួយលឿនដូចហោះឡើងលើខឿនថ្នល់ ទៅបុកកន្លែងដាក់តាំងលក់ក្បឿង រួចជ្រុលទៅបុកស្លាកសញ្ញាហាមចតរលំ ហើយបន្តទៅបុកដើមលឿងរាជរលើងទាំងឫស មិនអស់ចិត្តទៀតជ្រុលទៅបុកបង្គោលភ្លើងបំភ្លឺតាមផ្លូវបាក់ដួល រាបដល់ដីជាពីកំណាត់ ចំណែករថយន្តក្រឡាប់បះផ្ងារជើងតែម្តង ធ្វើឱ្យអ្នកជិះក្នុងរថយន្តរងរបួសធ្ងន់៤នាក់។

ប្រភពព័ត៌មានពីសមត្ថកិច្ចបានឱ្យដឹងថា រថយន្តឡិចស៊ីស៤៥០ ពណ៌ខ្មៅ បើកតាមបណ្តាយផ្លូវជាតិលេខ២ ពីរាជធានីភ្នំពេញ ឆ្ពោះទៅក្រុងតាខ្មៅ បើកបរដោយឈ្មោះបូរ៉ា ភេទប្រុស អាយុ៣១ឆ្នាំ ជាបុគ្គលិករោងចក្រជុងវ៉ាថ្មី មានទីលំនៅភូមិថ្មី សង្កាត់តាខ្មៅ ក្រុងតាខ្មៅ មានអ្នករួមដំណើរជាមួយ៥នាក់ ប៉ុន្តែទាំងអ្នកបើកបរ និងអ្នករួមដំណើរម្នាក់ៗសុទ្ធតែស្រវឹងជោក។

ប្រភពព័ត៌មានបន្តថា ខណៈពេលរថយន្តមកដល់ចំណុចមុខផ្ទះលក់ក្បឿង និងគ្រឿងសំណង់គ្រប់ប្រភេទ មិនដឹងយ៉ាងម៉េចស្រាប់តែរថយន្តជ្រុលចង្កូតទៅឡើងលើគម្របលូ រួចឡើងលើខឿនជ្រុលទៅបុកកន្លែងដាក់តាំងលក់ក្បឿង នៅមុខផ្ទះជ្រុះរាយប៉ាយរួចជ្រុលទៅបុកស្លាកសញ្ញាហាមចតរលំដួល ហើយជ្រុលទៅបុកដើមលឿងរាជរលើងទាំងឫស បន្ទាប់មកជ្រុលទៅបុកបង្គោលភ្លើងសម្រាប់បំភ្លឺតាមផ្លូវ សាធារណៈដួលរាបដល់ដីបាក់ជាពីរកំណាត់ ដោយផ្នែកខាងចុងបង្គោលវាត់ទៅត្រូវប្រអប់កុងទ័រភ្លើងជ្រុះ៤ ប្រអប់ទៀតផង។

សាក្សីឃើញហេតុការណ៍បុកនោះបន្តថា អ្នកបើកបរទំនងស្រវឹង ហើយងោក ទើបបើករថយន្តក្នុងល្បឿនលឿនបុករះបែបនេះ និងបណ្តាលឱ្យរថយន្តក្រឡាប់ផ្ងារជើងតែម្តង។ អ្នករួមដំណើរក្នុងរថយន្តរងរបួស៤នាក់ ត្រូវបញ្ជូនទៅព្យាបាលនៅគ្លីនិកចាក់អង្រែក្រោមហៅមន្ទីរ ពេទ្យបាយក្តាំង។
សមត្ថកិច្ចបានបង្ហើបឱ្យដឹងថា បុកបង្គោលភ្លើងមួយដើមត្រូវសង១.៥០០ដុល្លារ គុណនឹងពីរ ចំណែកដើមលឿងរាជ១ដើម ត្រូវសង៧០០ដុល្លារ គុណនឹង២ ដោយឡែករថយន្តឡិចស៊ីសត្រូវស្ទូចយកទៅរក្សាទុកនៅសាលារាជធានីភ្នំពេញ ដើម្បីដោះស្រាយ៕

គ្រោះថ្នាក់ចរាចរណ៍កណ្តាលទន្លេកាណូតបុកកូនទូកបុរសម្នាក់របួសធ្ងន់

ខេត្តកំពង់ឆ្នាំង ៖ បុរសម្នាក់បានរងរបួសធ្ងន់ធ្ងរ ដោយសារបាក់ឆ្អឹងជំនីរក្នុងហេតុការណ៍ដ៏កម្រមួយ គឺកាណូតបុកទូកដែលហេតុការណ៍នេះបានកើតឡើងនៅវេលាម៉ោង៧និង៣០ នាទីយប់ ថ្ងៃទី២០ កក្កដា នៅត្រង់ចំណុចភូមិពាមខ្នង ឃុំផ្លូវទូក ស្រុកកំពង់លែង ខណៈដែលបុរសរងគ្រោះអុំទូកជាមួយកូនប្រុសអាយុ១១ឆ្នាំ មកពីលេងប្អូនវិញ ។

តាមការរៀបរាប់របស់ក្រុមគ្រួសារដែលបាននាំជន រងគ្រោះឈ្មោះហេង អិុត អាយុ៥៨ឆ្នាំ រស់នៅភូមិថ្នល់ឈើទាល ឃុំផ្លូវទូក ស្រុកកំពង់លែង។ ប្រភពបានបន្តថា មុនពេលកើតហេតុជនរងគ្រោះបានអុំទូកត្រឡប់ពីផ្ទះប្អូនប្រុស វិញ ជាមួយកូនប្រុសម្នាក់ទៀត លុះមកដល់ចំណុចកើតហេតុក៏ត្រូវកាណូតមួយគ្រឿង បានបុកចំទទឹងទូក និងចំជនរងគ្រោះដែលអង្គុយកណ្តាលទូក បណ្តាលឱ្យរងរបួសធ្ងន់ ប៉ុន្តែទូកមិនបណ្តាលឱ្យលិចទេ ព្រោះពេលបុកនោះទូកបានររេទៅទិសស្របគ្នា ។ ក្រោយពេលកើតហេតុក្រុមគ្រួសារបានយកជនរងគ្រោះមកមន្ទីរពេទ្យ បន្ទាប់ពីពិនិត្យរួចគ្រូពេទ្យប្រាប់ថា ជនរងគ្រោះបាក់ឆ្អឹងជំនីរ៣ ក្នុងនោះមានមួយបាក់៣កំណាត់ ។

អ្នក បើកបរកាណូតដែលបង្កគ្រោះថ្នាក់នោះឈ្មោះហម សារីុម អាយុ៣៩ឆ្នាំ បានមកពិនិត្យមើលជនរងគ្រោះក្នុងមន្ទីរពេទ្យ និងបានសន្យាថា នឹងជួយចេញថ្លៃព្យាបាល ព្រោះការបណ្តាលឱ្យមានគ្រោះថ្នាក់នេះដោយសារតែយប់ងងឹតទើបបើក បុកដោយអចេតនា៕

Labels