រាជធានីភ្នំពេញ ៖ បុរសម្នាក់ឈ្មោះយ៉ែម សំបូរ អាយុ៤៧ឆ្នាំ មានទីលំនៅក្នុងភូមិជ្រោយអំពិល សង្កាត់ក្បាលកោះ ខណ្ឌមានជ័យ បានស្លាប់បាត់បង់ជីវិតយ៉ាងអាណោចអាធ័មក្នុងឧប្បត្តិហេតុ គ្រោះថ្នាក់ចរាចរណ៍មួយដែលបានកើតឡើងនៅលើកំណាត់ផ្លូវជាតិលេខ១ ក្បែរវត្តចំប៉ា ស្ថិតនៅក្នុងភូមិសាស្ត្រសង្កាត់ក្បាលកោះ ខណ្ឌមានជ័យ កាលពីវេលាម៉ោង៧និង២០នាទីយប់ថ្ងៃទី៤ សីហា ឆ្នាំ២០១១ ។
តាមប្រភពព័ត៌មាននៅកន្លែងកើតហេតុ បានឱ្យដឹងថា មុនពេលហេតុការណ៍គ្រោះថ្នាក់កើតឡើងជនរងគ្រោះឈ្មោះយ៉ែម សំបូរ បានជិះម៉ូតូមា៉កចាំបូ ពណ៌ខ្មៅមួយគ្រឿង ធ្វើដំណើរម្នាក់ឯងលើកំណាត់ផ្លូវជាតិលេខ១ ក្នុងទិសដៅពីលិចទៅកើតក្នុងល្បឿនលឿនគួរសមដែរ ។ ពេលនោះម៉ូតូជនរងគ្រោះបានជ្រុលល្បឿនទៅបុកបុរសម្នាក់ដែល កំពុងឈរនោមនៅលើចិញ្ចើមផ្លូវ បណ្តាលឱ្យឈ្មោះយ៉ែម សំបូរ ដួលបោកក្បាលស្លាប់ខ្លួនឯងភ្លាមៗនៅនឹងកន្លែង ។ ចំណែកឯបុរសឈរនោមតាមផ្លូវនោះបានរងរបួសធ្ងន់ធ្ងរគួរសមដែរ ។
តាមប្រភពព័ត៌មានដដែលបានឱ្យដឹងបន្តទៀតថា នៅកន្លែងកើតហេតុនោះជាតំបន់ងងឹត គ្មានភ្លើងអគ្គិសនីបំភ្លឺផ្លូវទេ គួបផ្សំម៉ូតូជនរងគ្រោះជិះនោះភ្លើងមិនសូវភ្លឺផង ក៏បុកអ្នកឈរនោម បណ្តាលឱ្យមានគ្រោះថ្នាក់បែបនេះទៅ។
តាមប្រភពព័ត៌មានពីក្រុមមន្ត្រីនគរបាលដែល ចុះទៅអន្តរាគមន៍បាននិយាយថា ឈ្មោះយ៉ែម សំបូរ ស្រវឹងស្រា ចំណែកឯបុរសដែលឈប់ជុះនោមតាមផ្លូវនោះក៏ស្រវឹងស្រាដែរ ទើបឈប់ម៉ូតូជុះនោមតាមផ្លូវមិនរកកន្លែងត្រឹមត្រូវក៏ជួប គ្រោះថ្នាក់ដោយចៃដន្យទាំងអស់គ្នា ។ ករណីខាងលើនេះសមត្ថកិច្ចបានចុះវាស់វែងដកហូតម៉ូតូយកមក រក្សាទុកនៅការិយាល័យជំនាញចំណុះស្នងការដ្ឋាននគរបាល រាជធានីភ្នំពេញ ដើម្បីចាត់ការតាមច្បាប់៕
