អ្នក ស្រាវជ្រាវ គ្រាន់តែ ទូន្មាន មនុស្ស គ្រប់ គ្នា ចូរ បន្ថយបរិមាណ សាច់ ក្រហម ក្នុង របប អាហារ ប្រចាំថ្ងៃ គឺ មិន ត្រូវ បោះបង់ ទាំងស្រុង ឡើយ
ភ្នំពេញ:អ្នកដែលទទួលទានសាច់ក្រហមច្រើនប្រឈមនឹងការកើត មហារីកក្រលៀនខ្ពស់ជាង១៩ភាគរយ ធៀបនឹងធម្មតា ។ នេះជាលទ្ធផលស្រាវជ្រាវទើបត្រូវបានប្រកាសរបស់ពួកអ្នកវិទ្យាសាស្ត្រ អាមេរិក ។
ជនជាតិអាមេរិក៥០០.០០០ នាក់ មានអាយុពី៥០ឆ្នាំឡើង ត្រូវបានអញ្ជើញឱ្យចូលរួមស្រាវជ្រាវតាមដានអំពីទម្លាប់ទទួលទាន, រួមមានទាំងកម្រិតប្រើប្រាស់សាច់ក្នុងរយៈពេល៩ឆ្នាំ ។ លទ្ធផលចុងក្រោយ គឺមានមនុស្សប្រមាណ១.៨០០នាក់ ត្រូវបានវិនិច្ឆ័យកើតមហារីកក្រលៀន ។
ជាមធ្យមបុរសដែលចូលរួមក្នុងការស្រាវជ្រាវទទួលទានប្រមាណ ពី៥៧-៨៧ក្រាមសាច់ក្រហមក្នុងមួយថ្ងៃ ក្នុងពេលស្ត្រីទទួលទានតែពី២៨-៥៧ ក្រាម ។ របាយការណ៍ស្ថិតិក៏បង្ហាញឱ្យឃើញថា អ្នកដែលទទួលទានសាច់ក្រហមខ្ពស់បំផុត(ប្រមាណ១១៤ក្រាមក្នុងមួយថ្ងៃ) ត្រូវបានវិនិច្ឆ័យលទ្ធភាពកើតមហារីកក្រលៀនខ្ពស់ជាង១៩ភាគ រយ ធៀបនឹងអ្នកទទួលទានតិចបំផុត (ប្រមាណ២៨ក្រាម) ។ ការស្រាវជ្រាវនេះបានគិតទៅ ដល់កត្តាទូទៅផ្សេងៗធ្វើឱ្យកើនគ្រោះថ្នាក់ជំងឺដូចជា ៖ របបទទួលទាន, របៀបរបបរស់នៅ, អាយុ, ជាតិសាសន៍, ទម្លាប់ជក់បារី, ផឹកស្រា ឬជំងឺលើសឈាម, ទឹកនោមផ្អែម…។
របាយការណ៍មួយថ្មីៗនេះដែរនៅលើទស្សនាវដ្តីជីវជាតិអាមេរិក នៅចង្អុលបង្ហាញថា មានបរិមាណសារជាតិគីមីពុលដ៏ច្រើនត្រូវបានរកឃើញនៅក្នុងពពួកសាច់ អាំងពណ៌ក្រហម ។ ហើយនេះក៏ជាមូលហេតុធ្វើឱ្យកើនគ្រោះថ្នាក់មហារីក ។ មិនត្រឹមតែប៉ុណ្ណឹងទេ, ការទទួលទានសាច់ក្រហមច្រើន នៅបង្កជាបញ្ហាសុខភាពមួយចំនួនទៀត ពិសេសគឺធ្វើឱ្យកើនផ្ទាំងច្បាមប្រមូលផ្តុំក្នុងគែមសរសៃឈាម ។
ថ្វីត្បិតដូច្នោះ, ពួកអ្នកស្រាវជ្រាវគ្រាន់តែទូន្មានមនុស្សគ្រប់គ្នាចូរបន្ថយបរិមាណ សាច់ក្រហមក្នុងរបបអាហារប្រចាំថ្ងៃ គឺមិនត្រូវបោះបង់ទាំងស្រុងឡើយ ។ “ព្រោះសាច់ក្រហមជាប្រភពចាំបាច់ផ្គត់ផ្គង់ដែកនិងប្រូតេអ៊ីន”, បណ្ឌិត Mohammed El- faramawi មានប្រសាសន៍ ។
ទន្ទឹមនោះ ដើម្បីរារាំងបរិមាណសារជាតិគីមីកើតមានក្នុងដំណាក់កាលកែច្នៃសាច់, អ្នកជំនាញការជីវជាតិមួយរូបក៏ទូន្មានថា មិនត្រូវអាំងសាច់ផ្ទាល់លើអណ្តាតភ្លើង ឬលើផ្ទៃលោហៈក្តៅ ត្រូវបំព្រួញពេលវេលាចម្អិននិងប្រើម៉ាយក្រូវ៉េវដើម្បីចម្អិនសាច់ មុនពេលយកទៅច្នៃនៅសីតុណ្ហភាពខ្ពស់ ៕
