មុំបី-ព្រះវិហារ: អនុវត្ដតាមបទបញ្ជាដ៏ខ្ពង់ខ្ពស់របស់សម្ដេចតេជោ ហ៊ុន សែន និងតាមការណែនាំផ្ទាល់ពីគណៈបញ្ជាការឯកភាពសមរភូមិមុខ, នាយទាហាន និងពលទាហានមួយកងវរសេនាធំ ចំណុះឱ្យយោធភូមិភាគទី១ ដែលត្រូវបានចាត់តាំងឱ្យប្រចាំការនៅមុំបីទិសប្រាសាទព្រះវិហារ ត្រូវបានដកឱ្យវិលត្រឡប់ទៅអង្គភាពដើមវិញ។ ពិធីដកទ័ពនោះ បានធ្វើឡើងកាលពីព្រឹកថ្ងៃទី២៦ ខែកក្កដា ឆ្នាំ២០១១ ដោយកងទ័ពកម្ពុជាទាំងនោះ ត្រូវចេញពីចំណុចអូរជុញ ក្នុងស្រុកជាំក្សាន្ដ ខេត្ដព្រះវិហារ ឆ្ពោះទៅកាន់យោធភូមិភាគទី១ ក្នុងខេត្ដស្ទឹងត្រែង។
ពិធីសំណេះសំណាល និងជូនដំណើរនាយទាហាន ពលទាហាន ក្នុងពិធីដកទ័ពនោះ ធ្វើឡើងក្រោមអធិបតីភាព លោកនាយឧត្ដម សេនីយ៍ គន់ គីម អគ្គមេបញ្ជាការរងនាយសេនាធិការចម្រុះកងយោធពលខេមរភូមិន្ទ, លោកនាយឧត្ដមសេនីយ៍ជា តារា អគ្គមេបញ្ជាការរង និងជាប្រធានគណៈបញ្ជាការឯកភាពសមរភូមិមុខទិសយោធភូមិភាគ៤ ព្រមទាំងអស់លោកជា មេបញ្ចាការ មេបញ្ជាការរង កងឯកភាពជួរមុខ ជាច្រើនរូបទៀត ។
ក្នុងសេចក្ដីរាយការណ៍របស់លោកឧត្ដមសេនីយ៍ឯក ហួត ឈាង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី១ បានឱ្យដឹងថា ក្នុងរយៈពេលដែល នាយទាហាន ពលទាហាននៃយោធភូមិភាគទី១ បានមកប្រចាំការនៅទីនេះ បានបំពេញតួនាទីរបស់ខ្លួនយ៉ាងម៉ត់ចត់ត្រឹមត្រូវ តាមការកំណត់របស់ថ្នាក់លើ ជាមួយនឹងភារកិច្ចជាកម្លាំងបម្រុងអន្តរាគមន៍ ត្រៀមប្រយុទ្ធ និងប្រយុទ្ធ ក៏ដូចជាការពង្រឹងប្រព័ន្ធការពារទីតាំងឈរជើងបានយ៉ាងរឹងមាំ។ ទន្ទឹងនឹងនោះដែរ ក្រៅពីការហ្វឹកហាត់ពីមុខជំនាញផ្សេងៗ ដើម្បីបង្កើនសមត្ថភាពជំនាញបម្រើឱ្យការប្រយុទ្ធ អង្គភាពនៅបានចូលរួមចំណែកក្នុងការជួយកសាងហេដ្ឋារចនាសម្ព័ន្ធមួយចំនួន តាមភូមិ ឃុំ ក៏ដូចជាការងារជួយបង្កបង្កើនផល ដាំដំណាំគ្រប់ប្រភេទ និងចូលរួមរៀបចំលំនៅឋាន ជូនប្រជាពលរដ្ឋឱ្យមានសោភណ្ឌភាពល្អសមរម្យផងដែរ។
លោកមេបញ្ជាការបានបញ្ជាក់បន្ថែមថា ជាមួយនឹងការបញ្ចប់កាតព្វកិច្ចបំពេញបេសកកម្មនៅសមរភូមិមុខ ហើយត្រូវបានសម្ដេចប្រមុខរាជរដ្ឋាភិបាលអនុញ្ញាតឱ្យវិលទៅអង្គភាពដើម វិញយ៉ាងដូច្នេះក្ដី ក៏កងកម្លាំងរបស់យោធភូមិភាគទីមួយបានប្ដេជ្ញាចិត្ដយ៉ាងម៉ឺងម៉ាត់ រក្សានូវស្មារតីអង់អាចក្លាហាន រង់ចាំបទបញ្ជាប្រមុខរាជរដ្ឋាភិបាល ដើម្បីវិលត្រឡប់មកកាន់សមរភូមិវិញគ្រប់ពេលវេលាទាំងអស់ ក្នុងស្ថានភាពដែលចាំបាច់ដើម្បីបុព្វហេតុការពារបូរណភាពទឹកដី មិនឱ្យខ្មាំងសត្រូវមករំលោភឈ្លានពានបានមួយមីល្លីម៉ែត្រណាឡើយ។
ចំណែកលោកនាយឧត្ដមសេនីយ៍ គន់ គីម បានពាំនាំការសួរសុខទុក្ខប្រកបដោយសេចក្ដីនឹករលឹកផ្ញើពីសម្តេច តេជោ ហ៊ុន សែន ជូនចំពោះនាយទាហាន ពលទាហានទាំងអស់ របស់វរសេនាធំចំណុះយោធភូមិភាគទីមួយ ដែលបានអនុវត្ដក្នុងពេលបំពេញភារកិច្ចបានយ៉ាងល្អ ព្រមទាំងការគោរពបទបញ្ជារបស់ប្រមុខរដ្ឋាភិបាលបានយ៉ាងម៉ឺងម៉ាត់ ក៏ដូចជាការជួយរែកពុនការងារគ្រួសារកងទ័ពនៅសមរភូមិក្រោយ ដែលប្រការនេះ បានបន្សល់ទុកនូវអនុស្សាវរីយ៍ដ៏ល្អជាមួយគ្រួសារកងទ័ព សមដូចពាក្យថា “កងទ័ព គឺជាកូនចៅរបស់ប្រជាជន ធ្វើអ្វីៗគ្រប់យ៉ាងដើម្បីប្រជាជន។ ពេលនៅឱ្យប្រជាជនស្រឡាញ់ ពេលទៅ ឱ្យប្រជាជននឹក”។
លោកនាយឧត្ដមសេនីយ៍ គន់ គីម បានផ្ដាំផ្ញើដល់កងកម្លាំងទាំងអស់ ពេលវិលត្រឡប់ទៅអង្គភាពដើមវិញ ត្រូវយកចិត្ដទុកដាក់ដល់ការហ្វឹកហ្វឺនរៀនសូត្រ ដើម្បីបង្កើនចំណេះដឹងឱ្យមានសមត្ថភាពពេញលេញ ព្រមទាំងការងារជួយបង្កបង្កើតផល ដល់ក្រុមគ្រួសាររបស់ខ្លួន សំដៅបង្កើនជីវភាពប្រចាំថ្ងៃឱ្យកាន់តែប្រសើរឡើង។
សូមបញ្ជាក់ថា ការសម្រេចចិត្តដកទ័ពមួយផ្នែករបស់កម្ពុជា ចេញពីតំបន់ព្រំដែនព្រះវិហារ កាលពីថ្ងៃទី២៦កក្កដាឆ្នាំ២០១១ បានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីតុលាការយុត្ដិធម៌អន្ដរជាតិទីក្រុងឡាអេ បានចេញសេចក្តីសម្រេច កាលពីថ្ងៃទី១៨ ខែកក្កដា ឆ្នាំ២០១១ ដោយចង្អុលអំពីវិធានការបន្ទាន់ ដែលជាជំហានទី១ នៃការបកស្រាយសាលក្រមថ្ងៃទី១៥ ខែមិថុនា ឆ្នាំ១៩៦២ ទាក់ទងទៅនឹងប្រាសាទព្រះវិហារ។ នោះគឺតុលាការតម្រូវឲ្យមានតំបន់សុវត្ថិភាពគ្មានយោធានៅចំណុច ប្រាសាទព្រះវិហារ ក្នុងទំហំដីជាង ១៧ គីឡូម៉ែត្រក្រឡានៅព្រំដែនកម្ពុជា និងថៃ។ តុលាការក៏បានបង្គាប់ឲ្យភាគីកម្ពុជា និងថៃ ដកទ័ពចេញពីតំបន់គ្មានយោធានោះ ហើយត្រូវទទួលយកអ្នកសង្កេតការណ៍អាស៊ាន ចុះមកកាន់តំបន់គ្មានយោធា។
លោកនាយឧត្តមសេនីយ៍ ជា តារា បានបញ្ជាក់ថា រាជរដ្ឋាភិបាលកម្ពុជា បានចេញសេចក្ដីថ្លែងការណ៍គាំទ្រទាំងស្រុង លើសេចក្ដីសម្រេចរបស់តុលាការឡាអេ ដែលជាការឆ្លើយតបយ៉ាងពេញទំហឹងទៅនឹងការចង់បានរបស់កម្ពុជា ក្នុងការធ្វើឱ្យតំបន់ប្រាសាទព្រះវិហារមានសន្ដិភាព និងមានអ្នកសង្កេតការណ៍អាស៊ានចូលមកក្នុងតំបន់គ្មានកងទ័ពជា បណ្ដោះអាសន្ន និងមានសកម្ម ភាពផ្នែកស៊ីវិលជាប្រក្រតី។
លោកនាយឧត្តមសេនីយ៍ បានបញ្ជាក់ថា កងទ័ពជួរមុខគាំទ្រយ៉ាងពេញទំហឹង ចំពោះជំហររបស់សម្តេចអគ្គសេនាបតីតេជោ ហ៊ុន សែន ក្នុងការដកកងទ័ពទាំងស្រុង ចេញពីតំបន់ប្រាសាទព្រះវិហារ ដែលអាចធ្វើទៅបាន លុះណាមានវត្តមានអ្នកសង្កេតការណ៍ឥណ្ឌូណេស៊ី ដែលគ្រប់ប្រទេសអាស៊ានទាំង ១០ បានអនុម័តកន្លងទៅ មកបំពេញបេសកកម្មរបស់ខ្លួន នៅតំបន់គ្មានកងទ័ពជាបណ្តោះអាសន្ន បូកភាគី កម្ពុជា ថៃ ធ្វើការដកកងទ័ពព្រមៗគ្នា ។
យ៉ាងណាក៏ដោយមេបញ្ជាការ បានបញ្ជាក់ថា ការដកចេញកងទ័ពមួយវរសេនាធំរបស់យោធភូមិភាគទី១ នៅពេលនេះ ជាការបញ្ចប់នូវបេសកកម្មជាកម្លាំងបំរុងអន្តរាគមន៍របស់យោធភូមិភាគទី ១ ដែលនេះ ជាប្រពៃណីរបស់កងយោធពលខេមរភូមិន្ទ ក្នុងការជួយគ្នារវាងកងទ័ព និងកងទ័ព។ កម្លាំងនេះ ជា បំរុងអន្តរាគមន៍ផង ជាកម្លាំងជួយប្រជាជនគ្រួសារទ័ពរបស់កងពលតូចលេខ៩ ដែលចេញទៅឈរ ជើងអនុវត្តសិទ្ធស្វ័យការពារទឹកដីនៅជួរមុខ ក្នុងការងារបង្កបង្កើនផលបំពេញឲ្យជីវភាពក្នុងគ្រួសារ ដែលនេះជាការយកចិត្តទុកដាក់មួយយ៉ាងធំធេងរបស់សម្តចតេជោ និងលោកជំទាវកិត្តិព្រឹទ្ធបណ្ឌិត ៕
