ជនសង្ស័យ ដែលឃាត់ខ្លួន ក្នុងអំពើឃាតកម្ម សម្លាប់អាជីវករ លក់គ្រឿងក្រអូប នៅអូរឫស្សី ពិតជាឃាតកមែន

ភ្នំពេញ ៖ ទីបំផុតការពិនិត្យ កោសល្យវិច័យ ទៅលើវត្ថុតាងមួយចំនួន ពីមន្ដ្រីនគរបាលជំនាញរបស់ ខណ្ឌ៧មករា បានបង្ហាញថា ជនសង្ស័យ ដែលត្រូវបានសមត្ថកិច្ចឃាត់ខ្លួន កាលពីវេលាម៉ោង ១១និង៣០នាទី ព្រឹកថ្ងៃទី២៥ ខែវិច្ឆិកា ឆ្នាំ២០១១ ក្នុងអំពើឃាតកម្មសម្លាប់ស្ដ្រីជា អាជីវករលក់គ្រឿងក្រអូបនៅផ្សារអូរឫស្សីនោះ ពិតជាឃាតកមែន។
មន្ដ្រីនគរបាលជំនាញ បានឱ្យដឹងថា ភស្ដុតាងមួយចំនួន ដែលបញ្ជាក់ថា ជនសង្ស័យរូបនេះគឺជាឃាតក ដោយសារតែទី១ ឈាមដែលប្រឡាក់នៅជាប់ខោគគីរ របស់ជនសង្ស័យ គឺពិតជាឈាមរបស់ជនរងគ្រោះ ទី២ ស្នាមក្រយៅនៅលើខ្លួន របស់ជនសង្ស័យ ពិតជាស្នាមក្រយៅ ដែលជនរងគ្រោះ បានប្រតាយប្រតប់ ទី៣ ផ្ទះជនសង្ស័យនៅជាប់ផ្ទះជនរងគ្រោះ ហើយ ឡើងតាមដំបូល និងទី៤ សមត្ថកិច្ច កំពុងពិនិត្យក្រយៅដៃ របស់ជនសង្ស័យ។ តែទោះជាយ៉ាងណា បើទោះបីមានការ បង្ហាញភស្ដុតាង យ៉ាងដូច្នេះ ប៉ុន្ដែជនសង្ស័យ មិនបានសារភាពនោះទេ ហើយនៅតែប្រកែកដដែល។
សមត្ថកិច្ចបានឱ្យដឹងថា រហូតមកដល់វេលាម៉ោង ១១និង ១០នាទី ព្រឹកថ្ងៃទី២៦ ខែវិច្ឆិកា ឆ្នាំ២០១១នេះ ជនសង្ស័យត្រូវបាន ឃុំខ្លួននៅអធិការនគរបាលខណ្ឌ ៧មករា ដើម្បីសាកសួរបន្ដទៀត ហើយ នាំជនសង្ស័យទៅយកខ្សែដៃ របស់ជនរងគ្រោះ នៅផ្ទះប្រពន្ធរបស់ខ្លួននៅជម្ពូវន្ដ។
បើយោងតាម សមត្ថកិច្ច ជនសង្ស័យរូបនេះ មានឈ្មោះ ម៉ា គីគីន ភេទប្រុស អាយុ ៣២ឆ្នាំ រស់នៅ បន្ទប់លេខ ៤៦ ជាន់ទី៤ សង្កាត់អូរឫស្សី១ ខណ្ឌ ៧មករា ពោលរស់នៅជាប់ផ្ទះជនរង គ្រោះតែម្ដង ។ ជនសង្ស័យរូបនេះបច្ចុប្បន្នមានមុខរបរ មិនពិតប្រាកដ ហើយជាមនុស្សធ្លាប់ជក់ គ្រឿងញៀនទៀតផង ។
សូមបញ្ជាក់ថា ស្ដ្រីឈ្មោះ មាស ស្រ៉ី អាយុ ៤៨ឆ្នាំ រស់នៅតែម្នាក់ឯង ក្នុងបន្ទប់ ជាន់ទី៦ តាមបណ្ដោយផ្លូវលេខ ១៦៨ សង្កាត់ អូរឫស្សីទី១ ត្រូវបានជនមិនស្គាល់ មុខចាប់អារក និងចាក់សម្លាប់ចោល កាល ពីយប់ថ្ងៃទី២៤ ខែវិច្ឆិកា ដើម្បីប្លន់យកខ្សែ ដៃមាសទម្ងន់ ១តម្លឹង ៥ជី  និងលុយជាង ១.០០០ ដុល្លារ ៕