ផ្ទុះនាវាដឹកប្រេង ក្នុងសមុទ្រលឿង ស្លាប់កម្មករ៥នាក់

ផ្ទុះនាវាដឹកប្រេងមួយគ្រឿងនៅក្រុងកំពង់ផែ Incheon  កាលពីព្រឹកថ្ងៃអាទិត្យ បណ្តាលឱ្យស្លាប់កម្មករ៥នាក់ និង៦នាក់ផ្សេងទៀតកំពុងបាត់ខ្លួន។
តាមគេហទំព័រកូរ៉េយុនហាប់ បានឱ្យដឹងនៅថ្ងៃទី១៦ ខែធ្នូ ឆ្នាំ២០១២ថា ការផ្ទុះកប៉ាល់ធុន 4191-ton vessel Doola No. 3 បានកើតឡើង ក្នុងដែនទឹកចម្ងាយ៣ម៉ាយ ភាគខាងជើងកោះចាវ៉ូលក្បែរកំពុងផែ Incheon វេលាម៉ោង ៨ និង៥នាទីព្រឹក។ ឆ្មាំសមុទ្របានបញ្ជាក់ថា មនុស្ស៥នាក់ នៅលើកប៉ាល់ត្រូវបានជួយសង្រ្គោះ ទៅកាន់ទីសុវត្ថិភាពអស់ហើយ។
មន្ត្រីក្រុមហ៊ុនបាននិយាយថា «ការផ្ទុះបានកើតឡើង ពេលដែលសាំងបានលិចចេញពីធុង »។
លោកបញ្ជាក់ថា តាមធម្មតាកប៉ាល់នេះដឹកប្រេងម៉ាស៊ីន ប៉ុន្តែពេលនេះ កប៉ាល់ដឹកសាំង យើងកំពុងពិនិត្យមើលមូលហេតុ នៃការផ្ទុះនេះ»។
មន្រ្តីរូបនោះបានបន្តថា ឧបទ្ទហេតុ នោះបានកើតខណៈក្រុមកម្មករ កំពុងសម្អាតធុងប្រេង ប៉ុន្តែមិនបានធ្វើឱ្យផ្អើលដល់អ្នកនៅខាងក្រៅទេ។
គួរបញ្ជាក់ថា បន្ទាប់ពីកប៉ាល់ទម្លាក់សាំងដាក់ឃ្លាំងស្តុក នៅកំពង់ផែ Incheon ៦.៥០០តោន កប៉ាល់នោះបានធ្វើដំណើរឆ្ពោះទៅកំពង់ផែ Daesan នៅខេត្ត Chungcheongភាគខាងត្បូង ស្រាប់តែបានជូបហេតុការណ៍អាក្រក់នោះតែម្តងទៅ៕