រាជធានីភ្នំពេញ ៖ កម្លាំងប៉ូលិសព្រហ្មទណ្ឌកម្រិតធ្ងន់ និងកម្រិតស្រាលនៃស្នងការដ្ឋានរាជធានីភ្នំពេញ រួមជាមួយប៉ូលិសខណ្ឌទួលគោក និងប៉ូលិសខណ្ឌដង្កោ ដឹកនាំដោយលោកក្រឡាបញ្ជីសាលាដំបូងរាជធានីភ្នំពេញ បានចុះទៅធ្វើការឆែកឆេរ និងដកហូតអាវុធខ្លីរបស់ខ្មាន់កាំភ្លើងដែលបានបាញ់សម្លាប់ មន្ត្រីប៉ូលិសពីរនាក់កាលពីប៉ុន្មានថ្ងៃមុននេះ ។ ខ្មាន់កាំភ្លើងរូបនោះបានយកកាំភ្លើងខ្លីម៉ាករូឡូទៅលាក់ទុក នៅក្នុងខ្ទមតូចមួយរបស់ម្តាយខ្លួនស្ថិតនៅក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅ ខណ្ឌដង្កោ រាជធានីភ្នំពេញ ហើយត្រូវកម្លាំងសមត្ថកិច្ចខាងលើចុះទៅឆែកឆេរ និងដកហូតយកកាលពីវេលាម៉ោង១០ព្រឹក ថ្ងៃទី១៩ សីហា ឆ្នាំ២០១១ ។
មន្ត្រីសមត្ថកិច្ចបាននិយាយថា ការឈានដល់ការចុះធ្វើការឆែកឆេរ និងរកឃើញអាវុធរបស់ខ្មាន់កាំភ្លើងដែលបានបាញ់សម្លាប់មន្ត្រី ប៉ូលិសនោះ គឺដោយសារតែស្ត្រីឈ្មោះឈឺន សារ៉ា អាយុ៧១ឆ្នាំ ជាម្ចាស់ខ្ទម និងជាម្តាយរបស់ជនសង្ស័យនោះបានទូរស័ព្ទរាយការណ៍ប្រាប់កម្លាំង ប៉ូលិសថា កូនប្រុសរបស់គាត់បានយកកាំភ្លើងខ្លីនោះទៅលាក់ទុកនៅលើគ្រែ ដេករបស់គាត់ និងប្រាប់ឱ្យទៅយកទើបកម្លាំងទាំងអស់ចុះទៅកាន់ទីនោះធ្វើការ ឆែកឆេរ និងដកហូតយកអាវុធនោះតែម្តង ។
គួររំលឹកថា ជនសង្ស័យឈ្មោះញៀវ ធឿន ហៅម៉ាំង អាយុជាង៤០ឆ្នាំ ជាមន្ត្រីប៉េអឹមរាជធានីភ្នំពេញ ក្រោយមកផ្លាស់ទៅកាន់ខណ្ឌសែនសុខ ហើយត្រូវបានអះអាងថា គេបណ្តេញចេញយូរហើយ ។ ជននេះបានបាញ់សម្លាប់មន្ត្រីប៉ូលិសពីរនាក់ ម្នាក់ឈ្មោះគង់ វិចិត្រ ហៅជា និងម្នាក់ទៀតឈ្មោះរឿង ប៉ូ ហៅហាស ក្នុងខណៈពេលដែលមន្ត្រីប៉ូលិសទាំងពីរនាក់នោះកំពុងបំពេញបេសកកម្ម កាលពីវេលាម៉ោង២និង៤០នាទីរំលងអធ្រាត្រ ថ្ងៃទី១៤ សីហា ឆ្នាំ២០១១ នៅតាមផ្លូវលេខ៥១៦ ចំណុចមុខមន្ទីរព្យាបាលឯកជន ម៉ៅសារី សង្កាត់បឹងក់១ ខណ្ឌទួលគោក រាជធានីភ្នំពេញ។ ក្រោយពេលធ្វើសកម្មភាពរួច ជនសង្ស័យបានគេចខ្លួនបាត់រហូតដល់យប់ថ្ងៃទី១៨ សីហា ក៏ធ្វើដំណើរទៅផ្ទះម្តាយរបស់ខ្លួនហើយយកកាំភ្លើងខ្លីម៉ាករូឡូ ដែលខ្លួនធ្វើសកម្មភាពបាញ់សម្លាប់មន្ត្រីប៉ូលិសនោះទៅលាក់ទុក នៅលើគ្រែដេករបស់ម្តាយខ្លួន បន្ទាប់មកគេចខ្លួនបាត់ស្រមោល ។ លុះនៅព្រឹកថ្ងៃទី១៩ សីហា ស្ត្រីជាម្តាយរបស់ជននោះបានទូរស័ព្ទប្រាប់ប៉ូលិសឱ្យទៅយក កាំភ្លើងនោះ ទើបប៉ូលិសបានដឹង ហើយចុះទៅកាន់ទីនោះភ្លាមៗ និងធ្វើការឆែកឆេរប្រទះឃើញកាំភ្លើងម៉ាករូឡូ នោះត្រូវជនសង្ស័យរុំនឹងកំណាត់រួចដាក់នៅលើគ្រែក្រោមខ្នើយ ស្ត្រីជាម្តាយ ក៏បានដកហូតយកមកពិនិត្យមើល ហើយឃើញកាំភ្លើងនោះនៅសល់គ្រាប់៣គ្រាប់ទៀតផង ។
ស្ត្រីជាម្តាយជនសង្ស័យនិយាយថា នៅយប់នោះ ក្នុងខណៈពេលដែលគាត់កំពុងដេកលេងនៅលើគ្រែផ្សេងមួយទៀតនៅក្នុង ផ្ទះខ្ទមប្រក់ដំបូលតង់ ទំហំ៣ម៉ែត្របួនជ្រុង ដែលជាផ្ទះរបស់គាត់រស់នៅសព្វថ្ងៃ ស្រាប់តែឃើញមនុស្សម្នាក់ដើរចូលទៅ ។ ពេលនោះ គាត់មើលមិនដឹងថា ជាកូនរបស់គាត់ឡើយ ព្រោះយប់ងងឹតពេក លុះពេលគាត់សួរទើបឮឆ្លើយថា ខ្ញុំអាធឿន ។ ក្រោយពេលឆ្លើយមួយម៉ាត់បែបនេះរួច កូនប្រុសគាត់ក៏បានចាកចេញទៅបាត់ ដោយមិនបាននិយាយអ្វីទាំងអស់ លុះពេលកូនចេញផុត ទើបគាត់អុជចង្កៀងបំភ្លឺ មើលឃើញកាំភ្លើងខ្លីដែលកូនលាក់ទុកក៏ចង់ទូរស័ព្ទប្តឹងប៉ូលិស ទាំងយប់ ប៉ុន្តែរកទូរស័ព្ទហៅមិនបាន ទើបរង់ចាំដល់ព្រឹកឡើងបានទូរស័ព្ទទៅប៉ូលិសឱ្យចុះទៅយក។
ប្រភពព័ត៌មានមួយបានឱ្យដឹងថា ក្រោយពេលរកកាំភ្លើងឃើញ សមត្ថកិច្ចក៏យកទៅរក្សាទុក បន្ទាប់មកនាំស្ត្រីឈ្មោះឈឺន សារ៉ា ដែលត្រូវជាម្តាយរបស់ជនសង្ស័យទៅកាន់ស្នងការដ្ឋានរាជធានី ភ្នំពេញ ដើម្បីធ្វើការសួរនាំ ៕
No comments:
Post a Comment