ខេត្តប៉ៃលិន ៖ យុវសិស្សម្នាក់ឈ្មោះទៀត ស្រីរ័ត្ន អាយុ១៩ឆ្នាំ រស់នៅភូមិតាពុក សង្កាត់ទួលល្វា ក្រុងប៉ៃលិន បានលេបថ្នាំសរសៃប្រសាទអស់ជាង២០គ្រាប់ ប៉ងធ្វើអត្តឃាតបញ្ចប់ជីវិតព្រោះតែខឹងឪពុកមិនទិញកុំព្យូ ទ័រឱ្យ។ តែសំណាងល្អត្រូវបានម្តាយដឹងទាន់ពេល យកមកសង្គ្រោះនៅ មន្ទីរពេទ្យបង្អែកខេត្ត ផុតពីការស្លាប់។ ហេតុការណ៍នេះបានកើតឡើងនៅថ្ងៃទី២៨ កក្កដា នៅម៉ោង៧ និង៣០នាទីយប់។
តាមសម្តីរបស់អ្នកស្រីឃីម សម្បត្តិ អាយុ៤៥ឆ្នាំ ត្រូវជាម្តាយបាននិយាយថា នៅមុនពេលកើតហេតុប្តីរបស់គាត់បានទៅមើលកូនស្រីរៀននៅភ្នំ ពេញប្រឡងបាក់ឌុប ហើយកូនស្រីប្អូនឈ្មោះទៀង ស្រីរ័ត្ន អាយុ១៩ឆ្នាំនេះ ឡើងថ្នាក់ទី១១ នៅវិទ្យាល័យមួយក្នុងក្រុងប៉ៃលិន បានទូរស័ព្ទផ្តាំប្រាប់ឪពុកថា នៅពេលត្រឡប់មកវិញ សូមឱ្យទិញកុំព្យូទ័រមួយគ្រឿងផ្ញើនាងផង។ ប្រភពបន្តថា ដោយសារឪពុកខ្វះលុយមិនបានទិញ ស្រាប់តែនៅល្ងាចថ្ងៃទី២៨ កក្កដា កូនស្រីរបស់គាត់យកថ្នាំសរសៃប្រសាទរបស់គាត់ (ឃីម សម្បត្តិ) មកលេបហើយចូលទៅសំងំក្នុងបន្ទប់ទឹក។ ដោយមានការសង្ស័យគាត់ប្រញាប់ទៅមើលបន្ទប់ទឹក ហៅឱ្យកូនបើកទ្វារស្រាប់តែឃើញថ្នាំដែលគាត់ធ្លាប់លេបបែរជា មកនៅក្នុងបន្ទប់ទឹកទៅវិញ ហើយបាត់អស់ប្រមាណជាង២០គ្រាប់ទើបសន្និដ្ឋានថាកូនស្រីរបស់ គាត់បានលេបថ្នាំនោះហើយ។
ពេលចេញពីបន្ទប់ទឹកមកវិញកូនស្រីរបស់គាត់បាន សំពះសុំទោសឪពុក និងម្តាយ ដែលខ្លួនគិតខ្លីឆ្កួតៗបែបនេះ ព្រោះមិនសង្ឃឹមថា នឹងរស់ទេ។ ក្រោយពីមានសភាពមិនប្រក្រតីនៅវេលាម៉ោង៨យប់ ពួកគាត់បានម្នីម្នាយកកូនទៅសង្គ្រោះនៅមន្ទីរពេទ្យបង្អែកជា បន្ទាន់។ អ្នកស្រីបានបន្តថា ការលេបថ្នាំនេះ ព្រោះតែខឹងនឹងឪពុកមិនបានទិញកុំព្យូទ័រ និងម៉ូតូថ្មីឱ្យជិះ។
លោកសេង ឃន អាយុ៤៧ឆ្នាំ ដែលត្រូវជាឪពុកបាននិយាយថា គាត់ធ្លាប់សន្យាជាមួយកូនស្រីរបស់គាត់ដោយឱ្យកូនខិតខំរៀន រហូតដល់យកបរិញ្ញាបត្រ រូបគាត់នឹងទិញម៉ូតូថ្មីឱ្យជិះជាក់ជាមិនខាន។ ជាក់ស្តែងរៀងរាល់ថ្ងៃនៅក្នុងផ្ទះរបស់គាត់ក៏មានម៉ូតូម៉ាកឆាលី មួយគ្រឿងដែរ សម្រាប់ឱ្យជិះទៅរៀនប្រចាំថ្ងៃ តែកូនមិនព្រមជិះឡើយព្រោះខ្មាសគេដោយសារមិត្តភក្តិមានសុទ្ធតែ ម៉ូតូស៊េរីទំនើប។ មូលហេតុទាំងនេះគួបផ្សំនឹងរបួសចាស់រើឡើងវិញផង ទើបធ្វើឱ្យកូនស្រីគាត់មួម៉ៅក្តៅក្រហាយចង់បានអ្វីមិនបាន តាមចិត្តប៉ង។
លោកគ្រូពេទ្យបាននិយាយថា នៅម៉ោង២១ និង៤៥នាទីគ្រូពេទ្យបានលាងក្រពះបន្សាបថ្នាំអស់ហើយ គ្មានគ្រោះថ្នាក់អ្វីធំដុំនោះទេ៕
No comments:
Post a Comment