សៀមរាប ៖ បន្ទប់នៃផ្ទះសំណាក់យីហោរអង្គរតូចស្ថិតនៅកណ្តាលក្រុងសៀមរាប ត្រូវ ភ្លើងឆាបឆេះកាលពីព្រឹកថ្ងៃទី៣០ ខែកក្កដា ឆ្នាំ២០១១ ដែលជាហេតុធ្វើអោយភ្ញៀវដែលសម្រាកនៅ ផ្ទះសំណាក់នេះភ័យព្រលឹងចុងសក់ និងបង្កការភ្ញាក់ផ្អើលដល់ក្រុមសមត្ថកិច្ចព្រមទាំងប្រជាពលរដ្ឋដែល មានលំនៅដ្ឋានក្បែរទីនោះផងដែរ។
ហេតុការណ៍នេះបានកើតឡើងកាលពីវេលាម៉ោង៥និង១៥នាទីទៀបភ្លឺ ថ្ងៃទី៣០ ខែកក្កដា ឆ្នាំ២០១១ នៅក្រុមទី១០ ភូមិតាភុល សង្កាត់ស្វាយដង្គំ ក្រុងសៀមរាប (ក្រោយស្ថាននីយ៍ប្រេងឥន្ទនៈ កាល់តិច) ។ នៅក្នុងហេតុការណ៍នោះគេបានឃើញកងកម្លាំងនគរបាលមូលដ្ឋាននិងកងរាជអាវុធហត្ថ ខេត្តសៀមរាប ត្រូវបានចាត់បញ្ជូនទៅរក្សាការពារសន្តិសុខសណ្តាប់ធ្នាប់នៅកន្លែងកើតហេតុ ព្រមទាំង រថយន្តពន្លត់អគ្គីភ័យចំនួនពីរគ្រឿងផងដែរបញ្ជូនទៅកាន់ទីនោះ ។
អធិការនគរបាលក្រុងសៀមរាបលោកវរសេនីយ៍ត្រី ស៊ុន សាន ដែលស្ថិតនៅរង្វង់ប្រតិបត្តិ ការណ៍ពន្លត់ភ្លើងបានអោយដឹងថា ពេលដែលដឹងហេតុការណ៍នេះភ្លាមរូបលោកនិងកម្លាំងប៉ុស្តិស្វាយដង្គំ បានចុះទៅដល់កន្លែងកើតហេតុ ដើម្បីការពារសន្តិសុខនិងរបៀបរៀបរយ ។ លោកវរសេនីយ៍ត្រីរូបនេះ បានបន្តថា ភ្លើងឆេះនៅក្នុងបន្ទប់លេខ៥១៧ ជាន់ទី៥ នៃផ្ទះសំណាក់អង្គរតូចហើយរូបលោកនិកម្លាំងនគរ បាលបានប្រើទុយោរទឹកនិងបំពង់អន្លត់អគ្គីភ័យរបស់ផ្ទះសំណាក់បាញ់ពន្លត់ ។
លោក ស៊ុន សាន បានបន្តអោយដឹងថា តាមការសន្និដ្ឋានជំហ៊ានដំបូងភ្លើងឆាបឆេះដោយសារ តែភ្លើងធូប-ទៀន ព្រោះនៅក្នុងបន្ទប់នេះមានអាសនៈគ្រូបាធ្យា ហើយម៉្យាងទៀតថ្ងៃនេះជាថ្ងៃសីលថែម ទៀតផង ។ លោកបានបន្តថា សម្ភារៈនៅក្នុងបន្ទប់នេះត្រូវបានភ្លើងឆាបឆេះបំផ្លាញទាំងស្រុង តែមិនរាល ដាលបង្ករការខូចខាតទៅបន្ទប់ផ្សេងទៀតទេ ដោយសារលោកដឹកនាំកម្លាំងជួយពន្លត់ទាន់ពេលវេលា ។
ចំណែកប្រភពនៅកន្លែងកើតហេតុបានអោយដឹងថា ក្នុងពេលមានការភ្ញាក់ផ្អើលនេះគេបាន ឃើញភ្ញៀវចំរុះជាតិសាសន៍ដែលស្នាក់នៅផ្ទះសំណាក់នេះ នាំគ្នារត់ចុះមកខាងក្រោមព្រោងព្រាតដោយសារ តែការភ័យខ្លាចគ្រោះអគ្គីភ័យនេះ ។ ប្រភពនេះបានបន្តថា ហើយភ្លាមៗនោះដែរគេបានឃើញរថយន្ត ពន្លត់អគ្គីភ័យរបស់នគរបាលខេត្តសៀមរាប ចំនួនពីរគ្រឿងមកកាន់កន្លែងកើតហេតុដើម្បីជួយសង្គ្រោះ តែគេមិនបានឃើញធ្វើសកម្មភាពបាញ់ទឹកពន្លត់នោះទេ ដោយបានត្រឹមតែនៅរេរាពីមុខផ្ទះសំណាក់មួយ នេះតែប៉ុណ្ណោះ ។
ប្រភពនេះបន្តថា ការដែលឡានទឹកមិនធ្វើសកម្មភាពបាញ់ទឹកពន្លត់ភ្លើងនេះ គឺដោយសារតែ ទុយោរទឹករបស់រថយន្តទាំងនេះមានប្រវែងខ្លីពេក មិនអាចលាតសន្ធឹងទៅដល់ជាន់ខាងលើដែលជាគោល ដៅភ្លើងឆាបឆេះ ។ ប្រភពនេះបានបន្តថា ករណីដែលកើតឡើងនេះវាមិនធ្ងន់ធ្ងរនោះទេ ចុះបើសិនជាករណីភ្លើងឆាបឆេះវាមានស្ថានភាពខ្លាំងក្លានោះ ហើយឡានទឹកដែលមានទុយោរដ៏ខ្លីនេះតើនឹងមានរឿងអ្វី កើតឡើង ម៉្យាងវិញទៀតលោកស្នងការនគរបាលខេត្តសៀមរាបមិនគួរធ្វេសប្រហែសទេ គួរតែស្វះស្វែង រកទិញទុយោរទឹកសម្រាប់ក្រុមឡានទឹកក្នុងខេត្តរបស់ខ្លួននេះផង៕
No comments:
Post a Comment