ព្រំដែនកម្ពុជា-សៀម: មុនពេលដែលទាហានកម្ពុជា និងថៃ អនុវត្តតាមសេចក្តីសម្រេចរបស់តុលាការអន្តរជាតិទីក្រុងឡាអេ ឲ្យដកទ័ពចេញពីតំបន់ប្រាសាទព្រះវិហារ គឺទាហានថៃ បានអនុវត្តផែនការរបស់ខ្លួន ហើយធ្វើសកម្មភាព រាយបន្លាលួសនៅព្រំដែន ដែលឈមមុខប្រាសាទព្រះវិហារ ។ប្រភពស្និទ្ធនឹងកងកម្លាំងប្រដាប់អាវុធយោធាកម្ពុជា បានបញ្ជាក់ថា ទាហានថៃបានធ្វើសកម្មភាពរាយបន្លាលួស ក្នុងតំបន់ឈមមុខ ប្រាសាទព្រះវិហារ គឺធ្វើឡើងជាប់ៗគ្នាចំនួនពីរ ទៅបីថ្ងៃមកហើយ ។
ការធ្វើការរាយបន្លាលួស ដោយទាហានថៃ គឺធ្វើបន្តជាប់នឹងបន្លាលួសចាស់ ដែលទាហានថៃ បានរាយកាលពីប៉ុន្មានខែមុនមក។ប្រភពស្និទ្ធនឹងយោធាបានបញ្ជាក់ថា បន្លាលួសចាស់បានត្រូវថៃធ្វើសកម្មភាពរាយបន្តិចម្តងៗ ជាច្រើនលើកច្រើនសារ។ ការធ្វើសកម្មភាពរាយបន្លាលួសនៅឈមនឹងមុខប្រាសាទព្រះវិហារ កាលពីពេលកន្លងមក គឺភាគីកម្ពុជាបានហាមប្រាមជាបន្តបន្ទាប់ នៅពេលណាឃើញទាហានថៃរាយបន្លាលួសម្តងៗ ។
ប៉ុន្តែប៉ុន្មានថ្ងៃជាប់គ្នានេះ ទាហានថៃបានបន្តរាយបន្លាលួសថែមទៀត ដោយតភ្ជាប់ពីបន្លាលួស និងរបងឬស្សី ចាស់ពីមុនមក ដើម្បីបន្តរាយឱ្យបានវែងជាងមុន។នៅពេលខាងមុខ ដែលមិនយូរប៉ុន្មានទាហានកម្ពុជា និងទាហានថៃ និងត្រូវដកចេញពីតំបន់ជុំវិញប្រាសាទព្រះវិហារ ដែលធ្វើឡើងតាមសេចក្តីសំរេចរបស់តុលាការអន្តរជាតិទីក្រុងឡាអេ ។ ក្នុងសេចក្តីសំរេចរបស់តុលាការអន្តរជាតិ ទីក្រុងឡាអេ ក៏បង្គាប់ឱ្យប្រទេសឥណ្ឌូនេស៊ី ដែលជាប្រធានអាស៊ានផងនោះ បញ្ជូនអ្នកអង្កេតការណ៏មកបន្ទាន់ដើម្បីធ្វើការអង្កេតការជុំវិញ ការដកទ័ព និងពិនិត្យមើលការឈប់បាញ់ដោយអចិន្ត្រៃយ៍ នៅតំបន់ប្រាសាទព្រះវិហារ ៕
No comments:
Post a Comment