ខេត្តបន្ទាយមានជ័យ ៖ ក្មេងប្រុសអាយុ៥ឆ្នាំ ជាកូនរបស់បុរសពិការម្នាក់ដែលត្រូវមេខ្យល់ឈ្មោះអេង ច័ន្ទ ចាប់បង្ខាំងទុកដើម្បីឱ្យបុរសជាឪពុកត្រឡប់ទៅដើរសុំទាននៅថៃវិញ ជាថ្នូរក្នុងការឱ្យឪពុក និងកូនជួបគ្នានោះ ត្រូវបានកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជន សហការជាមួយមន្ត្រីអង្គការស៊ីសា រំដោះយកក្មេងប្រុសនោះមកវិញ នៅវេលាម៉ោង៤រសៀល ថ្ងៃទី១១ សីហា ឆ្នាំ២០១១ ត្រង់ចំណុចក្បាលស្ពាន ច្រកទ្វារអន្តរជាតិប៉ោយប៉ែត ក្រុងប៉ោយប៉ែត ។
លោកវរសេនីយ៍ទោ សិទ្ធ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជនបានឱ្យដឹងថា កុមារារងគ្រោះដែលត្រូវឈ្មោះអេង ច័ន្ទ ចាប់បង្ខាំងទុកនៅទឹកដីថៃនោះឈ្មោះសន ថុនា អាយុ៥ឆ្នាំ ជាកូនរបស់ឈ្មោះវាំងមួរ ដែលត្រូវបានអាជ្ញាធរថៃចាប់បញ្ជូនមកស្រុកខ្មែរវិញ ប៉ុន្តែត្រូវបានឈ្មោះអេង ច័ន្ទ ឱ្យបក្សពួកគេម្នាក់ឈ្មោះអន់ សំអឿន ដែលត្រូវសមត្ថកិច្ចចាប់ដាក់គុកហើយនោះ ប្រើល្បិចលួងលោមផង គំរាមផង ឱ្យត្រឡប់ទៅដើរសុំទាននៅថៃវិញ បើចង់ជួបកូន ។
លោកនាយការិយាល័យបានបន្តថា នៅថ្ងៃទី១១ សីហា ឆ្នាំ២០១១ ជនឈ្មោះអេង ច័ន្ទ បានទាក់ទងបុរសជាឪពុក និងបងជីដូនមួយឈ្មោះង៉ែត ដោយនិយាយថា បើទៅស្រុកខ្មែរកុំប្តឹងសមត្ថកិច្ចគេនឹងយកកូនប្រុសពីប្រទេសថៃ ឱ្យវិញ ពេលនោះបុរសជាឪពុកបានប្រាប់ថា មិនប្តឹងទេ តែសុំឱ្យកូនគាត់វិលមកវិញ។ ពេលនោះជនឈ្មោះអេង ច័ន្ទ បានបង្វែរទីណាត់ជួប ម្តងនៅទីនេះម្តងនៅទីនោះ រហូតដល់ម៉ោង៤រសៀល ថ្ងៃទី១១ សីហា ទើបឃើញកុមារារងគ្រោះឈ្មោះសន ថុនា ត្រូវជននោះយកមកផ្ញើនៅស្នាក់ការសន្តិសុខស្ពាន រួចក្មេងប្រុសនោះត្រូវបានសមត្ថកិច្ចនាំមកកាន់ការិយាល័យរបស់ខ្លួន ។
លោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត បានមានប្រសាសន៍ថា ក្មេងប្រុសឈ្មោះសន ថុនា និងឪពុករបស់គេ ព្រមទាំងបុរសពិការម្នាក់ទៀតឈ្មោះហេង ដូង ត្រូវបានការិយាល័យជំនាញប្រគល់ជូនអង្គការស៊ីសា ជួយឧបត្ថម្ភគាំទ្រសេវាផ្នែកបណ្តុះបណ្តាលវិជ្ជាជីវៈផ្សេងៗ ។ ចំពោះជនឈ្មោះអេង ច័ន្ទ សមត្ថកិច្ចកំពុងធ្វើការស្រាវជ្រាវដើម្បីចាប់ខ្លួនយកមកផ្តន្ទាទោសតាមច្បាប់ ៕
No comments:
Post a Comment