ខេត្តក្រចេះ ៖ ទំនាស់រឿងបាត់ទូរស័ព្ទលាយឡំនឹងគំនុំយកឆ្កែមកកាប់ហូបក្លែមស្រា បានក្លាយជាអំពើឃាតកម្មសម្លាប់មនុស្ស ដោយប្រើកាំភ្លៀវ (អាវុធច្នៃរបៀបស្នា) បាញ់លើបុរសរងគ្រោះត្រូវមួយគ្រាប់ព្រួញជាប់ឆ្អឹងជំនីរ រត់ហៅឱ្យគេជួយបានជាង១០ម៉ែត្រក៏ស្លាប់។
តាមប្រភពព័ត៌មានបានឱ្យដឹងថា ជម្លោះដែលឈានទៅដល់ការបាញ់សម្លាប់គ្នាដូចបាញ់សត្វនេះមិនមែនកើតចេញតែពីរឿងបាត់ទូរស័ព្ទរបស់ជនដៃដល់នោះទេ គឺលាយឡំនឹងគំនុំកាលពីប៉ុន្មានថ្ងៃមុន ខណៈជនដៃដល់ និងជនរងគ្រោះបណ្តើរឆ្កែរបស់ពួកគេចូលទៅព្រៃដើម្បីបរបាញ់សត្វ តែឆ្កែរបស់ជនដៃដល់ត្រូវស្វាខាំងាប់ ។ ពេលនោះជនដៃដល់គំរាមជនរងគ្រោះថា មិនជួយឆ្កែទេបែរជាឈរមើល ហើយពេលឆ្កែងាប់យកមកធ្វើហូបទៀត និងបានប្រមាថថា ជីវិតពួកឯងមិនស្មើឆ្កែបណ្តើរសត្វដែលគេស្រឡាញ់ស្មើជីវិតមួយក្បាលនេះផង។
បុរសរងគ្រោះដែលត្រូវជនដៃដល់បាញ់នឹងកាំភ្លៀវយ៉ាងសាហាវ ហើយប្រកាច់ស្លាប់នេះឈ្មោះវិន សុជា អាយុ២៥ឆ្នាំ មានទីលំនៅភូមិស្នួលវត្តលិច ឃុំស្នួល ស្រុកស្នួល រីឯជនដៃដល់ឈ្មោះឈីន ភាព អាយុ៤៤ឆ្នាំ មានទីលំនៅក្នុងភូមិ-ឃុំជាមួយគ្នា។ មន្ត្រីប៉ូលិសស្រុកស្នួលបានឱ្យដឹងថា កាលពីថ្ងៃទី៩ សីហា ជនរងគ្រោះ និងជនដៃដល់បានផឹកស្រាជាមួយគ្នានៅផ្ទះរបស់បុរសម្នាក់ឈ្មោះអួច ចាន់ នៅក្នុងភូមិជាមួយគ្នា។ មួយស្របក់ក្រោយមកបុរសជាម្ចាស់ផ្ទះឈ្មោះអួច ចាន់ បានឈប់ផឹក ហើយទាំងជនដៃដល់ និងជនរងគ្រោះក៏បានមកផឹកបន្តនៅផ្ទះរបស់ជនដៃដល់ទៀត។
ក្រោយពេលផឹកស៊ីចប់ បុរសរងគ្រោះក៏ចេញទៅផ្ទះមុន ស្របពេលនោះ ជនដៃដល់បានបាត់ទូរស័ព្ទមួយគ្រឿងដើររកមិនឃើញ ហើយសង្ស័យថា ជនរងគ្រោះជាអ្នកលួច ក៏កើតការខឹងសម្បា រួមទាំងគំនុំលើកមុននាំគ្នាហូបសាច់ឆ្កែដែលស្វាខាំងាប់ផង ក៏ដំឡើងកាំភ្លៀវដើរតម្រង់ទៅរោងដេករបស់ជនរងគ្រោះ។ ពេលទៅដល់ក៏បានបាញ់ជនរងគ្រោះដែលកំពុងដេកមួយគ្រាប់ព្រួញចំដៃឆ្វេង ធ្លាយមកជាប់ឆ្អឹងជំនីរ ហើយជនរងគ្រោះបានរត់សំដៅមកផ្ទះបុរសឈ្មោះអួច ចាន់ និងស្រែកឱ្យជួយ។ ពេលមកដល់មុខផ្ទះជនរងគ្រោះក៏ដួល ហើយបុរសឈ្មោះអួច ចាន់ បានចាប់ដកព្រួញនោះចេញ និងរត់ហៅប៉ូលិស ប៉ុន្តែបន្ទាប់ពីចាប់ដកព្រួញរួចជនរងគ្រោះក៏បានប្រកាច់ស្លាប់នៅនឹងកន្លែង។
លោកវរសេនីយ៍ត្រីចាន់ សុគីម នាយការិយាល័យប៉ូលិសព្រហ្មទណ្ឌកម្រិតធ្ងន់ខេត្ត បានឱ្យដឹងថា ក្រោយពីទទួលបានព័ត៌មានភ្លាម កម្លាំងប៉ូលិសបានចុះទៅពិនិត្យដល់កន្លែងកើតហេតុ និងចាប់ឃាត់ខ្លួនជនសង្ស័យរូបនោះដើម្បីសាកសួរតាមនីតិវិធី។ ជនឈ្មោះឈីន ភាព បានឆ្លើយថា រូបគេពិតជាបាញ់សម្លាប់ជនរងគ្រោះមួយគ្រាប់កាំភ្លៀវមែន ដោយសារតែគំនុំ។ នៅល្ងាចថ្ងៃទី១១ សីហា ប៉ូលិសបានកសាងសំណុំរឿងបញ្ជូនជនសង្ស័យរូបនេះរួមទាំងវត្ថុតាងទៅកាន់សាលាដំបូងខេត្ត ៕
No comments:
Post a Comment