ខេត្តស្ទឹងត្រែង ៖សាកសពស្ត្រីចំណាស់ម្នាក់ត្រូវបានគេប្រទះឃើញអណ្តែតទឹកតាមដង ទន្លេសេសានកាលពីវេលាម៉ោង១៨ថ្ងៃទី២៤ សីហា ក្នុងសភាពហើមស្អុយនិងមិនដឹងពីមូលហេតុច្បាស់លាស់។
សាកសពស្ត្រីចំណាស់នេះឈ្មោះសួន នី អាយុ៥៥ឆ្នាំ រស់នៅភូមិសេសាន ឃុំកំភុន ស្រុកសេសាន ។ ចំពោះមូលហេតុ នៃការស្លាប់មិនមានសមត្ថកិច្ចណាម្នាក់អះអាងឱ្យបានដឹងឡើយ។ ប្រភពព័ត៌មានមួយបានឱ្យដឹងថា ការស្លាប់របស់ស្ត្រីចំណាស់ម្នាក់នេះគឺបណ្តាលមកពីលង់ទឹក។ ប្រភពពីអ្នកភូមិបាននិយាយថា ស្ត្រីចំណាស់ម្នាក់នេះមានកូនស្រី២នាក់តែបានចាកចេញពី គាត់ទៅធ្វើជាកម្មករនៅខេត្តរតនគិរីទុកឱ្យគាត់រស់នៅជាមួយប្តីក្រោយ ឈ្មោះអឹម សុន អាយុ៦០ឆ្នាំ ដែលមកដល់ពេលនេះមានរយៈពេលជាង១០ឆ្នាំមកហើយ។ ប្រភពបន្តថា ស្ត្រីរងគ្រោះតែងឃើញស្រវឹងជាប់រហូត ហើយនៅមុនពេលស្លាប់គេមិនដឹងថាគាត់ដើរធ្លាក់ទឹកឬបណ្តាលមកពីបញ្ហា អ្វីទេ។
លោក អន សំអាត អធិការស្រុកសេសានបានឱ្យដឹងថា សពស្ត្រីរងគ្រោះត្រូវបានប្រជាពលរដ្ឋប្រទះឃើញអណ្តែតទឹកក៏បានរាយ ការណ៍មកសមត្ថកិច្ច ហើយកម្លាំងរបស់យើង បានចុះទៅមើលភ្លាមដែរ តែដោយសារយប់ងងឹតកម្លាំងយើងក៏បានចាប់ចងខ្សែទុក លុះព្រឹកឡើងថ្ងៃទី២៥សីហា ទើបចុះទៅត្រួតពិនិត្យ។ ករណីនេះសមត្ថកិច្ចសន្និដ្ឋានថា ស្ត្រីរងគ្រោះអាចខ្យល់គរធ្លាក់ចូលទឹកព្រោះនៅមាត់កំពង់ទឹកផ្ទះគាត់ឃើញ សល់តែអាវ។
ក្រោយពីសមត្ថកិច្ចធ្វើកោសល្យវិច័យរួច រាល់ក៏បានប្រគល់សពស្ត្រីរងគ្រោះទៅឱ្យក្រុមគ្រួសារធ្វើ បុណ្យតាមប្រពៃណីនិងបូជានៅរសៀលថ្ងៃទី២៦សីហា ៕
No comments:
Post a Comment