ខេត្តពោធិ៍សាត់ ៖ នារសៀលថ្ងៃទី២ កញ្ញា ២០១១ ប៉ូលិសបានឃាត់ខ្លួនជនសង្ស័យ២នាក់ពីបទប្រើអំពើហិង្សាដោយចេតនាដោយវាយ ជនរងគ្រោះនឹងត្បូងចបបណ្ដាលឲ្យផុងលលាដ៍ក្បាលរបួសយ៉ាងធ្ងន់ធ្ងរ។ ករណីនេះបានកើតឡើងកាលពីថ្ងៃទី១ កញ្ញា ២០១១ វេលាម៉ោង៨និង៣០នាទីយប់ នៅការដ្ឋានទី៨ របស់ក្រុមហ៊ុនចិន ស្ថិតនៅភូមិកណ្ដាល ឃុំឈើតុំ ស្រុកក្រគរ។
មន្ត្រីប៉ូលិសឲ្យដឹងថា ជនសង្ស័យទាំងពីរនាក់នេះម្នាក់ឈ្មោះផាត់ ឃួន ភេទប្រុស អាយុ៣១ឆ្នាំ និងម្នាក់ទៀតឈ្មោះអាន ថង ភេទប្រុស អាយុ២៨ឆ្នាំ។ ទាំងពីរនាក់មានទីលំនៅភូមិតាកឹម ឃុំអន្លង់សំណ ស្រុកជីក្រែង ខេត្តសៀមរាប មកធ្វើជាកម្មករឲ្យក្រុមហ៊ុនចិន ស្នាក់នៅបណ្ដោះអាសន្នក្នុងភូមិ-ឃុំកើតហេតុខាងលើ។ ពួកគេត្រូវបានឃាត់ខ្លួនតាមពាក្យបណ្ដឹងរបស់ស្ត្រីឈ្មោះសែម រឿន អាយុ៥៣ឆ្នាំ នៅភូមិផ្ទះចេក ឃុំឈើតុំ ដែលចោទប្រកាន់ថា បានវាយកូនប្រុសរបស់គាត់ឈ្មោះឆេង សឿន អាយុ២៤ឆ្នាំ ឱ្យរបួសយ៉ាងធ្ងន់ធ្ងរ។
ក្នុងពាក្យបណ្ដឹងរៀបរាប់ថា កាលពីថ្ងៃទី១ កញ្ញា ២០១១ វេលាម៉ោង៧និង៣០នាទីយប់ ឈ្មោះឆេង សឿត ភេទប្រុស អាយុ២៤ឆ្នាំ (បងបង្កើតរបស់ជនរងគ្រោះ) រួមជាមួយឈ្មោះអាន ថង និងផាត់ ឃួន (ជនជាប់ចោទ) បានផឹកស៊ី និងច្រៀងខារ៉ាអូខេជាមួយគ្នានៅតូបរបស់ឈ្មោះធឿង យ៉ុម។ ពួកគេផឹកស៊ីច្រៀងរាំយ៉ាងសប្បាយរីករាយរហូតដល់ម៉ោង៨និង៣០នាទីយប់ ផាត់ ឃួន បានកុំម្មង់ឆេង សឿត ឲ្យចាក់បទញាក់ ។ ពេលចាក់រួចឆេង សឿត ក៏ដើរចេញក្រៅ ពេលនោះផាត់ ឃួន ហៅមកវិញ ឲ្យរាំតែដោយសារឆេង សឿតមិនរាំ ផាត់ ឃួន ក៏ក្របួចសក់ក្បាលដាល់ពីរបីដៃរួចហើយឆេង សឿត ក៏ដើរចេញបាត់ទៅ ឯ២នាក់នោះនៅច្រៀងបន្តទៀត។
ក្នុងពាក្យបណ្តឹងរៀបរាប់ទៀតថា មួយសន្ទុះក្រោយមកឈ្មោះឆេង សឿន ហៅហ៊ីង ភេទប្រុស អាយុ២២ឆ្នាំ (ជនរងគ្រោះ) ជាប្អូនរបស់ឆេង សឿត បានដើរមកសួររកហេតុផល ស្រាប់តែផាត់ ឃួន វាយក្បាលមួយត្បូងចបរហូតផុងលលាដ៍ហូរឈាមស្រោចខ្លួន។ ភ្លាមៗនោះ ឈ្មោះអាន ថងបម្រុងវាយនឹងដំបងថែមទៀត ប៉ុន្តែដោយឃើញជនរងគ្រោះដេកដួលសន្លប់ក្នុងថ្លុកឈាមទៅហើយក៏បបួលគ្នាដើរ ចេញបាត់ទៅ ឯជនរងគ្រោះត្រូវបានពួកចិនដឹកយកទៅសង្គ្រោះនៅមន្ទីរពេទ្យខេត្តទាំងយប់។ ប៉ូលិសឲ្យដឹងថា បន្ទាប់ពីទទួលពាក្យបណ្ដឹងរបស់ស្ត្រីជាម្ដាយ នៅថ្ងៃទី២ កញ្ញា ២០១១ ទើបយើងស្រាវជ្រាវ និងឈានទៅឃាត់ខ្លួនជនសង្ស័យទាំងពីរនាក់។
នៅចំពោះមុខសមត្ថកិច្ច ជនសង្ស័យឈ្មោះផាត់ ឃួន បានឆ្លើយថា នៅយប់នោះខ្លួននិងឈ្មោះអាន ថង បានទៅច្រៀងខារ៉ាអូខេមែន។ ពេលកំពុងច្រៀងស្រាប់តែឈ្មោះសឿត ដាល់អាន ថង ដែលជាមិត្តភក្តិរបស់ខ្លួនពីរបីដៃដោយ មិនដឹងមូលហេតុ។ ខណៈឃើញដូច្នេះខ្លួនបានដាល់ឈ្មោះសឿតពីរបីដៃសងវិញ បន្ទាប់មកម្ចាស់ខារ៉ាអូខេបិទឈប់ឲ្យច្រៀង ពួកគេក៏នាំគ្នាទៅដេករៀងៗខ្លួន។ ឯចំពោះឆេង សឿន (ជនរងគ្រោះ) ប្អូនរបស់ឆេង សឿត ដែលត្រូវគេវាយបែកក្បាលនោះ ខ្លួនអត់ដឹងរឿងទេ មិនដឹងថា គេមានទំនាស់នៅឯណាជាមួយក្រុមណាឡើយ គឺពួកគេអត់បានវាយទាល់តែសោះ ស្រាប់តែស្អែកឡើងប៉ូលិសមកចាប់ពួកគេទាំងពីរនាក់វាយខ្នោះតែម្ដង ដែលធ្វើឲ្យពួកគេងឿងឆ្ងល់យ៉ាងខ្លាំង។ ជនសង្ស័យទាំងពីរនាក់និយាយថា បើពួកគេបានវាយជនរងគ្រោះរហូតដល់ផុងលលាដ៍ក្បាលមែននោះ ប្រហែលជាមិននៅឲ្យប៉ូលិសចាប់ខ្លួនទេ ដូច្នេះសូមឲ្យស្ថាប័នច្បាប់ជួយរកយុត្តិធម៌ឲ្យពួកគេផង។
សមត្ថកិច្ចបានបញ្ជូនជនទាំង២នាក់មកកាន់ស្នង ការដ្ឋាននគរបាលខេត្តនាល្ងាចថ្ងៃទី៣ កញ្ញា លុះព្រឹកឡើងថ្ងៃទី៤ កញ្ញា បន្ទាប់ពីបំពេញសំណុំបែបបទតាមនីតិវិធីរួចក៏បញ្ជូនបន្តទៅតុលាការទៀត៕
No comments:
Post a Comment