ខេត្តបន្ទាយមានជ័យ ៖ គ្រោះថ្នាក់ចរាចរណ៍គួរឱ្យរន្ធត់មួយបានផ្តាច់សង្ខារក្មេង ប្រុសអាយុ៥ឆ្នាំ នៅនឹងកន្លែងកើតហតុដោយអ្នកបើកបររថយន្តកាមរីមួយគ្រឿង ។ ក្រោយពីកើតឧប្បត្តិហេតុនេះភ្លាមអ្នកបើកបររថយន្តបានបង្កើន ល្បឿនបើកគេចបាត់ស្រមោល ។ គ្រោះថ្នាក់ចរាចរណ៍នេះកើតឡើងនៅវេលាម៉ោង៦និង៥០នាទី ថ្ងៃទី២០ កក្កដា ឆ្នាំ២០១១ លើផ្លូវជាតិលេខ៥ ស្ថិតនៅចន្លោះបង្គោលភ្លើងលេខ០៣៧១-០៣៧២ ភូមិចក ឃុំរហាល ស្រុកព្រះនេត្រព្រះ។
លោកវរសេនីយ៍ត្រី កែវ ប៊ុនយឿន អធិការនគរបាលស្រុកព្រះនេត្រព្រះឱ្យដឹងថា កុមារារងគ្រោះឈ្មោះសេង សុខា អាយុ៥ឆ្នាំ នៅភូមិសាលាឆេះ ឃុំរហាល ស្រុកព្រះនេត្រព្រះ ខេត្តបន្ទាយមានជ័យ ។តាមការរៀបរាប់ពីសាក្សីប្រាប់សមត្ថកិច្ច ថា រថយន្តម៉ាកកាមរីស៊េរី៩២ ឬ៩៣ ពណ៌ស្ពៃជ្រក់ ពាក់ស្លាកលេខ០៤៥៤ តែមិនដឹងថា នៅខេត្តណាទេ បើកមកពីទិសខាងកើតទៅលិចក្នុងល្បឿនលឿន លុះដល់ចំណុចកើតហេតុបានបុកក្មេងប្រុសរងគ្រោះខ្ទាតប៉ើង ខណៈពេលរត់ឆ្លងថ្នល់តាមឪពុកពីត្បូងទៅជើង ។
ឈ្មោះសេង គន្ធា អាយុ៣១ឆ្នាំ ឪពុកកុមារារងគ្រោះរៀបរាបប្រាប់សមត្ថកិច្ចថា មុនពេលចេញពីផ្ទះលោកប្រាប់កូនប្រុសឱ្យនៅចាំផ្ទះ ដោយលោករវល់ទៅសួរបងប្អូនពីរឿងបាញ់ថ្នាំស្រូវ ។ ពេលចេញពីផ្ទះលោកបានចាក់សោរបង ប៉ុន្តែមិនដឹងថា កូនប្រុសរបស់លោកចេញតាមណាទេ ហើយក៏មិនដឹងថា គេរត់តាមក្រោយដែរ។ ពេលលោកដើរឆ្លងថ្នល់ផុត ស្រាប់តែរថយន្តបុកកូនរបស់លោកតែម្តង។
លោកកែវ ប៊ុនយឿន បញ្ជាក់ថា ក្រោយពីទទួលបានព័ត៌មានភ្លាម លោកចាត់តាំងកម្លាំងនគរបាលចរាចរស្រុក និងផ្តល់ព័ត៌មានទៅនគរបាលចរាចរខេត្តជួយស្ទាក់ចាប់រថយន្ត នោះតែមិនដឹងថា បើកគេចចូលតាមច្រកណាទេ ដោយគ្រាន់តែក្តាប់បានស្លាកលេខ ម៉ាករថយន្ត និងពណ៌ប៉ុណ្ណោះ។ សមត្ថកិច្ចនឹងស្រាវជ្រាវឱ្យអស់ពីលទ្ធភាពរករថយន្តនោះ៕
No comments:
Post a Comment