រាជធានីភ្នំពេញ ៖ បុរសម្នាក់បានជួបគ្រោះថ្នាក់ចរាចរណ៍បណ្តាលឱ្យសន្លប់បាត់ ស្មារតីអស់រយៈពេល៤ថ្ងៃកន្លងមកហើយនៅពុំទាន់ដឹងខ្លួននៅឡើយទេ ។ ជាមួយនឹងស្ថានភាពជំងឺដ៏ធ្ងន់ធ្ងរនេះ ស្ត្រីជាប្រពន្ធរបស់បុរសរងគ្រោះដែលពេលនេះ រូបគាត់មានផ្ទៃពោះ៧ខែហើយនោះ បានលើកដៃសំពះសុំក្តីសន្តោសប្រោសប្រណីពីសប្បុរសជននានាមេត្តា ជួយឧបត្ថម្ភដល់គ្រួសារគាត់ដែលកំពុងជួបគ្រោះថ្នាក់ធ្ងន់ធ្ងរ ហើយគ្មានថវិកាសម្រាប់ព្យាបាល
ប្តី ។
ប្តី ។
ជួបជាមួយអ្នកយកព័ត៌មានកោះសន្តិភាពនៅក្នុង បន្ទប់សង្គ្រោះបន្ទាន់ (ICU) នៃមន្ទីរពេទ្យមិត្តភាពខ្មែរ-សូវៀត នាព្រឹកថ្ងៃទី២៨ កក្កដា ស្ត្រីឈ្មោះផន ភាម ដែលជាប្រពន្ធរបស់បុរសរងគ្រោះឈ្មោះបូម ធឿន អាយុ៥៥ឆ្នាំ ដែលកំពុងសន្លប់ស្តូកស្តឹងនៅលើគ្រែនៃបន្ទប់សង្គ្រោះក្នុង មន្ទីរពេទ្យបានរៀបរាប់ថា ប្តីរបស់គាត់បានរងគ្រោះថ្នាក់សន្លប់បាត់ស្មារតីដោយសារឧប្បត្តិ ហេតុគ្រោះថ្នាក់ចរាចរណ៍ដែលកើតឡើងនៅឯខេត្តតាកែវ កាលពីថ្ងៃទី២៥ កក្កដា កន្លងមក ។ ប្តីរបស់គាត់ត្រូវបានបញ្ជូនមកព្យាបាលនៅមន្ទីរពេទ្យមិត្តភាព ខ្មែរ-សូវៀត ។
ស្ត្រីដដែលបានបន្តថា គាត់មានទីលំនៅខេត្តរតនគិរី ។ តែនៅថ្ងៃកើតហេតុ ប្តីរបស់គាត់បានមកលេងផ្ទះបងប្អូននៅខេត្តតាកែវ ហើយជិះម៉ូតូដួលបោកក្បាលរងរបួសធ្ងន់ធ្ងរ ។ ដោយសារតែប្តីរបស់គាត់ចាំបាច់ត្រូវចំណាយថវិកាសម្រាប់ព្យាបាល ហើយពេលនេះគាត់ជាប្រពន្ធគ្មានប្រាក់កាស សូម្បីថ្លៃថ្នាំពេទ្យបន្តិចបន្តួច ក៏គ្មានដែរ ។ ហេតុដូច្នេះគាត់ក៏ដាច់ចិត្តពឹងពាក់ក្រុមគ្រូពេទ្យនៃ មន្ទីរពេទ្យមិត្តភាពខ្មែរ-សូវៀត មេត្តាជួយរកអង្គការមនុស្សធម៌ ឬក៏សប្បុរសជននានាជួយសង្គ្រោះជីវិតគ្រួសាររបស់គាត់ផង ព្រោះគាត់ក្រខ្លាំងណាស់ ។ ម្យ៉ាងទៀតរូបគាត់ ជាស្ត្រីមានផ្ទៃពោះជិតគ្រប់ខែទៀត ។
ដោយទឹកចិត្តអាណិតអាសូរ ក្រុមគ្រូពេទ្យនៃមន្ទីរពេទ្យមិត្ត ភាពខ្មែរ-សូវៀតបានខិតខំយកចិត្តទុកដាក់ជួយសង្គ្រោះអាយុជីវិត បុរសអភ័ព្វខាងលើនេះទៅតាមអ្វីដែលមន្ទីរពេទ្យមានលទ្ធភាព ។ រីឯបញ្ហាអំពាវនាវស្វែងរកសប្បុរសជនផ្សេងៗដើម្បីជួយ ឧបត្ថម្ភដល់ក្រុមគ្រួសារទុរគតខាងលើនេះ លោកគ្រូពេទ្យមួយរូបបានទូរស័ព្ទមកកាន់ការិយាល័យនិពន្ធកោះសន្តិភាព ដើម្បីសុំជួយចុះផ្សាយព័ត៌មានអំពាវនាវដល់សប្បុរសជននានា ដើម្បីជួយសង្គ្រោះដល់គ្រួសាររងគ្រោះខាងលើនេះផង ព្រោះកោះសន្តិភាពធ្លាប់បានជួយអំពាវនាវរកសប្បុរសជន ដើម្បីជួយសង្គ្រោះពលរដ្ឋក្រីក្រ និងប្រជាពលរដ្ឋជួបឧបសគ្គជីវិតផ្សេងៗបានជាច្រើននាក់មកហើយ ។
តាមរយៈការលើកឡើងខាងលើ កោះសន្តិភាពសង្ឃឹមថា នឹងមានមនុស្សចិត្តបុណ្យជួយចូលរួមរំលែកនូវទុក្ខវេទនា ជាក់ស្តែងរបស់គ្រួសារទុរគតខាងលើនេះជាមិនខានឡើយ ។ អ្វីដែលធ្វើឱ្យមិត្តអ្នកអានបានដឹង ហើយក្តុកក្តួលចិត្តចង់ចូលរួមបរិច្ចាគជួយសង្គ្រោះដល់ជីវិត បុរស-ស្ត្រីខាងលើនេះ គឺដោយសារតែបានស្តាប់ស្ត្រីឈ្មោះផន ភាម រៀបរាប់ថា គាត់មានថវិកាបន្តិចបន្តួចផ្តាច់ពីការហូបចុកប្រចាំថ្ងៃរបស់ កូន៣នាក់នៅឯស្រុក ដើម្បីជិះរថយន្តមកមើលប្តីនៅក្នុងមន្ទីរពេទ្យ តែពេលនេះវាសនាប្តីគាត់មិនដឹងជាយ៉ាងណាឡើយ ដូច្នេះនៅពេលដែលរូបគាត់ឆ្លងទន្លេនៅខែខាងមុខនេះ គឺរឹតតែគ្មានអ្វីជាទីពឹងអាស្រ័យទេ ។ តែបើមានសប្បុរសជនជួយឧបត្ថម្ភដល់រូបគាត់យ៉ាងហោចណាស់ ក៏គាត់មានសោហ៊ុយត្រឡប់ទៅស្រុកមើលកូនចៅវិញដែរ ។
គ្រូពេទ្យបញ្ជាក់ថា ស្ថានភាពជំងឺរបស់បុរសរងគ្រោះខាងលើនេះ មានសង្ឃឹមតិចណាស់៕
No comments:
Post a Comment