ខេត្តស្វាយរៀង ៖យុវជន២នាក់បានជិះម៉ូតូដួលបោកក្បាលរបួសយ៉ាងធ្ងន់ធ្ងរ ហើយអះអាងពីមូលហេតុថា បានឃើញខ្មោចស្រីម្នាក់មកឈររាំងផ្លូវស្ទាក់ចាប់ម៉ូតូ ទើបធ្វើឱ្យរូបគេភិតភ័យក៏ចាប់ហ្វ្រាំងបណ្តាលឱ្យដួលម៉ូតូបោក ក្បាលទៅលើថ្នល់របួសធ្ងន់សន្លប់នៅនឹងកន្លែងកាលពីយប់ថ្ងៃទី១ សីហា ។ ជនរងគ្រោះទី១ ឈ្មោះពៅ ម៉ាញ ភេទប្រុស អាយុ១៩ឆ្នាំ ជាអ្នកបើកម៉ូតូរងរបួសផុងលលាដ៍ក្បាលបែកចិញ្ចើម ច្រមុះ ចង្កា និងដាច់ផ្ទៃមុខទាំងសងខាងសន្លប់នៅនឹងកន្លែង។ ទី២-ឈ្មោះសំ រ៉ា ភេទប្រុស អាយុ១៩ឆ្នាំ របួសស្រាល។ អ្នកទាំងពីរមានទីលំនៅភូមិស្វាយតាភ្ល ឃុំបាសាក់ ស្រុកស្វាយជ្រុំ។
ទាក់ទិនករណីខ្មោចលងនេះ ជនរងគ្រោះបានប្រាប់ថា នៅវេលាម៉ោង៦ល្ងាចថ្ងៃទី១ សីហា រូបគេបានបបួលមិត្តភក្តិជិះម៉ូតូម៉ាកស្មាស់ពណ៌ខ្មៅស៊េរី២០១០ ទៅលេងមិត្តភក្តិនៅក្រុងស្វាយរៀង រហូតដល់ម៉ោង៩និង៥០នាទីយប់ ក៏ជិះម៉ូតូឌុបគ្នាត្រឡប់មកផ្ទះវិញ។ លុះដល់ចំណុចកែងមុខវត្តកោះជុំ ភូមិតារាងបាល់ សង្កាត់គយត្របែក ក្រុងស្វាយរៀង ប្រហែលជាម៉ោង១០យប់ ស្រាប់តែមានខ្មោចស្រីម្នាក់សក់វែងអន្លាយហោះមកឈរស្ទាក់ពីមុខ ម៉ូតូរួចយកដៃប្រុងចាប់ម៉ូតូធ្វើឱ្យរូបគេ «ពៅ ម៉ាញ» ភ័យខ្លាចយ៉ាងខ្លាំងក៏ជាន់ហ្វ្រាំងម៉ូតូបណ្តាលឱ្យដួលបោកទៅលើ ថ្នល់របួសជាទម្ងន់។ បន្ទាប់មកឃើញខ្មោចស្រីនោះហោះទៅកាន់ដើមពោធិខាងកើតថ្នល់ មុខខ្លោងទ្វារវត្តកោះជុំ បាត់ស្រមោល រីឯរូបគេត្រូវបានអ្នកស្រុកជួយលើកដាក់លើម៉ូតូឌុបនាំមកមន្ទីរ ពេទ្យខេត្ត ដើម្បីសង្គ្រោះ។
បញ្ហាឃើញខ្មោចលងខាងលើនេះ លោកពៅ ស៊ាម អាយុ៦៦ឆ្នាំ ត្រូវជាឪពុកជនរងគ្រោះបានអះអាងថា ពិតជាមានខ្មោចលងប្រាកដមែន ហើយខ្មោចនោះ គឺជាខ្មោចស្រីមានផ្ទៃពោះម្នាក់មានស្រុកកំណើតនៅខេត្តកំពង់ចាម បានទៅលេងផ្ទះមិត្តភក្តិនៅក្រុងភ្នំពេញ។ ដេកលេងបានប្រាំថ្ងៃក៏ត្រូវមិត្តភក្តិបបួលជិះម៉ូតូមកលេងផ្ទះ បងប្អូននៅឯស្រុកកំណើតភូមិបាសាក់ ឃុំបាសាក់ ស្រុកស្វាយជ្រុំ។ ពេលជិះម៉ូតូមកដល់ភូមិស្វាយ ខាងកើតស្ពានកន្ទុយវៃចម្ងាយ១០០ម៉ែត្រ ទល់មុខសាលាបឋមសិក្សាកន្ទុយវៃអ្នកបើកម៉ូតូក៏ងោក និងរេចង្កូតធ្លាក់ពីលើផ្លូវជាតិលេខ១ ទៅបុកនឹងបង្គោលភ្លើងបាក់.ក ស្លាប់នៅនឹងកន្លែងកាលពីថ្ងៃទី១៣ មេសា ឆ្នាំ២០១១ វេលាម៉ោង៦ល្ងាច។ ស្រ្តីមានផ្ទៃពោះនោះគេពុំស្គាល់សាច់ញាតិទេ ហើយស្ត្រីជិះម៉ូតូមកជាមួយបានសុំឱ្យសមត្ថកិច្ចដឹកសពស្ត្រីរង គ្រោះទៅទុកនៅវត្តកោះជុំ លុះដល់ថ្ងៃទី១៤ មេសា ក៏ត្រូវតាព្លុកបូជាទៅ ពីព្រោះជាថ្ងៃបុណ្យចូលឆ្នាំទី២ផង។
លោក តាពៅ ស៊ាម បន្តទៀតថា ចាប់តាំងពីយកខ្មោចស្រីម្នាក់នោះមកទុក និងបូជានៅវត្តកោះជុំ គឺខ្មោចស្រីនោះតែងចេញលងគេជាញឹកញាប់មិនថាយប់ ឬថ្ងៃនោះទេ។ ចំណុចកើតហេតុនោះគិតត្រឹមឆ្នាំ២០០៥ ដែលរដ្ឋបានកសាងផ្លូវរួចរាល់មក កើតមានគ្រោះថ្នាក់ចរាចរណ៍បណ្តាលស្លាប់មនុស្សអស់៨នាក់ និងរបួសធ្ងន់-ស្រាលជាច្រើននាក់ ក៏ប៉ុន្តែបើគិតចាប់តាំងពីខ្មោចស្រីល្បីចេញលងនេះ គឺគ្រោះថ្នាក់កើតមានជាង១០ករណី និងស្លាប់២នាក់។
បច្ចុប្បន្ន ចាស់ទុំគណៈកម្មការអាចារ្យវត្តកំពុងព្រួយបារម្ភ ពុំដឹងធ្វើយ៉ាងណាដេញគ្រោះចង្រៃចេញពីទីនោះបាន៕
No comments:
Post a Comment