អាប់ភីស៊ីត ផ្តល់យោបល់ អំពីការបែងចែក អាសនៈដល់ យីងឡាក់

បាងកក៖ នាយករដ្ឋមន្រ្តីជិតខ្ទាតចេញ ពីតំណែង អាប់ភីស៊ីត វាចាជីវ៉ា អំពាវនាវឱ្យ នាយករដ្ឋមន្រ្តី ជិតចូលកាន់តំណែង លោកស្រី យីន ឡាក់ ស្តារស្ថានការណ៍ នយោបាយឱ្យ បានកាន់តែឆាប់ និងមិនគួរឱ្យមានការ ជ្រៀតជ្រែកខាងនយោបាយ ក្នុងការបែកចែកកៅរដ្ឋមន្រ្តី នៅក្នុងជួររដ្ឋាភិបាល។អាប់ភីស៊ីត និយាយនៅថ្ងៃព្រហស្បតិ៍ នេះថា នាយករដ្ឋមន្រ្តីថ្មី គួរលាតត្រដាងបញ្ហាដល់សាធារណជន និងធ្វើឱ្យមានទំនុកចិត្តដល់គ្រប់ភាគីទាំងអស់ នៅក្នុងដំណើរ ការរដ្ឋសភា។

លោកបន្ថែមថា នាយករដ្ឋមន្រ្តី ត្រូវតែមានទំនួលខុសត្រូវ សម្រាប់ការបែងចែកមុខតំណែង ខណៈសាធារណជនចង់បានថ្នាក់ដឹកនាំស្មោះត្រង់និងមានសមត្ថភាពដើម្បីធ្វើការបម្រើប្រទេសជាតិ ហើយមិនគួរឱ្យបញ្ហាស្រមោលអ្នកនយោបាយមាននៅក្នុងការជ្រើសរើសសមាជិកគណៈរដ្ឋមន្រ្តី។មេដឹកនាំគណបក្ស ប្រជាធិបតេយ្យរូបនេះ បន្តទៀតថា វានឹងអាស្រ័យលើគណៈប្រតិបត្តិ របស់គណបក្សសម្រេចថា រដ្ឋាភិបាលស្រមោល ត្រូវបង្កើតយ៉ាងដូចម្តេច។ការទាមទាររបស់រណសិរ្សរូបរួម ដើម្បីប្រជាធិបតេយ្យប្រឆាំង របបផ្តាច់ការឱ្យដោះលែងអ្នកគំាទ្រក្រុមអាវលឿងនោះ លោកអាប់ភីស៊ីត និយាយថា អាជ្ញាធរតុលាការ នឹងពិនិត្យមើល ពីបញ្ហានោះ មិនមែនផ្នែករដ្ឋបាលនោះទេ៕