រាជធានីភ្នំពេញ ៖ លោកយាយជាអ្នកធ្វើកាំជ្រួចលក់ម្នាក់ត្រូវរំសេវកាំជ្រូច ផ្ទុះឆេះហុយទ្រលោមខ្មៅពេញខ្លួនប្រាណ ខណៈពេលដែលគាត់អង្គុយញីរំសេវដាក់ហាលថ្ងៃឱ្យស្ងួត កាលពីវេលាម៉ោង១និង៤៥នាទីរសៀលថ្ងៃទី៤ សីហា នៅក្រោយផ្ទះ ស្ថិតនៅក្នុងភូមិអង្ក្រង ឃុំអង្គពពេល ស្រុកគងពិសី ខេត្តកំពង់ស្ពឺ។
លោកតាឈ្មោះឌឿ អិន អាយុ៦០ឆ្នាំ មានទីលំនៅកើតហេតុខាងលើ បានរៀបរាប់ប្រាប់ថា ស្ត្រីរងគ្រោះត្រូវជាប្រពន្ធរបស់គាត់ឈ្មោះឡោ ហន អាយុ៥៩ឆ្នាំ ប្រកបរបរធ្វើកាំជ្រួចលក់តាំងពីដូនតាមក។
លោកតាបានបន្តថា នៅថ្ងៃនោះផ្ទះរបស់គាត់បានយករំសេវដែលបានស្លរវាងស្ពាន់ធ័រ ក្រាម យកទៅរំងាស់ក្នុងទឹករហូតឡើងខាប់ជិតខះទឹក ដូចនំកូ ទើបយកវាទៅហាលលើកន្ទេលរហូតដល់ស្ងួត ក្លាយទៅជារំសេវ សម្រាប់ដាក់ក្នុងកាំជ្រួច។ ប៉ុន្តែខណៈពេលហាលជិតស្ងួតក្លាយជារំសេវនោះ វាតែងតែ មានរមូលដុំៗ ដូច្នេះត្រូវអង្គុយញីច្របាច់វាឱ្យម៉ដ្ឋ ទើបលោកយាយជាប្រពន្ធគាត់បានយកកញ្ច្រែងជ័រទៅអង្គុយញីហើយ ច្របាច់វាឱ្យម៉ដ្ឋ ។ ពេលកំពុងតែញីច្របាច់ស្របនឹងអាកាសធាតុក្តៅខ្លាំងផង ស្រាប់តែបែកផ្កាភ្លើងធ្វើឱ្យរំសេវផ្ទុះហុយផ្សែង ទ្រលោម។ គាត់ឮសូរសំឡេងផ្ទុះដូចអុជកាំជ្រួចដូចនេះ ក៏ស្ទុះទៅមើលឃើញផ្សែងខ្មៅហុយទ្រលោម ចំណែកប្រពន្ធរបស់គាត់ឆេះសម្លៀកបំពាក់អស់ ហើយ មុខខ្មៅដូចឆ្មា។ប្រភពព័ត៌មានបន្តថា បន្ទាប់ពីឃើញដូច្នេះក៏បញ្ជូនលោកយាយទៅសង្គ្រោះនៅមន្ទីរ ពេទ្យព្រះកុសុមៈតែម្តង ដោយត្រូវរលាកតាំងពី សក់ក្បាលរហូតដល់ជើងត្រូវរោលខ្មៅ ហើយគ្រូពេទ្យកំពុងព្យាបាល ។
លោកតាបន្តទៀតថា មុខរបរធ្វើកាំជ្រួចលក់ប្រឈមនឹងគ្រោះថ្នាក់ច្រើនណាស់ មិនអាចចៀសផុតទេ ហើយគ្រោះថ្នាក់ដែលត្រូវប្រឈមមុខជាងគេ គឺទីមួយពេលហាលរំសេវ និងទីពីរ ពេលបុករំសេវឱ្យម៉ដ្ឋនេះតែម្តង។ គាត់បញ្ជាក់ថា ទោះបីជាមានបទពិសោធន៍ក៏នៅតែភ្លាត់ស្នៀតមិនអាចចៀសផុតបាន ៕
No comments:
Post a Comment