ខេត្តស្វាយរៀង ៖ មានការភ្ញាក់ផ្អើលមួយដោយប្រជាពលរដ្ឋគិតថា ជារឿងចម្លែកកម្របានឃើញណាស់ គឺមេគោមួយក្បាលកើតកូនមករហូតទៅដល់៤ក្បាល ធ្វើឱ្យមនុស្សម្នានាំគ្នាទៅចោមរោមមើលកកកុញ ហើយអុជធូប អុជទៀន ដាក់តង្វាយ ចេក ផ្លែឈើ និងប្រាក់ ដើម្បីសុំសេចក្តីសុខ និងលាភសំណាង។ បើតាមលោកសូ ខេន អាយុ៥១ឆ្នាំ នៅភូមិត្រោក ឃុំឈើទាល ស្រុកស្វាយជ្រំ ដែលជាម្ចាស់គោចម្លែកនោះបានប្រាប់កោះសន្តិភាពថា មេគោរបស់គាត់សម្បុរត្នោតបានកើតកូនរហូតដល់ទៅ៤ក្បាល គឺញី២ក្បាល ឈ្មោល២ក្បាល កាលពីថ្ងៃទី៣១ កក្កដា ២០១១ វេលាម៉ោង៧ព្រឹក ។
លោកសូ ខេន បន្តទៀតថា នៅវេលាម៉ោង៧ព្រឹក កើតបានកូនមួយក្បាលឈ្មោលសម្បុរស, វេលាម៉ោង៧និង១០នាទី កើតបានកូនញីមួយក្បាលសម្បុរស, នៅម៉ោង៧និង៤០នាទី កើតបានកូនមួយក្បាលញីសម្បុរត្នោត, លុះម៉ោង៨និង១០នាទីកើតបានកូនមួយក្បាលទៀត ឈ្មោលសម្បុរក្រហម ហើយកូនគោទាំង៤ក្បាលនោះកើតបានតែប្រមាណ៥នាទីក៏ងាប់ ...ប្រសិនបើកូនគោទាំង៤ក្បាលនោះរស់វិញ គឺគាត់ពិតជាមានលាភសំណាងណាស់ ព្រោះឆ្នាំនេះមានគោដល់ទៅ៤ក្បាល...ម្យ៉ាងទៀតកម្រមានគោ ណាកើតកូនភ្លោះ៤ក្បាលបែបនេះណាស់ បើមានយ៉ាងច្រើន២ក្បាលប៉ុណ្ណោះ។
លោកសូ ខេន បានមានប្រសាសន៍ថា រូបគាត់មានប្រពន្ធឈ្មោះញ៉ែម ថេន អាយុ៥០ឆ្នាំ មានកូន៦នាក់ក្នុងបន្ទុក ក្នុងនោះស្រីម្នាក់ ហើយបានទិញគោញី២ក្បាល មកចិញ្ចឹមមួយក្បាលសម្បុរត្នោត និងមួយក្បាលទៀតសម្បុរក្រហម ។ចិញ្ចើមរហូតដល់គោមានអាយុជាង៣ឆ្នាំគឺនៅអំឡុងខែ កុម្ភៈ ឆ្នាំ២០១០ ស្រាប់តែមានពួកចោរចូលលួចដឹកចេញពីក្រោលទៅបាត់ តែរយៈពេលពីរម៉ោងក៏តាមស្ទាក់ចាប់បានមកវិញ រីឯចោរបានរត់គេចខ្លួនបាត់ស្រមោល។ រហូតដល់ខែមករា ឆ្នាំ២០១១ មេគោមានអាយុបាន៤ឆ្នាំ ហើយទាំងពីរក្បាលនេះ ក៏ផើមដំណាលគ្នាតែម្តង លុះនៅថ្ងៃទី៣១ កក្កដា ២០១១ វេលាម៉ោង៧ព្រឹក មេគោសម្បុរត្នោតក៏ឈឺពោះកើតកូន គឺផើមបានតែ៧ខែទេ មានន័យថា មេគោនោះកើតកូនមិនគ្រប់ខែ។ បើតាមធម្មតាមេគោត្រូវផើមដល់៩ខែ ដប់ថ្ងៃដូចមនុស្សដែរ តែនេះកើតមិនគ្រប់ខែ ទើបងាប់ជាបន្តបន្ទាប់ទាំង៤ក្បាលគួរឱ្យសោកស្តាយ ចំណែកមេគោសម្បុរក្រហមនៅកំពុងផើមដដែល៕
No comments:
Post a Comment