រាជធានីភ្នំពេញ ៖ បុរសជនជាតិចិនដីគោកម្នាក់ស្លាប់នៅក្នុងបន្ទប់ធ្វើការនៃរោងចក្រ កាត់ដេរសម្លៀកបំពាក់យីហោជូ សីញ ហ្គាមិន ស្ថិតក្នុងក្រុមទី៣ ភូមិខ្ទរ សង្កាត់ព្រៃលៀប ខណ្ឌឫស្សីកែវ កាលពីវេលាម៉ោង៩យប់ថ្ងៃទី២២ កក្កដា ក្រោយពេលផ្ញើសារប្រាប់ប្រពន្ធថា រូបគាត់មិនស្រួលខ្លួន។សាកសពបុរសដែលស្លាប់ឈ្មោះឆាវ ប៉ អាយុ៣៧ឆ្នាំ ជនជាតិដីគោក ជាបុគ្គលិករោងចក្រកាត់ដេរសម្លៀកបំពាក់ ស្នាក់នៅរោងចក្រតែម្តង មានប្រពន្ធឈ្មោះហួង សៀចាវ អាយុ៣១ឆ្នាំ ជនជាតិចិនដីគោកដូចគ្នា ធ្វើការនៅក្រុមហ៊ុនហៅអុីង ស្ថិតនៅសង្កាត់បឹងកក់ទី២ ខណ្ឌទួលគោក។
តាមការឱ្យដឹងពីប្រពន្ធឈ្មោះហួង សៀចាវ ឱ្យដឹងថា ប្ដីរបស់នាងកាលពីវេលាម៉ោង៤រសៀលបានផ្ញើសាទៅប្រាប់ថា គាត់មិនស្រួលខ្លួន ពេលនោះនាងបានទូរស័ព្ទមកប្រាប់ថាឱ្យសុំច្បាប់ទៅគ្លីនិកឡុង ហួរ ដែលមានទីតាំងនៅតាមវិថីនេរុហ៍ ក្នុងសង្កាត់ផ្សារដេប៉ូទី១ ខណ្ឌទួលគោក ។ នាងបញ្ជាក់ថា គ្លីនិកនោះជាកន្លែងដែលប្ដីតែងតែទៅពិនិត្យសុខភាព។ បន្ទាប់មកទៀតនាងទូរស័ព្ទទៅ២ដងទៀត តែគ្មានអ្នកទទួល ទើបចុងក្រោយមានអ្នកទទួលប្រាប់ថា ប្ដីនាងសន្លប់ យកទៅសង្គ្រោះនៅមន្ទីរពេទ្យកាល់ម៉ែត ។
ប្រភពព័ត៌មានឱ្យដឹងថា ខណៈពេលបញ្ជូនជនរងគ្រោះទៅដល់មន្ទីរពេទ្យកាល់ម៉ែតចូលក្នុង បន្ទប់សង្គ្រោះបន្ទាន់ គ្រូពេទ្យប្រាប់ថា ស្លាប់បាត់ទៅហើយ ក៏បញ្ជូនសាកសពយកទៅតម្កល់ទុកនៅសាលសពដើម្បីរង់ចាំសាច់ញាតិមក ទទួលយកទៅធ្វើបុណ្យតាមប្រពៃណី៕
No comments:
Post a Comment