កំពត ៖ បុរសរកស៊ីខាងជំនួញផ្លូវឆ្ងាយម្នាក់ បន្ទាប់ពីបានលក់សម្ភារៈរបស់ខ្លួនអស់រួចរាល់ហើយនោះក៏ត្រឡប់មក ផ្ទះវិញ តែពុំទាន់អង្គុយបានក្តៅគូទផងស្រាប់ទៅយកថ្នាំបំពុលសំរាប់ សំលាប់សត្វកណ្តុរមកលេបអស់ជាច្រើនកញ្ចប់ ប៉ងធ្វើអត្តឃាតដោយគ្មានមូលហេតុ ហើយត្រូវបានក្រុមគ្រួសារដឹងទាន់ ទើបដឹកបញ្ជូនទៅកាន់មន្ទីរពេទ្យបង្អែកស្រុកភ្លាមៗ ដើម្បីសង្គ្រោះអាយុជីវិត។
ហេតុការណ៍បុរសលេបថ្នាំពុលប៉ុនប៉ងសម្លាប់ខ្លួនមិនបានសំរេចខាងលើ កើតឡើងនៅចំណុចផ្ទះរបស់ជនរងគ្រោះ ឈ្មោះឈុន ប៉ន ភេទប្រុសអាយុ៣៦ឆ្នាំ ស្ថិតនៅក្នុងភូមិស្វាយទង ឃុំស្វាយទង ស្រុកកំពង់ត្រាច ខេត្តកំពត កាលពីក្បាលព្រលប់ម៉ោង១៨និង១៥នាទី ថ្ងៃទី០៧ខែសីហា ឆ្នាំ២០១១។
តាមការរៀបរាប់របស់ស្ត្រីជាប្រពន្ធបានឱ្យដឹងថា រយៈពេលកន្លងមកប្តីគាត់ ឈ្មោះ ឈុន ប៉ន នេះពុំសូវទំនេរនៅផ្ទះឥតប្រយោជន៍នោះទេ គឺតែងតែចាកចេញទៅរកស៊ីនៅឯខេត្តឆ្ងាយ ដូចជា ភ្នំពេញ តាកែវ កណ្តាល កំពង់ឆ្នាំង កំពង់ស្ពឹ ពោធិ៍សាត់ និងបាត់ដំបងជាដើម។ស្ត្រីជាប្រពន្ធក៏បានបញ្ជាក់ថា សព្វថ្ងៃនេះមុខរបរដែលប្តីរបស់គាត់ ដោះដូរធ្វើជំនួញនោះ មានចាន ឆ្នាំង៘ ដោយការលក់ដូរសម្ភារៈខាងលើនេះប្តីគាត់ទៅតែឯងប៉ុណ្ណោះ ឯរូបគាត់ជាប្រពន្ធនៅចាំផ្ទះមើលថែកូនចៅ ហើយរយៈពេលចាកចេញទៅធ្វើជំនួញត្រូវចំណាយអស់ពេល១៥ទៅ២០ថ្ងៃ ទើបប្តីគាត់ដែលជាជនរងគ្រោះវិលត្រឡប់មកផ្ទះវិញជួបជុំប្រពន្ធកូន ។ស្ត្រីជាប្រពន្ធបានឱ្យដឹងទៀតថាចំពោះមូលហេតុដែលបណ្តាលឱ្យប្តីគាត់គិត ខ្លីប៉ងសម្លាប់ខ្លួនដោយផឹកថ្នាំកណ្តុរនេះ គាត់ពុំបានដឹងរឿងហេតុដោយសារអ្វីឱ្យប្រាកដនោះទេ គឺអង្គុយលេងម្នាក់ឯងសុខៗស្រាប់តែយកថ្នាំសម្លាប់សត្វកណ្តុរមកផឹកធ្វើឱ្យ ប្រកាច់ក្អួតវក់វីស្ទើរចាប់ពុំឈ្នះ នេះសំណាងហើយដែលមានអ្នកជិតខាងឃើញទាន់ ថែមទាំងជួយដឹកមកឱ្យគ្រូពេទ្យសង្គ្រោះបន្ទាន់ បើពុំមានអ្នកឃើញទេ ច្បាស់ជាកើតបញ្ហាធំជាមិនខានឡើយ។
បើតាមប្រភពពីអ្នកជិតខាងដែលបានជួយនាំបុរសរងគ្រោះមកសង្គ្រោះនៅមន្ទីរពេទ្យ និយាយប្រាប់ថាបុរសគិតខ្លីខាងលើ ជារឿយៗតែងតែមានមុខរបររកស៊ី លក់ដូរចាន ឆ្នាំងស្ទើរគ្រប់ខេត្ត ក្រុង ដោយបានចាកចេញពីផ្ទះ មិនក្រោមកន្លះខែនោះទេទើបត្រឡប់ចូលផ្ទះវិញ ហើយរាល់លើកពុំដែលមានរឿងរ៉ាវអ្វីសោះ ស្រាប់តែលើកនេះពេលទៅរកស៊ីបាត់ពីផ្ទះជាង១០ថ្ងៃ លុះត្រឡប់មកវិញអង្គុយអត់ទាន់ក្តៅគូទនិងមិនទាន់បានហូបបាយល្ងាចជួបជុំកូន ប្រពន្ធផង បែរជាកើតរឿងភ្ញាក់ផ្អើលពេញភូមិ ដោយសារបុរសចិត្តស្លុយខាងលើនេះផឹកថ្នាំពុល ធ្វើឱ្យមានភាពងឿងឆ្ងល់និងតក់ស្លុតយ៉ាងខ្លាំងពីសំណាក់ក្រុមគ្រួសារផងដែរ។ ប្រភពបានឱ្យដឹងទៀតថា ករណីបុរសនេះលេបថ្នាំកណ្តុរប៉ងធ្វើអត្តឃាតខាងលើ ពុំមានអ្នកណាដឹងពីមូលហេតុអ្វីទាំងអស់ សូម្បីក្រុមគ្រួសារ និប្រពន្ធកូន ក៏និយាយថាមិនដឹងរឿងអ្វីដែរ គឺបានត្រឹមតែឈរគ្រវីក្បាលដូចគោស្រាំងទិចក្នុងកាយវិការហួសចិត្តប៉ុណ្ណោះ។ចំណែកបុរសរងគ្រោះដែលផឹកថ្នាំពុលត្រូវបានក្រុមគ្រូពេទ្យជួយសង្គ្រោះ ដោយលាងក្រពះ និងព្យួរសេរូមដាក់ថ្នាំបន្សាបឱ្យរួចចាកផុតពីគ្រោះថ្នាក់ហើយ៕
No comments:
Post a Comment