តាម AFP ផ្សាយឱ្យដឹងថា លោកស្រីយីង ឡាក់ ស៊ីណាវ៉ាត្រា ជាប្អូនស្រីរបស់លោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ បានឈ្នះឆ្នោតក្នុងសភា ក្លាយជានាយករដ្ឋមន្ត្រីថៃទី២៨ នៅក្នុងប្រទេស និងរំពឹងថា ព្រះមហាក្សត្រ នឹងឡាយព្រហស្តលេខាតែងតាំងជាផ្លូវការក្នុងអំឡុងពេលឆាប់ៗនេះ ។
នាយករដ្ឋមន្ត្រីថ្មីរបស់ថៃ បានបញ្ជាក់ប្រាប់AFP នៅក្រោយពេលបោះឆ្នោតក្នុងសភាថា«ខ្ញុំត្រេកអរក្នុងការចាប់ ផ្តើមការងារ ប្រជាជនគឺជាអ្នកសម្រេចថា តើការបំពេញតួនាទីរបស់ខ្ញុំធ្វើឱ្យពួកគេពេញចិត្ត និងស្របតាមពួកគេសង្ឃឹមទុកឬអត់ ?
អ្នកវិភាគជាច្រើននាក់មានជំនឿចិត្តថា បទ ពិសោធន៍សំខាន់របស់អ្នកនយោបាយថ្មីមួយរូបនេះគឺមិនចៀសផុត ពីរឿងដែលលោកស្រីអាចគ្រប់គ្រងអំណាចនៅក្នុងប្រទេសដែលមានការ ផ្លាស់ប្តូរអ្នកដឹកនាំជាញឹកញាប់បានឬអត់? ចាប់តាំងពីការផ្លាស់ប្តូរគ្រប់គ្រងជារបបប្រជាធិបតេយ្យក្នុង ឆ្នាំ១៩៣២ និងមានរដ្ឋប្រហារដល់ទៅ១៨លើក ។
លោកគ្រីស បេកហ្គ័រ អ្នកវិភាគនយោបាយថៃមួយរូបបញ្ជាក់ឱ្យដឹងថា «យើងស្ថិតនៅកណ្តាលទំនាស់ដ៏ធ្ងន់ធ្ងរនៅក្នុងប្រទេសដែលមាន គោលគំនិតបែកបាក់ទាក់ទងនឹងអ្វីដែលរដ្ឋាភិបាលគួរកើតឡើងនិងអ្វី ដែលរដ្ឋាភិបាលគួរអនុវត្ត» ។ ទោះជាយ៉ាងណាក៏ដោយ លោកបេកហ្គ័រ បញ្ជាក់បន្តទៀតថា សំឡេងភាគច្រើនក្នុងសភារបស់លោកស្រីយីង ឡាក់ រួមទាំងនិន្នាការជាតិនិយម និងសកម្មភាពរបស់ក្រុមអាវលឿងដែលចុះខ្សោយ រួមនឹងកងទ័ពខ្វះខាតសំឡេងគាំទ្រពីប្រជាជនប្រហែលធ្វើឱ្យ ស្ត្រីដែលជានាយករដ្ឋមន្ត្រីអាចមានឱកាសច្រើនក្នុងការដឹក នាំប្រទេស ។
បណ្តាអ្នកវិភាគបានធ្វើការកត់សម្គាល់ថា ទោះបីជានាយករដ្ឋមន្ត្រីស្ត្រីដំបូងរបស់ថៃ អាចឈានចូលក្នុងការបង្ហាញមុខជាប្រវត្តិសាស្ត្រក្នុងប្រទេស ក៏ដោយ ប៉ុន្តែក៏អាចប្រឈមមុខនឹងការរើបម្រះនៅគ្រប់ផ្នែក ដើម្បីកាន់តំណែងជាថ្នាក់ដឹកនាំប្រទេសគ្រប់អាណត្តិ។
លោកម៉ៃឃើល ម៉ុនតេសាណូ អ្នកវិភាគមកពីស្ថាប័នស្រាវជ្រាវអាស៊ាន នៅសិង្ហបុរី បានបញ្ជាក់ថា «លោកស្រីយីងឡាក់ ជាមេដឹកនាំជាន់ខ្ពស់ដែលគ្មានការទទួលស្គាល់ពីអ្នកមានឥទ្ធិពល ជាច្រើននាក់នៅប្រទេសថៃ។ មិនយូរមិនឆាប់ យើងនឹងបានឃើញការព្យាយាមផ្តួលរំលំរដ្ឋាភិបាលរបស់លោកស្រីក្នុងវិធី សាស្ត្រផ្សេងៗបាន»។ ការកាន់តំណែងជានាយករដ្ឋមន្ត្រីថៃឱ្យគ្រប់រយៈពេល៤ឆ្នាំ (គ្រប់អាណត្តិ) ហាក់ដូចជាផ្អែកលើសមត្ថភាពពិសេសលើបុគ្គលច្រើនជាងការប្រតិបត្តិ ហើយកាលពីពេលកន្លងមក នាយករដ្ឋមន្ត្រីដែលបានពីការបោះឆ្នោតមានតែម្នាក់ដែល អាចអនុវត្តបានគឺលោកថាក់ស៊ីន ស៊ីណាវ៉ាត្រា ។
ការធ្វើរដ្ឋប្រហារកាលពីឆ្នាំ២០០៦ ធ្វើឱ្យប្រទេសថៃ ធ្លាក់ក្នុងវិបត្តិទំនាស់រហូតដល់ទៅ៥ឆ្នាំ ព្រោះភាគីប្រឆាំងនឹងលោកថាក់ស៊ីន ដែលមានវណ្ណៈខ្ពស់ ស្ថិតនៅពីក្រោយក្រុមអ្នកគាំទ្រជាប្រជាជនដែលចេញមុខធ្វើ បាតុកម្មឥតឈប់ឈរ (ក្រុមអាវលឿង)។ អ្នកវិភាគបានបញ្ជាក់ថា លោកស្រីយីងឡាក់ នឹងកាន់អំណាចបានយូរប៉ុនណា អាស្រ័យលើសមត្ថភាពក្នុងការផ្សះផ្សាចំពោះមុខក្រុមអាវក្រហម ដែលទាមទាររកភាពយុត្តិធម៌ ពីហេតុការណ៍រំសាយក្រុមបាតុករកាលពីឆ្នាំ២០១០ និងចំពោះមុខបណ្តាជនវណ្ណៈខ្ពស់ ព្រមទាំងកងទ័ពដែលស្អប់ខ្ពើមនយោបាយផ្តាច់ការរបស់ លោកថាក់ស៊ីន។
ចាប់តាំងពីត្រូវទម្លាក់ដោយរដ្ឋប្រហារកាល ពី៥ឆ្នាំមុន លោកថាក់ស៊ីន សម្រេចចិត្តភៀសខ្លួនទៅនៅបរទេស ដើម្បីគេចពីទោសជាប់ពន្ធនាគារពីបទប្រព្រឹត្តអំពើពុករលួយ។ ឯបក្សពួករបស់លោកក៏ត្រូវតុលាការផ្តាច់សិទ្ធិផ្នែកនយោ បាយ ដោយអ្នកវិភាគបានព្យាករណ៍ថា លោកស្រីយីងឡាក់ ក៏អាចនឹងត្រូវ «រដ្ឋប្រហារដោយយុទ្ធសាស្ត្រយុត្តិធម៌»ដូចគ្នា។
លោកថិត ទីណាន់ ពង្សសុទ្ធធីរ៉ាក់ សាស្ត្រាចារ្យនៅមហាវិទ្យាល័យជូឡាឡុងកន ថ្លែងថា «នេះគឺជាការប្រកួតប្រជែងសម្រាប់លោកស្រីដែលត្រូវចៀសវាងការ ផ្តួលរំលំទាំងប្រព័ន្ធបាន។លោកស្រីត្រូវរិះរកនិន្នាការ ដែលមានប្រសិទ្ធភាព ដើម្បីទប់ទល់នឹងសត្រូវរបស់លោកថាក់ស៊ីន ត្រូវចូលឱ្យកៀកនឹងពួកគេ (អ្នកមានឥទ្ធិពល) និងតែងតាំងបុគ្គលដ៏ស័ក្តិសម»។
ទោះបីជាកងទ័ពមិនហ៊ានធ្វើរដ្ឋប្រហារជាថ្មី ក្នុងពេលបច្ចុប្បន្ន ប៉ុន្តែក៏គ្មានន័យថា រដ្ឋាភិបាលលោកស្រីយីងឡាក់ នឹងអាចគ្រប់គ្រងប្រទេសបានយ៉ាងរលូនដោយគ្មានការជ្រៀតជ្រែក ដែរ។លោកថិតទីណាន់ ថ្លែងថា «កងទ័ពអាចសហការជាមួយក្រុមផ្សេង ឬស្ថាប័នផ្សេងទៀតដើម្បីរារាំងការបំពេញការងាររបស់រដ្ឋាភិ បាល»៕
No comments:
Post a Comment