* ក្លឹប Wolfsburg បន្តកិច្ចសន្យាជាមួយ កីឡាករហាសេបេ រហូតដល់ឆ្នាំ២០១៤
ក្លឹប Wolfsburg របស់អាល្លឺម៉ង់ បង្ហើបឱ្យដឹងថា កីឡាករម៉ាកូតូ ហាសេបេ របស់ជប៉ុន បានសម្រេចចិត្តបន្តកិច្ចសន្យាជាមួយក្លឹបរយៈពេល២ឆ្នាំ ក្រោយពីកីឡាករអាយុ២៧ឆ្នាំរូបនេះ ក្លាយជាផ្នែកមួយរបស់ក្លឹប ក្នុងក្រុមកីឡាកររបស់ក្លឹបដែលដណ្តើមបានជើងឯកក្នុងលីក Bundesliga កាលពីឆ្នាំ២០០៨-២០០៩ ។ ក្លឹប Wolfsburgក្នុងក្របខណ្ឌ Bundesliga អាល្លឺម៉ង់បញ្ជាក់ថា កីឡាករម៉ាកូតូ ហាសេបេ បានសម្រេចចិត្តបន្តកិច្ចសន្យាជាមួយក្លឹបរយៈពេល២ឆ្នាំ កាលពីថ្ងៃព្រហស្បតិ៍ ទី២១កក្កដា កន្លងទៅ ធ្វើឱ្យសាមីខ្លួនក្លាយជាសមាជិកកីឡាករក្នុងក្លឹប Wolfsburg រហូតដល់ឆ្នាំ២០១៤ ។
* ក្លឹប Chelsea ទិញកីឡាករខ្សែប្រយុទ្ធ Lukaku ពីក្លឹប Anderlecht
យោងទៅតាមប្រភពព័ត៌មានស៊ី-អិន-អិន ចេញផ្សាយកាលពីថ្ងៃអាទិត្យ ទី៧ សីហា ឆ្នាំ២០១១ បានឱ្យដឹងថា ក្លឹប Chelsea បានសម្រេចទិញយកកីឡាករខ្សែប្រយុទ្ធ Lukaku វ័យ១៨ឆ្នាំ ពីក្លឹប Anderlecht ។ នៅក្នុងសេចក្តីថ្លែងការណ៍ដែលបានចុះផ្សាយនៅលើគេហទំព័ររបស់ក្លឹប Chelsea បានឱ្យដឹងថា ៖ ដំណើរការចរចាកំពុងតែប្រព្រឹត្តទៅយ៉ាងរលូន ហើយបញ្ហាដែលនៅសេសសល់តិចតួច នឹងធ្វើទៅតាមក្រោយជាមួយកីឡាករផ្ទាល់។ នៅក្នុងសេចក្តីថ្លែងការណ៍នោះ មិនបានបង្ហើបឱ្យដឹងពីតម្លៃខ្លួន និងរយៈពេលកុងត្រារបស់កីឡាករ Lukaku នោះទេ ។ លោក Villas Boas គ្រូបង្វឹកក្លឹបតោខៀវ Chelsea បាននិយាយថា៖ កីឡាករ Lukaku គឺជាកីឡាករវ័យក្មេងដែលសំបូរទៅដោយទេពកោសល្យ ហើយខ្ញុំត្រូវការកីឡាករប្រភេទនេះ ដើម្បីជួយពង្រឹងក្លឹប ។ គួររំលឹកដែរថា កីឡាករ Lukaku បានចូលមកលេងឱ្យក្លឹប Anderlecht តាំងពីលោកមានអាយុ១៦ឆ្នាំ ដោយបង្ហាញវត្តមានចំនួន៧៣លើកហើយស៊ុតបាល់បាន៣៣គ្រាប់ ។ ចំណែកឯអាជីពក្រុមជម្រើសជាតិវិញ លោកធ្លាប់បានបង្ហាញវត្តមានចំនួន១០លើក ហើយស៊ុតបាល់បញ្ចូលទីបាន២គ្រាប់។
* Barcelona យល់ព្រមលក់កីឡាករបូយ៉ាន ហ្គ័រហ្គីស ឱ្យក្លឹប Roma
Barcelona ជាក្លឹបល្បីនៅអេស្ប៉ាញសម្រេចលក់កីឡាករបូយ៉ាន ហ្គ័រហ្គីស ឱ្យក្លឹប Roma របស់អ៊ីតាលី ក្នុងតម្លៃខ្លួន១២លានអឺរ៉ូ ប៉ុន្តែមានលក្ខខណ្ឌនឹងទិញខ្សែប្រយុទ្ធអាយុ២០ឆ្នាំរូបនេះ មកលេងឱ្យក្លឹបវិញក្នុងរយៈពេល២ឆ្នាំខាងមុខ ។ Barcelona អាចទិញកីឡាករបូយ៉ានបានក្នុងដំណាច់រដូវកាល២០១២-២០១៣ ក្នុងតម្លៃ ខ្លួន១៣លានអឺរ៉ូ ហើយប្រសិនបើ Roma ចង់រក្សាទុកកីឡាកររូបនេះ ត្រូវចំណាយប្រាក់ដល់ក្លឹបល្បីនៅអេស្ប៉ាញចំនួន២៨លានអឺរ៉ូទៀត ។ Barcelona សម្រេចលក់ខ្សែប្រយុទ្ធអាយុទាបជាង២១ឆ្នាំ រូបនេះក្រោយពីទិញកីឡាករអាឡិកស៊ីស សានឆេស ខ្សែបម្រើពីក្លឹប Udinese ក្នុងតម្លៃខ្លួន២៦លានអឺរ៉ូ និងចុះហត្ថលេខារយៈពេល៥ឆ្នាំ។
* កីឡាករណាស្រ៊ី មិនបន្តកិច្ចសន្យាថ្មីជាមូលហេតុដាក់គំនាបលើក្លឹប Arsenal ឱ្យលក់
Arsenal ក្លឹបល្បីនៅអង់គ្លេស អាចសម្រេចចិត្តលក់កីឡាករសាមៀ ណាស្រ៊ី នៅក្នុងរដូវកាលថ្មីនេះក្រោយពីកាសែតដឹសាន់ បង្ហើបឱ្យដឹង យោងតាមសម្តីខ្សែប្រយុទ្ធជនជាតិបារាំងរូបនេះបញ្ជាក់ប្រាប់ មិត្តរួមក្លឹបថា មិនបន្តកិច្ចសន្យាថ្មីជាមួយ Arsenal ទៀតទេ ខណៈកិច្ចសន្យាចាស់នៅសល់រយៈពេល១ឆ្នាំ ។ ខ្សែប្រយុទ្ធអាយុ២៤ឆ្នាំរូបនេះ បានបដិសេធប្រាក់ឈ្នួល១សប្តាហ៍១១៥.០០០ផោន ពីកិច្ចសន្យាថ្មីរបស់ Arsenal និងរីករាយនៅជាមួយក្លឹបរហូតបញ្ចប់កិច្ចសន្យា ទើបផ្លាស់ចេញពីក្លឹបដោយគ្មានតម្លៃខ្លួន ។ បញ្ហានេះចាត់ទុកថា ជាការដាក់គំនាបឱ្យក្លឹប Arsenal សម្រេចចិត្តលក់ណាស្រ៊ី ក្នុងរដូវកាលថ្មីដោយមានក្លឹប Man City ហ៊ានចំណាយ២០លានផោន ទិញយកមកពង្រឹងក្លឹប ។
* ក្លឹបបាល់ទាត់ Juventus របស់អ៊ីតាលី ចុះហត្ថលេខារយៈពេល៥ឆ្នាំ ទិញកីឡាករអាទូរ៉ូ វីដាល របស់ Leverkusen
Juventus ក្លឹបល្បីនៅអ៊ីតាលី បានទិញកីឡាករអាទូរ៉ូ វីដាល ខ្សែបម្រើក្រុមជម្រើសជាតិស៊ីលី របស់ក្លឹប Leverkusen ជាផ្លូវការក្នុងតម្លៃខ្លួន១០,៥លានអឺរ៉ូ ដោយកីឡាករខាងលើមានកិច្ចសន្យារយៈពេល៥ឆ្នាំ ។ សម្រាប់តម្លៃខ្លួនក្លឹប Juventus នឹងផ្តល់ប្រាក់ដល់ក្លឹប Leverkusen ភ្លាមៗចំនួន៥លានអឺរ៉ូ បន្ទាប់មកនឹងផ្តល់ឱ្យ៣លានអឺរ៉ូទៀត នៅថ្ងៃទី៣០ មិថុនា ឆ្នាំ២០១២ ចំណែកចំនួនប្រាក់នៅសល់២,៥លានអឺរ៉ូ នឹងឱ្យផ្តាច់នៅថ្ងៃទី៣១ ធ្នូ ឆ្នាំ២០១២ ។ ក្រៅពីនេះ ក្លឹប Juventus បានបង្ហើបឱ្យដឹងបន្តថា តម្លៃខ្លួនរបស់កីឡាអាយុ២៤ឆ្នាំរូបនេះ អាចកើនដល់២លានអឺរ៉ូ ដោយស្ថិតនៅលើលទ្ធផលរបស់សាមីខ្លួនក្នុងរយៈពេល៥ឆ្នាំចាប់ពី ពេលនេះតទៅ ។
* ក្លឹប Chelsea ចំណាយ៥លានផោនទិញ កីឡាកររ៉ូម៉េអូ ពីBarcelona
ក្លឹប Chelsea ជាក្លឹបល្បីនៅក្របខណ្ឌប្រឺមីញេលីកអង់គ្លេស ជិតចុះហត្ថលេខាលើកិច្ចសន្យាទិញកីឡាករអូរីអូល រ៉ូម៉េអូ ខ្សែបម្រើអនាគតវែងឆ្ងាយមកលេងឱ្យក្លឹប ក្រោយពីព្រមព្រៀងលើតម្លៃខ្លួនជាមួយក្លឹប Barcelona ក្នុងតម្លៃ៥លានផោន ហើយរង់ចាំតែការត្រួតពិនិត្យសុខភាពប៉ុណ្ណោះ ។ លោកអង់ត្រេ វីលឡាស បូអាស គ្រូបង្វឹកក្លឹប Chelsea មានចំណាប់អារម្មណ៍លើកីឡាកររ៉ូម៉េអូ តាំងពីសម័យដែលខ្លួននៅក្លឹប Porto ម៉្លេះលុះពេលផ្លាស់មកបំពេញការងារជាគ្រូបង្វឹក Chelsea ស្របពេលដែលកីឡាករម៉ៃឃើល អេសសៀង របួសជង្គង់ត្រូវសម្រាករយៈពេលយ៉ាងតិច៦ខែ ទើបគ្រូបង្វឹកជនជាតិព័រទុយហ្គាល់រូបនេះត្រូវការកីឡាកររ៉ូ ម៉េអូ ខ្សែបម្រើជនជាតិអេស្ប៉ាញអាយុ១៩ឆ្នាំមកជំនួស ៕
No comments:
Post a Comment