យុវជនស្ទាវពីរក្រុមចិត្តឆេវឆាវពេលកំពុងច្រៀងខារ៉ាអូខេ ដោយភាគីក្រុម ក្មេងស្ទាវ មួយក្រុមទៀត សុំក្បាលមេក្រូយកមកច្រៀងម្ដង មិនបាន ខឹងចិត្តនាំគ្នាទាញទីបវាយសំពងបែកក្បាលរបួសធ្ងន់២នាក់។ ហេតុការណ៍កើតហេតុកាលពីថ្ងៃទី២៤ខែកក្កដា ឆ្នាំ២០១១ វេលាម៉ោង២១និង ៣០នាទី នៅកន្លែងលក់គ្រឿងក្លែមរបស់ឈ្មោះ ចាន់ អិត (ផ្ទះ ស សុរ៉ាត់ឌី) ស្ថិតនៅភូមិស្វាយធំ សង្កាត់ក្រាំងអំពិល ក្រុងកំពត ខេត្ត កំពត។ ជនសង្ស័យឈ្មោះ យឹម ផាន់នូ ត្រូវបានឃាត់ខ្លួន និង បក្សពួក ៤នាក់ផ្សេងទៀតមិនស្គាល់អត្តសញ្ញាណ បានយកដែកបំពង់ទីបវាយទៅលើជនរងគ្រោះឲ្យរបួសធ្ងន់ ២នាក់។
សមត្ថកិច្ចបានឲ្យដឹងថា ជនរងគ្រោះឈ្មោះ រី សារ៉ុន ហៅ សី ភេទប្រុសអាយុ ១៩ឆ្នាំ សព្វថ្ងៃរស់នៅភូមិគក ឃុំ ត្នោត ស្រុក កញ្ច្រៀច ខេត្តព្រៃវែង មុខរបរកម្មករបើកបររ៉ូឡូផ្លូវដែកនៅកំពត រងរបួសបែកក្បាលពីក្រោយ និងម្នាក់ទៀតឈ្មោះ នល់ ឧត្ដម ហៅ អាដំ ភេទប្រុស អាយុ២០ឆ្នាំ សព្វថ្ងៃរស់នៅភូមិព្រៃរុន ឃុំទ្រាំង ស្រុក ទ្រាំង ខេត្ត តាកែវ មុខរបរ កម្មករពិនិត្យស្ទុងផ្លូវដែករងរបួសបែកក្បាលពីក្រោយដូចគ្នា។
តាមបណ្ដឹងរបស់ឈ្មោះ នល់ ឧត្ដម បានឲ្យដឹងថា ខ្លួនរួមជាមួយមិត្តភក្ដិ ឈ្មោះ រី សារ៉ុន និង ឈ្មោះ បុល ហៅ ជ្រូក ខណៈពេលកំពុងច្រៀងខារ៉ាអូខេ(គិតតាមបទ) មានឈ្មោះ យឹម ផាន់នូ សុំខ្លួនច្រៀងមួយបទពេលនោះឈ្មោះ យឹម ផាន់នូ កំពុងច្រៀងស្រាប់តែកាសែតដីសខារ៉ាអូខេ ជាប់រូបភាពរអាក់រអួល ហើយឈ្មោះ យឹម ផាន់នូ បានយកក្បាលមេក្រូហ្វូន អុកលើតុ រួចដើរចេញមកក្រៅបាត់។ បន្ទាប់មកឈ្មោះ យឹម ផាន់នូ ចូលទៅវិញយកកែវគប់មកលើខ្លួន(នល់ ឧត្ដម) ត្រូវចំស្មាខាងស្ដាំ ហើយឈ្មោះ យឹម ផាន់នូ ចេញមកក្រៅពេលនោះពួកជនរងគ្រោះឈប់ច្រៀង ដោយឈ្មោះ រី សារ៉ុន ចេញមកខាងមុខ ត្រូវឈ្មោះ យឹម ផាន់នូ ដាល់ត្រូវមុខខាងស្ដាំ ១ដៃ រួចឈ្មោះ យឹម ផាន់នូ យកដែកបំពង់ទីបវាយក្បាលឈ្មោះ រី សារ៉ុន ១បំពង់ទីបមកបន្ទាប់បក្សពួករបស់ឈ្មោះ យឹម ផាន់នូ យកដុះឥដ្ឋគប់ក្បាលឈ្មោះនល់ ឧត្ដម១ដុំឥដ្ឋទៀតបណ្ដាលឲ្យបែកក្បាលខាងក្រោយទាំងពីរនាក់ តែម្ដង។សមត្ថកិច្ចបានឃាត់ខ្លួនឈ្មោះយឹម ផាន់នូ ប៉ុន្តែបក្ខពួកគេ៤នាក់ទៀតបានរត់គេចខ្លួនបាត់ ទៅហើយ។ ជនសង្ស័យឈ្មោះយឹម ផាន់នូវ បានឆ្លើយបដិសេធថាខ្លួនមិនបានវាយទៅលើជនរងគ្រោះទេ។ ប៉ុន្តែទោះយ៉ាងណាសមត្ថកិច្ចបានកសាងសំណុំរឿងបញ្ជូនទៅតុលាការចាត់ ការតាមច្បាប់ហើយ៕
No comments:
Post a Comment