+ភ្នំឧដុង្គ
ឧដុង្គ ជាខ្សែភ្នំលាតសន្ធឹងពីជើងទៅត្បូងប្រវែង១៥០០ម៉ែត្រ ទទឹង៧០០ម៉ែត្រ ឋិតនៅក្នុងឃុំផ្សារដែក និងឃុំភ្នំបាត ស្រុកពញាឮ ខេត្តកណ្ដាល។ ទីនេះជាអតីតវាំងចាស់អំឡុងឆ្នាំ១៦១៨-១៨៦៦ មានចម្ងាយប្រមាណ៤០គីឡូម៉ែត្រ ពីរាជធានីភ្នំពេញធ្វើដំណើរតាមផ្លូវជាតិលេខ៥។ ភ្នំឧដុង្គនេះផងដែរអ្នកខ្លះគេហៅថាភ្នំព្រះរាជទ្រព្យ ឬភ្នំអដ្ឋរស្សទៅតាមទម្លាប់របស់ប្រជាជន។ ខ្សែភ្នំនេះមានកំពូលប្រាំ ដែលមានផ្លូវសម្រាប់ទាក់ទងគ្នាពីកំពូលភ្នំមួយទៅកាន់កំពូល ភ្នំមួយទៀត មិនតែប៉ុណ្ណោះទៅដល់លើកំពូលភ្នំហាក់កើតមានឡើងនូវអាថ៌កំបាំង អ្វីមួយនៅលើកំពូលភ្នំនីមួយៗ ដែលទាក់ទាញទេសចរឱ្យកាន់តែចង់ទៅដល់ផ្ទាល់គ្រប់កំពូលទាំងប្រាំ។ នៅលើកំពូលភ្នំនេះផងដែរ ក៏មានចេតិយធំស្កឹមស្កៃជាច្រើន ដូចជាចេតិយព្រះអង្គឌួង ចេតិយព្រះមុនីវង្ស និងអតីតព្រះមហាក្សត្រ មួយចំនួនទៀតព្រមទាំងញាតិវង្សានុវង្ស។ លើសពីនេះទៅទៀត មានព្រះចេតិយមួយយ៉ាងធំទើបសាងសង់រួចនៅឆ្នាំ២០០២ ជាទីសក្ការបូជារបស់បងប្អូនប្រជាពលរដ្ឋអ្នកកាន់ពុទ្ធសាសនា។ ចេតិយមួយនេះឈ្មោះថា ព្រះសក្យមុនីចេតិយ ដែលតម្កល់នូវព្រះសារីឫកធាតុរបស់ព្រះសម្មាសម្ពុទ្ធ ដោយព្រះបាទនរោត្តមសីហនុ និងអគ្គមហេសីនៅឆ្នាំ២០០២បានដង្ហែពីចេតិយនាទីក្រុងភ្នំពេញមក កាន់ទីនេះ។ ទេសភាពដ៏ត្រកាល និងលក្ខណៈប្រវត្តិសាស្រ្តនៃទីតាំងនេះបានទាក់ទាញភ្ញៀវទេសចររាប់ រយរាប់ពាន់នាក់ឱ្យចូលមកទស្សនាទីនេះ ដែលជាផ្នែកមួយជួយបង្កើតមុខរបរ និងសម្រាលជីវភាពប្រជាពលរដ្ឋរស់នៅម្ដុំនោះ។ ពួកគាត់ភាគច្រើនជាអ្នកលក់ដូរម្ហូបអាហារ ផ្លែឈើ ភោគផលព្រៃឈើ សំភារៈសិប្បកម្មវត្ថុអនុស្សាវរីយ៍ និងអ្នកនាំភ្ញៀវជាដើម។
+ភ្នំប្រសិទ្ធ
ឋិតលើទីតាំងស្រុកពីរក្នុងខេត្តកណ្ដាល គឺស្រុកពញាឮ និងស្រុកអង្គស្នួលរមណីយដ្ឋានភ្នំប្រសិទ្ធមានចម្ងាយផ្លូវប្រមាណ ២៤គីឡូម៉ែត្រ ពីទីក្រុងភ្នំពេញតាមផ្លូវជាតិលេខ៥ បត់ចូល១៣គីឡូម៉ែត្រ តាមផ្លូវបំបែកខាងឆ្វេងដៃត្រង់ចំនុចគីឡូម៉ែត្រលេខ១១ ផ្សារព្រែកព្នៅ។ ភ្នំប្រសិទ្ធនេះមានទេសភាពធម្មជាតិស្រស់ត្រកាលប្រកបដោយជំនោរបរិសុទ្ធ និងជាទីកន្លែងមានលក្ខណៈបែបប្រវត្តិសាស្ត្រផងដែរ។ នៅទីនោះមានរូបព្រះពុទ្ធបដិមាចូលនិព្វានមួយយ៉ាងធំ សម្រាប់ជាសក្ការបូជាចំពោះពុទ្ធសាសនិក។ ម្យ៉ាងទៀតរមណីយដ្ឋាននេះក៏ជាទីកន្លែងសក្តិសិទ្ធមួយ ដែលប្រជាពលរដ្ឋខ្មែរទាំងជិតទាំងឆ្ងាយចូលចិត្តឡើងទៅបន់ស្រន់បួងសួង សុំសេចក្ដីសុខ។ តាមការស្រាវជ្រាវ ភ្នំប្រសិទ្ធនេះជាទីតាំងមួយមានកំណប់រ៉ែមាសផងដែរ។
ក្រៅ ពីតំបន់ទេសចរធម្មជាតិនិងប្រវត្តិសាស្រ្តទាំងពីរនេះ ខេត្តកណ្តាលក៏អំណោយផលខាងតំបន់ទេសចរកែច្នៃផងដែរដូចជា តំបន់កំសាន្តព្រែកលៀប តំបន់កំសាន្តបាក់ខែង កៀនស្វាយក្រៅ កៀនស្វាយក្នុង ជាដើមព្រមទាំងសិប្បកម្មតម្បាញ ដែលជាមុខរបររបស់ប្រជាពលរដ្ឋនៅតាមតំបន់ភូមិស្រុកនីមួយៗ ក៏ជារូបភាពទាក់ទាញការចាប់អារម្មណ៍ភ្ញៀវទេសចរខ្ពស់ផងដែរ។
ជារួមមកខេត្តកណ្តាលថ្វីត្បិតតែពុំសូវសម្បូរតំបន់ទេសចរធម្មជាតិក៏ពិតមែន តែខេត្តនេះមានសក្ដានុពលភាពខាងដំណាំហូបផ្លែ ដែលជាផលិតផលរបស់ខ្មែរគ្មានការប្រើប្រាស់សារធាតុគីមី។
No comments:
Post a Comment