ក្រៅ ពីតំបន់ឆ្នេរ ដែលអាចឱ្យទេសចរប្រលែងកំសាន្តជាមួយទឹកសមុទ្រហើយនោះ ខេត្តកែបក៏នៅមានតំបន់ទេសចរមួយចំនួនទៀតផងដែរ ដូចជា៖
រមណីយដ្ឋានភ្នំសសៀរៈ
ភ្នំសសៀរ មានកំពស់ប្រមាណ៤០ម៉ែត្រ មានផ្ទៃដីសរុបប្រមាណ១,៥គីឡូម៉ែត្រ ឋិតនៅមិនឆ្ងាយប៉ុន្មានពីខេត្តកែប គឹជារមណីយដ្ឋានបែបវប្បធម៌ ដែលទេសចរក្នុងខេត្តកំពត និងតំបន់ផ្សេងទៀតចូលចិត្តទៅកំសាន្តនៅពេលមានពិធីបុណ្យប្រពៃណី ម្ដង។ នៅលើកំពូលភ្នំមានរូងធម្មជាតិមួយចំនួន ដែលទេសចរទាំងឡាយមកដល់ហើយ មិនដែលភ្លេចចូលទៅបន់ស្រន់សុំសេចក្ដីសុខ ឬបួងសួងនោះឡើយ ព្រោះទីនោះគេជឿថាជាតំបន់សក្តិសិទ្ធ ដូចជារូងដំរីស និងរូងប្រជៀវ ជាដើម។ នៅក្នុងរូងដំរីស ក្រៅពីមានថ្មដុះជារូបដំរីពណ៌សមួយយ៉ាងធំនៅមានផ្លូវចូល ផ្សេងទៀត ទៅដល់វាលស្រែមួយរយ ជាប្រភេទថ្មដុះតូចៗ ដែលគេសន្មតថាជាវាលស្រែ។ រីឯនៅក្នុងរូងប្រជៀវវិញ មានសត្វប្រជៀវរាប់ពាន់ក្បាល យំទ្រហឹងពេញរូងភ្នំ និងមានរូបសំណាកព្រះពុទ្ធរូបសម្រាប់ជាសក្ការបូជាផងដែរ។
កោះទន្សាយ:
ជាកោះធម្មជាតិមានខ្សាច់សក្បុស មានព្រៃដុះខៀវស្រងាត់ និងជាតំបន់ដែលពួកសត្វសមុទ្រ ដូចជាក្ដាម បង្គា គ្រុំ ងាវ ជាដើម ចូលចិត្តរស់នៅជាពិសេសមានប្រភេទផ្កាថ្មដ៏ស្រស់ស្អាតទៀតផង។ ឋិតនៅចម្ងាយប្រមាណ៤គីឡូម៉ែត្រ ពីខេត្តកែបកោះទន្សាយមានផ្ទៃក្រឡាប្រមាណ២គីឡូម៉ែត្រការេ មានឆ្នេរចំនួនពីរកន្លែង ជាទីមនោរម្យក្នុងការងូតទឹកកំសាន្ត សម្រាប់ទេសចរនានាពិសេសទេសចរបរទេស។
វត្តភ្នំលាវ:
ឋិតនៅភាគខាងកើតខេត្តកែប ជាទីអារាមពុទ្ធសាសនាសាងសង់ឡើងលើកំពូលភ្នំ មានកំពស់ទាបល្មមជាតំបន់ដែលប្រជាពលរដ្ឋខ្មែរចូលចិត្តទៅកំសាន្ត នៅពេលមានពិធីបុណ្យទានម្ដងៗ ជាពិសេសបុណ្យចូលឆ្នាំថ្មី និងបិណ្យភ្ជំបិណ្ឌជាដើម។
No comments:
Post a Comment