ចម្ងាយប្រមាណ៩៣គីឡូម៉ែត្រ ពីរាជធានីភ្នំពេញកាត់តាមផ្លូវជាតិលេខ៥ ខេត្តកំពង់ឆ្នាំងជាទឹកដីមួយ ដែលល្បីល្បាញខាងសិប្បកម្មផលិតក្អមឆ្នាំង។ មិនតែប៉ុណ្ណោះ ទឹកដីនេះក៏អំណោយផលខាងធនធានធម្មជាតិជាពិសេសត្រីបឹងទន្លេសាបដ៏ សម្បូរបែប ដែលជាធនធានយ៉ាងសំខាន់សម្រួលដល់ជីវភាពប្រជានេសាទខ្មែរយើង។ បឹងទន្លេសាបមួយដ៏ធំសណ្តូកខ្លួនចំពាក់កណ្តាលទីរួមខេត្ត កំពង់ឆ្នាំង ដែលគេអាចមើលពីត្រើយម្ខាងនៃទនេ្លឃើញភ្នំ មានសណ្ឋានដូចដងខ្លួនមនុស្សដេកចំហៀងខ្លួន។ ភ្នំនោះហើយដែលខ្មែរយើងគ្រប់រូបសុទ្ធតែបានស្គាល់តាមរយៈរឿង ព្រេងបុរាណ គឺរឿងឬទ្ធិសែននាងកង្រី។ កាលណាគេនិយាយអំពីខេត្តកំពង់ឆ្នាំង គេនឹកឃើញដល់ភ្លាមភ្នំនាងកង្រី ដែលជាទីតាំងប្រវត្តិសាស្រ្តរបស់ខេត្តនេះ។ គេអាចធ្វើដំណើរទៅកំសាន្តនៅរមណីយដ្ឋានភ្នំនាងកង្រី ដោយជិះទូកឬជិះសាឡាងឆ្លងកាត់ទន្លេសាបរយៈពេលប្រមាណកន្លះម៉ោង រួចធ្វើដំណើរតាមផ្លូវគោកប្រមាណ១៥នាទីបន្ថែមទៀត។ ក្រៅពីភ្នំនាងកង្រីនេះ នៅមានទីតាំងមួយចំនួនទៀតក្នុងខេត្តនេះ ដែលប្រជាជនខ្មែរយើងចូលចិត្តទៅកំសាន្តទស្សនា ជាពិសេសក្នុងឱកាសបុណ្យទានម្តងៗដូចជា៖
-ភ្នំរាប់បាត្រ ឋិតនៅចម្ងាយប្រមាណ១២គីឡូម៉ែត្រ ពីទីរួមខេត្តតាមផ្លូវជាតិលេខ៥ ក្នុងភូមិអណ្ដូងជ្រៃឃុំអណ្ដូងស្នាយស្រុករលាប្អៀរ។ ទីនោះជារមណីយដ្ឋានបែបប្រវត្តិសាស្រ្តទាក់ទងទៅនឹងរឿងព្រេងរបស់ ខ្មែរយើង។
-ភ្នំសន្ទូច ឋិតក្នុង ភូមិសន្ទូច ឃុំស្រែថ្មី ស្រុករលាប្អៀរ ចម្ងាយ៣គីឡូម៉ែត្រ ពីទីរួមខេត្តកំពង់ឆ្នាំង។
-ភ្នំក្រាំងរមាស ឋិតនៅក្នុងស្រុករលាប្អៀរនៅតាមដងផ្លូវជាតិលេខ៥ចម្ងាយ២គីឡូ ម៉ែត្រ ពីទីរួមខេត្តកំពង់ឆ្នាំង ទីនោះមានម្លប់ឈើធំៗ ខ្យល់ជំនោរត្រជាក់អមដោយទេសភាពធម្មជាតិស្រស់ត្រកាល។
-ភ្នំតារាជ ឋិតនៅចម្ងាយប្រមាណ១០គីឡូម៉ែត្រ ពីទីរួមខេត្តកំពង់ឆ្នាំង ក្នុងភូមិភ្នំតូច ឃុំក្រាំងពង្រ ស្រុករលាប្អៀរ តាមផ្លូវជាតិលេខ៥ ជាតំបន់ប្រវត្តិសាស្រ្តជាប់ទាក់ទងទៅនឹងរបបខ្មែរក្រហម។
ក្រៅពីភ្នំធម្មជាតិទាំងនេះខេត្តកំពង់ឆ្នាំងក៏មានប្រាសាទបុរាណដែល ភ្ញៀវទេសចរជាតិចូលចិត្តទៅកំសាន្តនៅពេលមានពិធីបុណ្យទានប្រពៃណី ខ្មែរម្តងៗ។
No comments:
Post a Comment